Lk 8
8
Eb' li ixq li neke'ochb'eenink re li Jesus
1Chirix chik a'in li Jesus kixb'eeniheb' li tenamit ut eb' li k'aleb'aal, yo chi xpuktesinkil li xchaab'il esil li xnimajwal awab'ejihom li Yos, rochb'eeneb' li Kab'laju 2jo'wi' eb' li ixq li ke'isiik maa'usej musiq'ej rik'ineb' ut ke'k'irtasiik li xyajeleb': lix María, xMagdalena nayeemank re, rik'in a'an elenaqeb' wuqub' chi maa'us aj musiq'ej, 3lix Jwana, rixaqil laj Kusa aj tenq' re laj Herodes, lix Susana ut naab'aleb' chik li neke'tenq'ank reheb' sa' li xjunkab'laleb'.
Li jaljookil ru aatin chirix laj awinel
(Mt 13,1-23; Mk 4,1-20)
4Ke'ch'utlaak naab'al li poyanam, chalenaqeb' chaq sa'atqeb' li junjunq chi tenamit. Toja' naq kixye li Jesus sa' jaljookil ru aatin: 5“Ki'elk jun aj awinel chi rawb'al li riyaj. Ut naq yo chi awk, wan iyaj kinaqk chire li b'e: a'an kiyeq'mank, ut ke'chalk eb' li xul neke'rupupik chiru choxa ut ke'xwa'. 6Wan chik kinaqk sa' pek ru, ut naq kimoqk, kichaqik, xb'aan naq maak'a' rax ch'och'. 7Wan ajwi' iyaj kinaqk sa' xyanqeb' li k'ix: jun moqik rochb'eeneb' a'an, ut kinat'e'k xb'aan. 8Wan chik iyaj kinaqk sa' chaab'il ch'och': kimoqk ut ki'uuchink chi o'taqk'aal”.
Naq ak xye a'in, li Jesus ki'aatinak chi kaw chi kama'in: “Li wank xxik re ab'ink, chi'ab'inq”, chan.
9Eb' li xtzolom ke'xpatz' re xyaalalil li jaljookil ru aatin a'in, 10ut a'an kixye: “K'eeb'il eere laa'ex xnawb'al xyaalal eb' li muqmuukil na'leb' chirix li xnimajwal awab'ejihom li Yos, ab'an reheb' li junch'ol chik ka'ajwi' sa' jaljookil ru aatin nak'eemank reheb': re naq us ta te'iloq maak'a' te'ril, us ta te'ab'inq maak'a' te'xtaw ru.#8,10 Is 6,9-10.
11“A'an a'in xyaalal li jaljookil ru aatin: li iyaj a'an li Raatin li Yos. 12Li ke'naqk chire li b'e a'aneb' li ke'ab'ink re, ab'an moqon nachalk laj tza ut naxmaq' li Aatin sa' xch'ooleb' re naq ink'a' te'xpaab' ut te'kole'q. 13Li ke'naqk sa' pek ru a'aneb' li neke'rab'i li Aatin ut neke'xk'ul chi saheb' sa' xch'ool, ab'an maak'a'eb' xxe' rik'ineb': jun k'amok ajwi' neke'xpaab' ut, naq nachalk li aaleek, neke'ch'inank xch'ool. 14Li kit'ane'k sa' li k'ix ru a'aneb' li ke'rab'i li Aatin, ab'an neke'xnat' sa' b'e rik'in li k'iila k'a'uxl, rik'in li b'ihomal ut li xsahilal li ruuchich'och', ut chi jo'kan ink'a' naq'ano'k li ru. 15Li kit'ane'k sa' chaab'il ch'och' a'aneb' li neke'ab'ink re li Aatin ut neke'xk'uula sa' chaab'ilal ut chi anchaleb' xch'ool, ut neke'uuchink xb'aan naq junelik neke'xkuy xk'anjelankil ru.
Li jaljookil ru aatin chirix li saqenk
(Mt 5,15; 10,26; Mk 4,21-25)
16“Maajun tixloch junaq saqenk ut tixmuq ta rub'el junaq sek' malaj tixk'e ta rub'el li ch'aat; tixk'e b'an sa' xna'aj re naq saqenk te'ril eb' li te'ok. 17Xb'aan naq maak'a' wank chi muqmu chi ink'a' ta taatehe'q ru, ut maak'a' wank chi tz'aptz'o ru chi ink'a' ta taanawmanq ut taa'elq chi kutankil.
18“Chek'e b'i' reetal chanru nekex'ab'ink, xb'aan naq ani wank k'aru re, ruk' chik taak'eemanq re; ut ani maak'a' wank re, a' ajwi' li k'aru wank re naq naxk'oxla, taamaq'manq chiru”.
Li xna' ut eb' li riitz'in li Jesus
(Mt 12,46-50; Mk 3,31-35)
19Ke'wulak wan wi' li Jesus li xna' ut eb' li riitz'in,#8,19 Cf. Mt 12,46. ab'anan ink'a' ke'ru chi jilok toj chi xk'atq xb'aaneb' li tenamit. 20Kiyehe'k ut resil re:
—Laana' ut eb' laawiitz'in wankeb' chirix kab'l, ut te'raj aawilb'al.
21Kichaq'ok li Jesus ut kixye:
—Linna' ut eb' li wiitz'in a'aneb' li neke'ab'ink re li Raatin li Yos ut neke'xk'anjela ru.
Naq kich'anaak li kaqsut-iq'
(Mt 8,23-27; Mk 4,35-41)
22Sa' jun li kutan kitaqe'k li Jesus sa' jun li jukub' rochb'eeneb' li xtzolom:
—Numenqo junpak'al li palaw, chan reheb'.
Ut koheb'. 23Naq yookeb' chi xik chiru ha', li Jesus kikub'eek xwara. Toja' naq kichalk jun kaqsut-iq' sa' xb'een li palaw, ak yo chi nujak chi ha' li jukub' ut q'axal xiw xiw wankeb'. 24Ke'jilok chi xk'atq, ke'rajsi ut ke'xye re:
—At Tzolonel, at Tzolonel, oso'k qe!
Ki'ajk ru li Jesus ut kixq'us li iq' jo'wi' li xkaw oq li ha'; toja' naq ke'ch'anaak ut kichalk li tuqtuukilal. 25Ut kixye reheb':
—B'ar wank leepaab'aal?
Te'xiwaq ut sachsookeb' xch'ool naq ke'xye chirib'ileb' rib':
—Ani put a'in naq wank xwankil sa' xb'een li iq' ut li ha', ut neke'paab'ank chiru?
Laj Gerasa eechaninb'il xb'aan laj tza
(Mt 8,28-34; Mk 5,1-20)
26Ke'wulak sa' xch'och'eb' laj Gerasa, li wank sa' xka'yab'aal Galilea. 27Naq kox'elq li Jesus chi ch'och'el, kolk'ule'q xb'aan jun li winq kichalk chaq sa' li tenamit. Li winq a'an eechaninb'il xb'aaneb' maa'us aj musiq'ej, ut chalen najter ink'a' chik naxk'e raq' chirix, chi moko nawank sa' kab'l, junes sa'eb' li muqleb'aal kamenaq nakanaak.
28Naq kiril li Jesus, kixkut rib' chi roq ut kixjap re chi kaw xyaab' xkux:
—K'aru wank we aawik'in, at Jesus, Ralalat li Nimajwal Yos? Nintz'aama chawu, minaarahob'tesi!
29Li tz'ajn aj musiq'ej kixye chi jo'kan xb'aan naq kitaqlaak chi elk rik'in li winq: ut a'in k'iila sut ki'eechaniik xb'aan ut, us ta k'aak'alenb'il ut b'ak'b'o rik'in kareen ut chapleb', ab'anan naxt'upi li b'ak'b'o wi' ut natiikisiik xb'aan laj tza sa' junesal na'ajej.
30Li Jesus kixpatz' re:
—Ani laak'ab'a'?
Kichaq'ok a'an ut kixye:
—Jun tuub' link'ab'a'.
Kixye chi jo'kan xb'aan naq naab'aleb' aj tza okenaqeb' rik'in. 31Eb' laj tza ke'relaji ru li Jesus naq ink'a' te'taqlaaq sa' xb'alb'a.
32Wankeb' aran jun nimla ch'uut chi aaq, yookeb' chi ichajib'k chiru li tzuul; ut eb' laj tza ke'relaji ru naq tixkanab'eb' chi ok rik'ineb' li aaq. Ut kixkanab'eb' chi xik. 33Naq ke'elk li maa'usej musiq'ej rik'in li winq, koxe'okaq sa'eb' li aaq; ut chixjunil li xk'ihaleb' ke'xkut rib' sa' xteram li uul, jun t'anikeb' sa' li palaw, ut aran ke'kamk.
34Naq eb' laj ilol aaq ke'ril li kik'ulmank, ke'elelik, koxe'xye resil sa' li tenamit ut sa'atqeb' li k'aleb'aal. 35Ke'elk ut li poyanam chi rilb'al li kik'ulmank, ke'wulak wan wi' li Jesus ut koxe'xtaw li winq li ke'elk wi' eb' laj tza, chunchu, chi roq li Jesus, tiqto ut tuqtu chik li xjolom. Ut ke'ok xxiw.
36Eb' li ke'ilok re ke'xseeraq'i reheb' chanru naq xkole'k li winq li xwank maa'us aj musiq'ej rik'in. 37Toja' naq chixjunil li k'iila poyanam li wankeb' sa' xsutam Gerasa ke'relaji ru li Jesus naq chi'elq sa' xyanqeb', xb'aan naq k'ajo'eb' xxiw. Kitaqe'k li Jesus sa' jun li jukub' ut kiq'ajk. 38Li winq li xe'elk wi' laj tza kixtz'aama chiru wank rik'in; ab'anan kichaq'rab'iik ut kiyehe'k re:
39—Sutq'in sa' laawochoch ut seeraq'i jo'nimal xb'aanu aawe li Yos, chu'uxk re.
Ut a'an koho sa' chixjunil li tenamit, yo chi xpuktesinkil resil li ki'uxk re xb'aan li Jesus.
Li xrab'in laj Jairo ut li ixq li kixch'e' li raq' li Jesus
(Mt 9,18-26; Mk 5,21-43)
40Naq kisutq'iik chaq li Jesus, kik'ule'k xb'aaneb' li k'iila tenamit, xb'aan naq chixjunileb' yookeb' royb'eninkil. 41Toja' naq kichalk jun li winq, aj Jairo xk'ab'a', xb'eenil li ch'utleb'aal kab'l. A'an kolxkut rib' chi roq li Jesus ut kixtz'aama chiru naq chi'okaq sa' rochoch. 42Xb'aan naq wank jun xrab'in, jun ajwi' chiru, aj kab'laju chihab' tana, ut kamk re.
Naq yo chi xik li Jesus, eb' li tenamit yookeb' chi xlaatz'ankil. 43Toja' naq jun li ixq yaj (xb'aan naq nakub'eek xkik'el chalen chaq kab'laju chihab' ut maa'ani kiruhank chi k'irtasink re) 44kijilok chaq chi ixb'ej ut kixch'e' re li raq' li Jesus. Ut chi junpaat kixkanab' elk li xkik'el. 45Kixye ut li Jesus:
—Ani xch'e'ok we?
—Moko laa'o ta, chankeb' chixjunileb'.
Toja' naq kixye laj Pedro:
—At Tzolonel, eb' li tenamit yookeb' chalaatz'ankil ut chapitz'b'al.
46Ut li Jesus kixye wi' chik:
—Wank ani xch'e'ok we xb'aan naq xweek'a naq jun wankilal x'elk wik'in.
47Kiril li ixq naq kinawmank li xb'aanu; jo'kan naq taasiksotq naq kijilok chaq, koxkut rib' chi roq li Jesus ut kixye reheb' chixjunil li poyanam k'a'ut naq xch'e' ut chanru naq xk'iraak chi junpaat.
48—At inrab'in, laapaab'aal xkolok aawe. Ayu sa' tuqtuukil usilal, chu'uxk re xb'aan li Jesus:
49Toj yo ajwi' chi aatinak li Jesus, naq kik'ulunk jun xtaql li xb'eenil li ch'utleb'aal kab'l chi xyeeb'al:
—Laarab'in ak xkamk. Maach'i'ch'i'i chik laj Tzolonel.
50Ab'an li Jesus kirab'i a'in ut kixye re:
—Matxiwak, ka'ajwi' naq wanq aapaab'aal ut taakole'q.
51Ut naq kiwulak sa' kab'l, maa'ani kixkanab' chi ok chirix, ka'ajwi' laj Pedro, laj Jwan, laj Santiago ut li xna' xyuwa' li ixqa'al. 52Chixjunileb' neke'huyhutk chi yaab'ak, ab'an li Jesus kixye:
—Mexyaab'ak: moko kamenaq ta, yal yo chi wark.
53Ut eb' a'an ke'ok chi xse'enkil xb'aan naq neke'xnaw naq xkamk.
54Li Jesus kixchap chi ruq' li ixqa'al ut kixye chi kaw xyaab' xkux:
—At ch'ina ixqa'al, waklin!
55Toja' naq kisutq'iik chaq wi' chik li xmusiq' ut tikto kiwakliik; ut li Jesus kixye reheb' naq te'xk'e chi wa'ak li ixqa'al.
56K'ajo' naq ke'sachk xch'ool li xna' xyuwa' li ixqa'al. Ab'an li Jesus kixchaq'rab'iheb' naq maa'ani aj e che'xye li kik'ulmank.
Currently Selected:
Lk 8: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
