Aoǁnâ-aob 8
8
1Tari-e amabes ǃnâ a gā-ai?
Tari-e xūn di ǂâibasende a ǁguiǃā ǁkhā?
Gā-aisib ge khoe-i di aisa ra ǂkhai kai
tsî karosasib ai-īsib diba ra ǀkharaǀkhara.
Gao-aoba ǁnâuǀnam
2Gao-aob ra mîna ǁnâuǀnam, Elob di nūs ai. 3ǁÎb aisa xu bēs tamas ka io ǁîb ǃoagu hâ mâǃoadi ǃnâ ǁhaos ai tā ǃhae. ǂGaob ra xū-i hoa-eb ǁîba dī ǁkhā xuige. 4Mîs gao-aob dis ge ǀgaiba ūhâ. O tari-e ǁîba “Tare-ets ra dī?” ti a dî ǁkhā.
5ǁNā-i hîa mîmāde ra ǁnâuǀnam-i ge ǂkhababa ǂan tide
tsî gā-ai khoe-i ge ǂhanu ǁaeb tsî ǀgaub tsîna nî ǂan.
6Mâ xū-i hoa-i ge ǂhanu ǁaeb tsî ǀgaub tsîna ūhâ,
xaweb ge khoesiba ǃgomsiga nēs ǃnâ nî tsâ.
7ǀGui khoe-i tsîn ge ǃgoaxaǁaeb ǃnân tarena nî ī ǃkhaisa a ǀū,
o tari-e ǁnā ǃgoaxaǁaeb xa tare-e a mîba da ǁkhā?
8Khoe-i xare-i ge ûib di ǂoaba ǃkhō-oas ǀgaiba ūhâ tama hâ,
tsî i ge khoe-i xare-e ǁōtsēs ai ǀgaiba ūhâ tama hâ.
ǁNās ge ǃkhams ǀgui khoe-i tsîn ûiǂoaxū ǁoasa
ǃkhais ǁkhās khamib ge ǂkhababa ǁnān ǁîb ǃomǁae māhe hâna ore tide.
ǂKhaban tsî ǂhanu-ain
9Nē xūn hoana ta ge ge ǂâi nē ǃhūbaib, ǁîb ǃnân ǀnî khoena ǀgaiba ūhâ tsîn ǀnîna ǁîn ǃnaka ra ǃgamǃgamsenni ǃnâ ra ī xūna ta ge mûo. 10Tsî ta ge ǂkhaba khoen ge ǁkhōhe ǃkhaisa ge mû. ǁÎn ge khoen xa ǃās, ǁîs ǃnân ǁîn ǂkhaba sîsenga gere dīs ǃnâ gere koahe. Nēn hoan ge a harebeoǃnâ.
11Khoen dīn ra ǂkhabab ǃaroman ga ǁkharahe tama io, ǂkhababa dīs ǃnâ i tsū xū-e ǀkhai ti ra ǂâi xui-ao. 12ǁOre-ao-i ge mâtikō kaise iga ǂkhaba xawe gaxuse ra ûi. Tita ge ǂgomǁapo hâ ǁnān Eloba ra ǁnâuǀnamn nî ǁîban ra ǃgôa amaga gaxuse ûi ǃkhaisa. 13Xawes ge nēsa ǁnān hîa a ǂkhaban ǀkha ī tide. ǁÎn di ûib ge sommi khami ī tsîn ge ǁîna kaisen ǂkham hîa Eloban ǁnâuǀnam tama amaga nî ǁō. 14ǁNāpa i ge ǁnâuǃāhe ǁoa xū-e ǃhūbaib ai ra ī: ǂHanu-ai khoen ge ǂkhaba khoen nî sîsenūhe khami ra sîsenūhe tsîn ge ǂkhaba khoena hâ, ǂhanu-ai khoen nî sîsenūhe khami ra sîsenūhena. Nēn hoan ge a harebeoǃnâ ti ta ge ra mî.
15ǁNā-amaga ta ge a-i khoe-e ǃgâiaǂgao, ās, ǂûs tsî ǃgâiǃgâisens ǀguis ose i ǀnî xū-i ǃhūbaib ai i khoe-e nî dī-e ǀkhai xuige. Nēs ge khoe-i ǀkha ǁî-i di sîsenni, ǃhūbaib ai-i ûi hâ tsēdi, Elob ge ǁî-e mādi hoade nî hâ.
16Gā-aisib tsî ǃhūbaib hoaragab ain khoena tarena ra dīsa ta nî ǂan ǃkhaisa ta ge ǁgui-aisen, o ta ge tsēa tsî tsuxuba ge ǁom ǁoa i. 17Tsî ta ge hoaraga xūn Elob ge kuruna ge ǂâiǂâisen. Amabes ǃnâb ge khoesiba ǀoasase nē xūna a ǁnâuǃā ǁoa. Tsîts ga gā-ai khoe-i, hoaraga xūn Elob ra ǃhūbaib ai dīna i ǂan ti ra mî-e hō, o-i ge ǁî-e ǂans ǃaroma khoesi ǁnâuǃāba ǃnā hâse ra dīsen.
Currently Selected:
Aoǁnâ-aob 8: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
