Mk 7

Li xchaq'rab' li Yos ut li xna'leb'eb' laj Pariseey

(Mt 15,1-20)

1Ke'xch'utub' rib' rik'in li Jesus eb' laj Pariseey jo'wi' eb' laj tz'iib' li ke'chalk chaq Jerusalén. 2Ke'ril naq wankeb' xtzolom li Jesus neke'wa'ak chi tz'aj ruq'eb', naraj naxye ink'a' neke'ch'ajok 3(xb'aan naq eb' laj Pariseey ut chixjunileb' laj Judiiy ink'a' neke'wa'ak, wi ink'a' xe'xch'aj xb'enwa li ruq'eb' toj chi rit xteleb', a' kaw neke'xpaab' li xe'toonil na'leb'; 4naq neke'sutq'iik chaq sa' k'ayiil, ink'a' neke'wa'ak, wi ink'a' xe'xch'ajob'resi rib'. Ut wank chik naab'al xe'toonil na'leb' neke'xpaab', kama' li xch'ajob'resinkil li uk'leb' sek', li xaar ut li perpookil sek'), 5jo'kan naq eb' laj Pariseey ut eb' laj tz'iib' ke'xpatz' re:

—K'a'ut naq eb' laatzolom ink'a' neke'xb'aanu jo' k'utb'il chiqu xb'aaneb' li qaxe' qatoon, naq neke'wa'ak chi tz'aj ruq'eb'? chankeb'.

6Ut li Jesus kixye reheb':

—Yaal li kixye laj Isaías cherix laa'ex, aj ka'pak'al u, jo' naq tz'iib'anb'il:

«Li tenamit a'in rik'in xtz'uumal reheb' nikine'roxloq'i,

a'ut li xch'ooleb' najt wank wik'in.

7Maak'a' aj e naq nikine'roxloq'i,

xb'aan naq li k'aru neke'xk'ut chiruheb' li tenamit

yal xtaqlahomeb' li winq».#7,6-7 Is 29,13.

8Nekekanab' li xchaq'rab' li Yos ut a' chik li xnajteril na'leb' li winq nekepaab'.

9Kixye ajwi' reheb':

—Tz'aqal a' li xchaq'rab' li Yos neketz'eqtaana re xpaab'ankil li najteril na'leb' kanab'anb'il chaq eere. 10Xb'aan naq laj Moisés kixye: «Chawoxloq'i laana' laayuwa'»,#7,10a Ex 20,12; Dt 5,16. ut: «Ani tixmajewa li xna' xyuwa' tixtoj rix li xmaak rik'in kamk».#7,10b Ex 21,17; Lv 20,9. 11A'ut laa'ex nekeye: «Wi junaq tixye re li xna' xyuwa': Tatintenq'a raj, ab'an li k'aru we a'an korbán -chi jalb'il ru naraj naxye: ak mayejanb'il chik-, 12li winq a'an ink'a' chik tento tixtenq'a li xna' xyuwa' eeb'aan laa'ex». 13Chi jo'kan nekesach xwankil li Raatin li Yos xb'aan li najteril na'leb' li neketzol wi' eerib'. Ut naab'al chik k'a'aq re ru xkomon a'in nalajeeb'aanu.

14Li Jesus kixb'oqeb' wi' chik li tenamit ut kixye reheb':

—Chineerab'ihaq chejunilex ut chetawaq xyaalal. 15Maak'a' wank li tixtz'ajni li winq naq taa'ok chisa'; a' b'an li na'elk chaq rik'in li winq natz'ajnink re. 16Ani wank xxik re ab'ink, chi'ab'inq.

17Naq li Jesus kixkanab'eb' li k'iila tenamit, kox'okaq sa' kab'l ut eb' li xtzolom ke'xpatz' re xyaalalil li jaljookil ru aatin. 18Ut a'an kixye reheb':

—Ma jo'ka'in naq namajelo'k ajwi' leena'leb' laa'ex? Ma ink'a' neketaw ru naq chixjunil li na'ok rik'in li winq moko a'an ta li natz'ajnink re, 19xb'aan naq ink'a' na'ok sa' li xch'ool, na'ok b'an sa' li xsa' ut taaxik sa' li tz'eqleb'aal mul?

Rik'in a'an kixye naq chixjunil li tzekemq maak'a' xtz'ajnil. 20Ut kixye ajwi':

—Li na'elk chaq rik'in li winq, a'an li natz'ajnink re, 21xb'aan naq chisa' li xch'ool na'elk chaq li ink'a' usil na'leb': li ko'b'eetak yumb'eetak, elq'ak, kamsink, 22muxuk sumlaak, pixilal, maa'usilal, b'alaq'ik, tz'i'b'eetalil na'leb', kaqalik, majewank, q'etq'etil, maak'a'il na'leb'. 23Chixjunil li maa'usilal a'in na'elk chaq sa' xch'ool li winq ut a'an natz'ajnink re.

III. LI XK'ANJEL LI JESUS MOKO SA' XTEEPAL TA GALILEA (7,24—10,52)

Li ixq aj Sirofenicia

(Mt 15,21-28)

24Naq li Jesus ki'elk aran, koho sa' xteepal Tiro, kox'okaq sa' jun li kab'l ut kiraj raj naq maa'ani chinawoq re, ab'an ink'a' kiru kiwank chi muqmu. 25Chi junpaat jun li ixq li wank xch'ina ko' eechaninb'il xb'aan tz'ajn aj musiq'ej, kirab'i resil li Jesus, kichalk ut kolxkut rib' chi roq. 26Li ixq a'in maawa' aj Judiiy li xpaab'aal, a'an jun li ixq aj Fenicia wank sa' xteepal Siria; ut ki'ok chi relajinkil ru re naq chirisihaq li maa'us rik'in li xko'. 27Ab'an li Jesus kixye re:

—Wa'aqeb' wan xb'enwa eb' li alal k'ajolb'ej, xb'aan naq moko us ta xmaq'b'al xwaheb' li alal k'ajolb'ej re xk'eeb'al reheb' li kok' tz'i'.

28A'ut a'an kichaq'ok:

—Yaal, Qaawa', ab'anan eb' li kok' tz'i' neke'xwa' ajwi' li xk'aj xwaheb' li kok'al rub'el li meex, chan.

29Toja' naq li Jesus kixye re:

—Ayu. Rik'in li aatin xaye x'elk li maa'us rik'in laako'.

30Naq kisutq'iik li ixq sa' rochoch, koxtaw li ch'ina ixqa'al yokyo sa' ch'aat, ut li maa'us aj musiq'ej elenaq chik rik'in.

Kixk'irtasi jun li winq tz'ap xxik ut tat re

31Ki'elk chaq sa' xteepal Tiro, kinume'k Sidón ut kiwulak wi' chik chire li palaw re Galilea, sa' xteepaleb' li Lajeeb' chi Tenamit. 32Toja' naq ke'xk'am chaq jun tz'ap xik ut tat re, ut ke'relaji ru re naq tixk'e li ruq' sa' xb'een. 33Li Jesus kirisi xjunes li winq sa' xyanqeb' li tenamit, kixch'ikeb' li ru'uj ruq' sa' xxik ut rik'in xya'al re kixch'e' li ru'uj raq'. 34Kixtaqsi li rilob'aal sa' choxa, kixjiq' xch'ool ut kixye re: “Effatá”, chi jalb'il ru naraj naxye: “Teliiqat!”.

35Ut ke'tehonk li xxik, ak taahite'q li b'ak'b'o wi' li ru'uj raq', ut us ki'ok chi aatinak. 36Li Jesus kixchaq'rab'iheb' naq maa'ani aj e che'xye a'in; ab'an, naq kaw naxchaq'rab'iheb', k'ajo' chik naq neke'xpuktesi resil. 37Ut numtajenaq xsachikeb' xch'ool: “Xb'aanu chixjunil chi chaab'il -chankeb'-. Naxk'e chi ab'ink eb' li tz'ap xxik ut chi aatinak eb' li mem”.

Currently Selected:

Mk 7: QQC

Highlight

Copy