Mk 14
14
V. XRAHILAL, XKAMIK UT XWAKLIJIK CHI YO'YO LI JESUS (14,1—16,20)
Ke'xk'uub' xchapb'al li Jesus
(Mt 26,2-5; Lk 22,1-2)
1Ka'b'ejaq li Paswa nawa'e'k wi' li wa ink'a' yuub'il, eb' li xb'eenil aj tij ut eb' laj tz'iib' yookeb' chi xsik'b'al chan raj ru naq te'xchap li Jesus chi b'alaq'inb'il ut te'xkamsi raj. 2Xb'aan naq neke'xye:
—Ink'a' us a'an sa' li ninq'e; mare anchal taawanq mululij ib' sa' li tenamit.
Li Jesus kiyule'k Betania rik'in sununkil b'an
(Mt 26,6-13; Jn 12,1-8)
3Wan chaq Betania li Jesus, sa' rochoch laj Simón li saqlep rix, yo chi hilank sa' meex. Toja' naq kichalk jun li ixq: kixk'am chaq jun saqi meet chi sununkil b'an, tz'aqal naard wank chisa' ut q'axal terto xtz'aq; kixjor li meet ut kixhoy li b'an sa' xjolom li Jesus. 4Wan xik' ke'reek'a ut ke'ok chi xyeeb'al chirib'ileb' rib':
—K'a' aj e naq xsachmank li sununkil b'an a'in? 5Xru raj xk'ayimank li sununkil b'an a'in chi numenaq o'lajuk'aal tumin plaat ut xk'eemank raj reheb' li neb'a'.
Ut ke'xkawil'aatina li ixq.
6A'ut li Jesus kixye reheb':
—Kanab'omaq. K'a'ut naq nekech'i'ch'i'i? Chaab'il k'anjel xb'aanu we. 7Xb'aan naq eb' li neb'a' junelik wanqeb' eerik'in ut, naq teeraj, texruhanq chi rusilankileb'; a'ut laa'in moko junelik ta wanqin eerik'in. 8Xb'aanu jo'ch'inal jo'nimal xru xb'aanunkil: xyul chi junxilaj linjunxaqalil re linmuqb'al. 9Relik chi yal ninye eere: yalaq ta b'ar sa' ruuchich'och' taapuktesimanq wi' li Chaab'il Esilal, taayeemanq ajwi' resil li xb'aanu li ixq a'in re xpatz'b'alaq.
Laj Judas kixyeechi'i xq'axtesinkil li Jesus
(Mt 26,14-16; Lk 22,3-6)
10Toja' naq laj Judas Iskariote, jun reheb' li Kab'laju, koho rik'ineb' li xb'eenil aj tij re xq'axtesinkil li Jesus reheb'. 11Naq ke'rab'i a'in, ke'saho'k sa' xch'ool ut ke'xyeechi'i xtumin. Ut a'an yo chi xsik'b'al chan raj ru naq tixq'axtesi sa' ruq'eb', tz'aqal sa' xq'ehil.
Li xloq'laj Wa li Qaawa'
(Mt 26,17-29; Lk 22,7-23; Jn 13,21-30; 1 Ko 11,23-25)
12Sa' li xb'een kutan nawa'e'k wi' li wa ink'a' yuub'il, naq namayejamank li karneer re li Paswa, eb' li xtzolom li Jesus ke'xye re:
—B'ar taawaj tooxik chi kawunk re naq toxaatzeka li Paswa?
13Toja' naq kixtaqla wiib' li xtzolom:
—Ayuqex sa' li tenamit, chan reheb'. Teek'ul jun li winq paqpooq chaq jun kuk chi ha' xb'aan; chetaaqehaq 14ut, b'arwi' tox'okaq, cheyehaq re laj eechal kab'l: «B'ar wank linna'aj tintzeka wi' li Paswa wochb'eeneb' lintzolom? chan chaq laj Tzolonel», cha'qex re. 15Ut a'an tixk'ut cheru, sa' xkab' xk'ojaril li kab'l, jun nimla na'ajej, ak wank chixjunil xhilob'aal ut ak kawresinb'il: aran texkawunq cho'q qe.
16Koheb' li xtzolom ut, naq ke'wulak sa' li tenamit, koxe'xtaw jo' chanru kiyehe'k reheb' xb'aan li Jesus, ut ke'xkawresi li Paswa.
17Naq ki'ewuuk, kiwulak li Jesus aran rochb'eeneb' li Kab'laju. 18Ut naq hilhookeb' sa' meex chi wa'ak, kixye reheb':
—Relik chi yaal ninye eere naq jun eere taaq'axtesinq we, a' li nawa'ak wik'in.
19Eb' a'an ke'ok chi raho'k sa' xch'ool ut chi xyeeb'al re li Jesus chi xjunjunqaleb':
—Malaj laa'inin, at Qaawa'?
20Kixye reheb':
—Jun eere laa'ex li Kab'laju, a' li naxtz'a li xwa wochb'een sa' linpulaat. 21Li K'ajolb'ej taaxik jo' tz'iib'anb'il chirix, ab'an ra chaalel sa' xb'een li winq li taaq'axtesinq re li K'ajolb'ej! Q'axal us raj cho'q re li winq a'an naq ink'a' xyo'laak chaq.
22Ut naq yookeb' chi wa'ak, kixchap li wa, kiyoxink sa' xb'een, kixjachi, kixk'e reheb' ut kixye:
—K'ulumaq, a'an a'in lintz'ejwal.
23Chirix chik a'an kixchap jun li uk'leb'-sek', kiyoxink, kixk'e reheb', ut chixjunileb' ke'uk'ak. 24Ut kixye reheb':
—A'an a'in linkik'el re li Sumwank, hoyb'il sa' xk'ab'a' chixjunileb'. 25Relik chi yaal ninye eere naq ink'a' chik twuk' li xya'al li uub' toj sa' chik li kutan a'an naq a' chik li ak' b'iin twuk' sa' li xnimajwal awab'ejihom li Yos.
Li Jesus kixye resil chi junxilaj li xmaak laj Pedro
(Mt 26,30-35; Lk 22,31-34, 39; Jn 13,36-38)
26Naq ak ke'xb'icha eb' li loq'laj b'ich,#14,26 A'aneb' li Saalm 113-118 li neke'b'ichamank xb'aaneb' laj Judiiy sa' roso'jik xninq'ehinkil li karneer re li Paswa. koheb' sa' xb'een li tzuul Olivos. 27Ut li Jesus kixye reheb':
—Chejunilex taaluktaaq eech'ool xb'aan naq tz'iib'anb'il: «Tintiq' laj k'aak'alenel karneer, ut eb' li karneer te'xcha'cha'i rib'eb'».#14,27 Zak 13,7. 28Ab'an, naq akaq xinwakliik chi yo'yo, k'amolb'ehaqin cheru toj Galilea.
29Toja' naq laj Pedro kixye re:
—Us ta chixjunileb' te'luktaaq xch'ool, ab'an laa'in ink'a'.
30Li Jesus kixye re:
—Relik chi yaal ninye aawe naq hoon ajwi', chiru li q'oqyink a'in, toj maji'aq nayaab'ak ka'sutaq li tzo' kaxlan, akaq xaye ox sut naq ink'a' nakanaw wu.
31A'ut laj Pedro kixye wi' chik chi kaw:
—Us ta tento tinkamq wochb'eenat, ab'an maajaruj tinmuq naq ninnaw aawu.
Jo'kan ajwi' ke'xye chixjunileb'.
Li Jesus kitijok Getsemaní
(Mt 26,36-46; Lk 22,39-46)
32Ke'wulak sa' jun li na'ajej Getsemaní xk'ab'a', ut li Jesus kixye reheb' li xtzolom:
—K'ojlanqex arin, tijoqin wan chaq le'.
33Kixk'am chirix laj Pedro, laj Santiago ut laj Jwan, ut kixtikib' xiwak ut yot'e'k xch'ool: 34Kixye reheb':
—K'ajo' xrahil li waanm, ka'aj chik maa ninkamk! Kanaaqex arin ut yo'lenqex.
35Kijilok kach'in chik ut kit'ane'k chiru ch'och', yo chi xtz'aamankil naq, wi truuq, chinume'q li honal a'an chi xb'een. 36Ut kixye: “Abbá,#14,36a Li aatin Abbá sa' arameo naraj naxye: At inraarookil yuwa'. A'an a'in li aatin neke'xye eb' li kok'al naq neke'aatinak rik'in li xyuwa'eb'. A'an ajwi' li aatin naroksi li Jesus sa' li tijok naq na'aatinak rik'in li xYuwa': a'an reetalil naq q'axal naxra li xYuwa' ut k'ojk'o li xch'ool rik'in, kama' junaq k'uula'al sa' ruq' li xyuwa'. Li apóstol San Pablo naxye naq jo'ka'in neke'tijok eb' li kristiyan sa' xtiklajik. Cf. Ro 8,15; Gal 4,6. at inYuwa', maak'a' ch'a'aj chawu laa'at: chawisi wik'in li sek' a'in.#14,36b Cf. Mt 26,39. Ab'an moko jo' ta li nawaj laa'in, jo'aq b'an li nakawaj laa'at”.
37Naq kisutq'iik chaq, kixtaweb' chi wark; ut kixye re laj Pedro:
—At Simón, ma yookat chi wark? Ma ink'a' xatruuk chi yo'lek jun k'amokaq? 38Yo'lenqex ut tijonqex re naq mext'ane'k sa' li aaleek: li musiq'ej yo'oon wank, a'ut li tz'ejwalej lub'lub' wank.
39Koho wi' chik ut kitijok rik'ineb' a ajwi' li aatin ak xye chaq. 40Ut naq kisutq'iik chaq, kixtaweb' wi' chik chi wark, xb'aan naq k'ajo'eb' li xwara sa' ruheb', ut ink'a' neke'xnaw k'aru te'xsume wi'. 41Kichalk wi' chik rox sut ut kixye reheb':
—Warinqex ut hilanqex wan. Ak xtz'aqlok ru, xwulak xhonal: anaqwan li K'ajolb'ej taaq'axtesiiq sa' ruq'eb' laj maak. 42Waklinqex! Yo'qeb'! We' chaq li taaq'axtesinq we.
Kichape'k li Jesus
(Mt 26,47-56; Lk 22,47-53; Jn 18,2-11)
43Toj yo ajwi' chi aatinak li Jesus, naq kiwulak laj Judas, jun reheb' li Kab'laju. Naab'aleb' li rochb'een, wankatqeb' xch'iich' ut xche', taqlanb'ileb' chaq xb'aaneb' li xb'eenil aj tij, xb'aaneb' laj tz'iib' ut eb' li cheekel winq. 44Li taaq'axtesinq re kixk'e li eetalil a'in reheb': “A' li tintz'ub' ru, a'an a'an. Chapomaq ut teek'am sa' yaal”.
45Ka'ajwi' kiwulak, kinach'ok rik'in li Jesus ut kixye re:
—At Tzolonel!
Ut kixtz'ub' ru. 46Toja' naq eb' a'an ke'xtaqsi li ruq'eb' sa' xb'een ut ke'xchap.
47Jun reheb' li wankeb' aran, kirisi li xch'iich', kixtiq' li xmoos li xyuwa'il aj tij ut kixch'ot li xxik.
48Ki'aatinak li Jesus ut kixye reheb':
—Ma jo' nachape'k junaq aj elq' naq xexchalk chinchapb'al rik'in ch'iich' ut che'? 49Rajlal kutan xinwank chaq sa' eeyanq cheetzolb'al sa' rochoch li Yos, ut ink'a' xineechap. Ab'an tento naq taatz'aqloq ru li Santil Hu.
50Toja' naq ke'elelik chixjunileb' ut ke'xkanab' xjunes. 51Jun li saaj al yo chi taaqenk re, yal lanlo sa' jun xt'ikr; ut kichape'k. 52Ab'an kixkanab' li xt'ikr ut ki'elelik chiruheb' chi t'ust'u.#14,52 Li saaj al a'in mare li San Markos.
Li Jesus chiru li xyuwa'il aj tij
(Mt 26,57-68; Lk 22,54, 63-71; Jn 18,13-15, 19-24)
53Ke'xk'am li Jesus rik'in li xyuwa'il aj tij. Ut chixjunileb' li xb'eenil aj tij, jo'wi' eb' li cheekel winq ut eb' laj tz'iib' ke'xch'utub' rib'. 54Laj Pedro najt rik'in naq yo chi xtaaqenkil, toj kiwulak chi xneb'aal li rochoch li xyuwa'il aj tij; aran, k'ojk'o sa' xyanqeb' li moosej, yo chi q'ixink chire li xam.
55Li xb'eenileb' aj tij ut chixjunil li xninqaleb' ru aj raqol aatin yookeb' chi xsik'b'al junaq aatin chirix li Jesus re xk'eeb'al chi kamsiik, ab'an ink'a' neke'xtaw, 56xb'aan naq naab'aleb' neke'xye yoob'anb'il aatin chirix, a'ut li neke'xye ink'a' naxk'ul rib'.
57Wan ke'xaqliik ut ke'xye yoob'anb'il aatin chirix:
58—Laa'o xqab'i naq kixye: «Laa'in tinjuk' li rochoch li Yos a'in yiib'anb'il chi uq'mej, ut chiru oxib' kutan tinyiib' jun chik moko yiib'anb'il ta rik'in uq'ej».
59Ab'an chi moko li neke'xye eb' a'an naxk'ul rib'.
60Toja' naq kixaqliik li xyuwa'il aj tij, kixk'e rib' sa' xyiheb' ut kixpatz' re li Jesus:
—Ma ink'a' tatchaq'oq b'ayaq? K'aru neke'xye eb' a'in chawix?
61A'ut a'an ink'a' ki'aatinak ut maak'a' kixsume wi'. Li xyuwa'il aj tij kixpatz' wi' chik re:
—Ma laa'at li Kriist, li Ralal li oxloq'inb'il Yos?
62Kixye li Jesus:
—Hehe', laa'inin, ut teeril li K'ajolb'ej k'ojk'ooq sa' xnim uq' li Nimajwal Yos, yooq chaq chi chalk sa' xb'eeneb' li choql sa' choxa.#14,62 Sal 110,1; Dn 7,13.
63Toja' naq li xyuwa'il aj tij kixq'ich li raq' ut kixye:
—K'a' chik te'ok wi' qe li testiiw? 64Xerab'i, xmajewa li Yos. K'aru teeye?
Chixjunileb' ke'xye naq wank xmaak re kamsiik.
65Wan ke'ok chi xchuub'ankil, ke'xtz'ap li xnaq' ru, ke'xpik'a chi ruq'eb':
—Q'ehi: ani xsak'ok aawe, chankeb' re.
Jo'kan ajwi' eb' laj k'anjel ke'xpaq'ihatq chi ruq'eb' naq ke'xk'ul.
Laj Pedro kitik'ti'ik
(Mt 26,69-75; Lk 22,56-62; Jn 18,15-18, 25-27)
66Naq laj Pedro wank taq'a chi neb'aal, kiwulak jun li ixq, xmoos li xyuwa'il aj tij. 67Naq kiril laj Pedro yo chi q'ixink, kixka'ya ut kixye:
—Laa'at ajwi' xat-ochb'eenink chaq re li Jesus aj Nazaret.
68A'ut a'an kitik'ti'ik:
—Ink'a' ninnaw chi moko nintaw ru li nakaye.
Ut ki'elk chirix kab'l sa' li nimla okeb'aal, ut jun li tzo' kaxlan kiyaab'ak.
69Li moos ixq, naq kiril ru, ki'ok wi' chik chi xyeeb'al reheb' li wankeb' aran:
—Li winq a'in jun reheb' a'an.
70A'ut a'an kitik'ti'ik wi' chik. Junpaataq chik a'an, eb' li wankeb' aran ke'xye wi' chik re laj Pedro:
—Relik chi yaal naq laa'at jun reheb' a'an, xb'aan naq laa'at aj Galilea.
71A'ut a'an ki'ok chi majewank ut chi xyeeb'al rik'in jurament:
—Ink'a' ninnaw ru li winq a'an li nekeye laa'ex!
72Tikto kiyaab'ak xka' sut li tzo' kaxlan. Ut laj Pedro kinaqk sa' xch'ool li kiyehe'k re xb'aan li Jesus: “Toj maji'aq nayaab'ak ka' sutaq li tzo' kaxlan, akaq ox sut xaye naq ink'a' nakanaw wu”. Ut k'ajo' naq kiyot'e'k chi yaab'ak.
Currently Selected:
Mk 14: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
