Mt 23

Li Jesus ki'aatinak chirixeb' laj tz'iib' ut eb' laj pariseey

(Mk 12,38-40; Lk 11,37-54; 20,45-47)

1Toja' naq li Jesus kiraatinaheb' li tenamit jo'wi' eb' li xtzolom, 2ut kixye reheb': “Sa' li xk'ojarib'aal laj Moisés xe'k'ojlaak eb' laj tz'iib' ut eb' laj pariseey. 3Cheb'aanu ut chepaab' chixjunil li te'xye eere, ab'anan meeb'aanu jo' neke'xb'aanu eb' a'an, xb'aan naq neke'xye ut ink'a' neke'xb'aanu. 4Q'axal aal li iiq neke'xb'ak' ut neke'xk'e sa' xb'eeneb' li tenamit, a'ut eb' a'an chi moko rik'in ru'uj ruq'eb' neke'raj reek'asinkil. 5Chixjunil nalaje'xb'aanu yal re naq ilb'ilaqeb' xb'aaneb' li tenamit: neke'xyu' li xloq'laj eetalil li Chaq'rab' chi xpeekemeb' jo'wi' chiruheb' li xtel, ut neke'xtiq xsahob' ru li re li raq'eb';#23,5 Cf. Ex 13,9.16; Dt 6,8; 11,18; Nm 15,37. 6neke'raj wank chi xjolomil li meex naq neke'wa'ak ut neke'xsik' li xb'een na'ajej sa'eb' li ch'utleb'aal kab'l; 7neke'raj naq te'k'ehe'q xsahilaleb' xch'ool sa'eb' li k'ayiil, jo'wi' naq «Tzolonel» te'yehe'q re xb'aaneb' li tenamit.

8“A'ut laa'ex mixk'ul eech'ool xk'ab'a'inkil aj tzolonel, xb'aan naq jun ajwi' laj Tzolol eere ut chejunilex laa'ex eeriitz'in eerib'. 9Maa'ani cheye wi' «Qayuwa'» sa' ruuchich'och', xb'aan naq jun ajwi' leeYuwa', a' li wank sa' choxa. 10Chi moko chixk'ul eech'ool xk'ab'a'inkil aj k'amol b'e, xb'aan naq jun ajwi' laj K'amol eeb'e, a'an li Kriist. 11Li ani nim xwankil sa' eeyanq a'anaq aj k'anjel cheru. 12Li ani naxnimob'resi rib', taakub'siiq xwankil, ut li ani naxkub'si rib', taaterq'usiiq xwankil.

Wuqub' sut ke'q'use'k eb' laj tz'iib' ut eb' laj pariseey

(Lk 11,39-48, 52)

13“Ra chaalel sa' eeb'een laa'ex aj tz'iib' ut aj Pariseey aj ka'pak'al uhex: neketz'ap li xnimajwal wankilal li choxa chiruheb' li tenamit! Xb'aan naq ink'a' nekex'ok laa'ex, ut nekeram chiruheb' li neke'raj raj ok.#23,13 Li raqal 14: Ra chaalel sa' eeb'een laa'ex aj tz'iib' ut aj pariseey aj ka'pak'al uhex, li nekechoy xsa' li xjunkab'aleb' li xmalka'an ut najt roq li tijok nekeb'aanu yal re xmuqb'al a'an! Jo'kan naq jwal ra teetoj wi' rix a'an, moko tz'aqal xcha'al ta li Evangelio, a'an b'an yal xtiqb'al aj chik li raqal 13 sa' xk'ab'a' Mk 12,40.

15“Ra chaalel sa' eeb'een laa'ex aj tz'iib' ut aj Pariseey aj ka'pak'al uhex: nekesuti li palaw ut li ruuchich'och' re xsik'b'al ani taa'okenq cherix ut, naq ak xetaw chaq, nekek'e cho'q ralal li xb'alb'a ka' sut chik cheru laa'ex!

16“Ra chaalel sa' eeb'een laa'ex aj k'amol b'e, ink'a' nekex'ilok ut nekeye: «Wi junaq tixpatz' li rochoch li Yos sa' jurament, a'an maak'a' reek'; a'ut li tixpatz' li x'oor li rochoch li Yos sa' jurament, a'an tento tixb'aanu li k'aru xye». 17Maak'a' eena'leb' ut mutz'ex, xb'aan naq b'ar wank li q'axal nim xwankil: ma li oor malaj li rochoch li Yos li nasantob'resink re li oor? 18Jo'kan ajwi' nekeye: «Wi junaq tixpatz' sa' jurament li artal, a'an maak'a' reek'; a'ut li ani tixpatz' sa' jurament li mayej li wank sa' xb'een li artal, a'an tento tixb'aanu li k'aru xye». 19Ex mutz'! B'ar wank li q'axal nim xwankil: ma li mayej malaj li artal li nasantob'resink re li mayej? 20Li ani tixpatz' sa' jurament li artal, tixpatz' ajwi' chixjunil li wank sa' xb'een. 21Li tixpatz' sa' jurament li rochoch li Yos, naxpatz' ajwi' li Yos li nawank chisa'. 22Ut li ani tixpatz' sa' jurament li choxa, naxpatz' li xk'ojarib'aal li Yos jo' ajwi' Li k'ojk'o sa' xb'een.

23“Ra chaalel sa' eeb'een laa'ex aj tz'iib' ut aj Pariseey aj ka'pak'al uhex: neketoj li xlajeetqil li isk'i'ij, li anis ut li komino, ut xekanab' xpaab'ankil li q'axal nim xwankil sa' li Chaq'rab': a' li tiikilal, li uxtaanank ut li paab'aal! Chixjunil a'in tento raj xeb'aanu, ab'an ink'a' raj xekanab' xb'aanunkil li junch'ol chik. 24Ex aj k'amol b'e ink'a' nekex'ilok! Neketz'ileb' li kok' suq ut nekenuq' li kameey!

25“Ra chaalel sa' eeb'een laa'ex aj tz'iib' ut aj Pariseey aj ka'pak'al uhex: nekech'aj rix li sek' ut li pulaat, a'ut li xsa' nujenaq chi elq' ut maa'usilal! 26At aj Pariseey ink'a' nakat-ilok, ch'aj xb'enwa xsa' li sek' re naq ch'ajb'ilaq ajwi' li rix!

27“Ra chaalel sa' eeb'een laa'ex aj tz'iib' ut aj Pariseey aj ka'pak'al uhex, xb'aan naq chanchanex li muqleb'aal kamenaq chuninbil: ch'ina'us rilb'aleb' li rix, ab'an chisa' nujenaqeb' chi xb'aqel kamenaq ut chixjunil li k'a'aq re ru chi tz'ajnil! 28Jo'kan ajwi' laa'ex, tiik eech'ool yal chiruheb' li poyanam, ab'an chisa' nujenaqex chi b'alaq' ut maa'usilal!

29“Ra chaalel sa' eeb'een laa'ex aj tz'iib' ut aj Pariseey aj ka'pak'al uhex, xb'aan naq nekeyiib' xmuqleb'aaleb' li propeet ut nekerutz'u'uji ru li xmuqleb'aaleb' li tiikeb' xch'ool, 30ut nekeye: «Wi ta xoowank chaq sa' xkutaneb' li qana' qayuwa', ink'a' raj xoo'okenk chirixeb' chi xkamsinkileb' li propeet!». 31Chi jo'kan nekejit eerib' ut nekeye naq laa'ex ralal xk'ajolex li xe'kamsink reheb' li propeet. 32Chenujob'resi b'i' li xb'isleb' leena' leeyuwa'!#23,32 Eb' laj tz'iib' ut eb' laj pariseey te'xnujob'resi li xb'isleb' li xna' xyuwa'eb' naq te'xkamsi li Jesus (cf. 21,38s).

Li rahilal chaalel sa' xb'eeneb' laj tz'iib' ut eb' laj pariseey

(Lk 11,49-51)

33“Ex k'anti', ralex q'anb'olay! Chanru naq tex'eleliq chiru li tojb'amaak sa' xb'alb'a? 34Jo'kan utan laa'in tintaqlaheb' li propeet eerik'in, eb' laj k'ehol na'leb' ut eb' laj tz'iib': wan teekamsiheb' ut teek'eheb' chiru krus, wankeb' chik teerapeb' chi tz'uum sa'atqeb' leech'utleb'aal kab'l ut teesik'eb' sa' junjunq chi tenamit re xchapb'aleb', 35re naq taachalq sa' eeb'een chixjunil li xkik'el li tiikeb' xch'ool li kihoye'k sa' ruuchich'och' chalen chaq sa' li xkamik laj Abel li tiik xch'ool toj rik'in li xkik'el laj Sakarías, ralal laj Barakías, li kekamsi sa' xyanq rochoch li Yos rik'in li artal. 36Relik chi yaal ninye eere: chixjunil a'in tixk'am chaq tojb'amaak sa' xb'een li tenamit a'in.

Kiraho'k xch'ool li Jesus chirix Jerusalén

(Lk 13,34-35)

37“At Jerusalén, Jerusalén, li nakakamsiheb' li propeet ut nakakuteb' chi pek li taqlanb'ileb' chaq aawik'in! K'ajo' naq xwaj raj xch'utub'ankileb' laawalal aak'ajol, kama' junaq kaxlan naxkupuheb' li ral rub'el li xxik', ut ink'a' xeraj! 38Ut anaqwan nakirirnak aj chik taakanab'aaq leerochoch! 39Ninye eere naq ink'a' chik teeril wu toj reetal teeye: «Usilaatinanb'il li xchalk sa' xk'ab'a' li Qaawa'!»”.#23,39 Sal 118,26.

Currently Selected:

Mt 23: QQC

Highlight

Copy