Lk 22
22
VI. LI XRAHILAL UT XKAMIK LI JESUS (22,1—23,56)
Ke'xk'uub' xchapb'al li Jesus
(Mt 26,1-5, 14-16; Mk 14,1-2, 10-11; Jn 11,47-53)
1Taanach'oq chaq li Paswa, li ninq'e nawa'e'k wi' li wa ink'a' yuub'il. 2Eb' li xb'eenil aj tij ut eb' laj tz'iib' yookeb' chi xsik'b'al chan raj ru naq te'xkamsi li Jesus xb'aan naq neke'xxiwa ruheb' li tenamit.
3Toja' naq ki'ok laj tza rik'in laj Judas, aj Iskariote xk'ab'a', a'an jun reheb' li Kab'laju. 4Koho chi aatinak rik'ineb' li xb'eenil aj tij ut eb' li xjolomileb' laj puub', chan raj ru naq tixq'axtesi reheb'. 5Eb' a'an ke'saho'k sa' xch'ool ut ke'xk'uub' xk'eeb'al xtumin. 6Laj Judas kixk'ul xch'ool ut ki'ok chi xsik'b'al jo'q'e tixk'e rib' xq'axtesinkil sa' ruq'eb' chi ink'a' te'xnaw eb' li tenamit.
Li Paswa
(Mt 26,17-19; Mk 14,12-16)
7Kiwulak xkutankil nawa'e'k wi' li wa ink'a' yuub'il, naq namayejamank li karneer re li Paswa. 8Li Jesus kixtaqla laj Pedro ut laj Jwan:
—Ayuqex ut kawresihomaq chaq li Paswa re naq toxqatzeka, chan reheb'.
9Eb' a'an ke'xye re:
—B'ar taawaj toxqakawresi?
10Kixye reheb':
—Naq tex'ok sa' li tenamit, teek'ul jun li winq paqpooq chaq jun kuk chi ha' xb'aan. Taaqehomaq toj sa' li kab'l b'arwi' tox'okaq, 11ut cheyehaq re laj eechal kab'l: «B'ar wank li na'ajej tintzeka wi' li Paswa wochb'eeneb' lintzolom? chan chaq laj Tzolonel», cha'qex re. 12Ut a'an tixk'ut cheru, sa' xkab' xk'ojaril li kab'l, jun nimla na'ajej, ak wank chixjunil xhilob'aal. Aran texkawunq.
13Koheb' ut koxe'xtaw jo' chanru kiyehe'k reheb' xb'aan li Jesus, ut ke'xkawresi li Paswa.
14Naq kiwulak xhonalil, kik'ojlaak li Jesus sa' meex rochb'eeneb' li apóstol 15ut kixye reheb':
—K'ajo' naq xinrahi xtzekankil li Paswa a'in wochb'eenex, rub'elaj naq tink'ul li rahilal! 16Xb'aan naq ninye eere naq ink'a' chik tintzeka toj reetal toxtz'aqloq ru sa' li xnimajwal awab'ejihom li Yos.#22,16 Li Paswa toxtz'aqloq ru rajlal sa' li “xloq'laj Wa li Qaawa'”, Ewkaristiiy ajwi' nayeemank re, ut chirix a'in chi junajwa sa' roso'jikeb' li kutan.
17Toja' naq kixchap jun li uk'leb'-sek', kiyoxink ut kixye:
—K'ulumaq a'in ut jek'ihomaq sa' eeyanq, 18xb'aan naq ninye eere naq chalen anaqwan ink'a' chik twuk' li xya'al li uub' toj reetal taachalq li xnimajwal awab'ejihom li Yos.
Li xloq'laj Wa li Qaawa'
(Mt 26,26-28; Mk 14,22-24; 1 Ko 11,23-25; Jn 13,21-30)
19Chirix chik a'an kixchap li wa, kiyoxink, kixjachi ut kixk'e reheb':
—A'an a'in lintz'ejwal q'axtesinb'il sa' eek'ab'a'. Cheb'aanu a'in re xnimankil injultikankil.
20Jo'kan ajwi' kixb'aanu rik'in li uk'leb'-sek', naq ak xraqe'k chi wa'ak:
—Li sek' a'in a'an li Ak' Sumwank sa' xk'ab'a' linkik'el hoyb'il sa' eek'ab'a' laa'ex. 21Waye' wik'in sa' xb'een li meex li ruq' li taaq'axtesinq we. 22Xb'aan naq li K'ajolb'ej xik re jo' chanru kiteneb'aak sa' xb'een, ab'an ra chaalel sa' xb'een li winq a'an li taaq'axtesinq re!
23Toja' naq ke'ok chi xpatz'inkil chirib'ileb' rib' ani reheb' li taab'aanunq a'an.
Ani nim xwankil
(Mt 20,25-27; 19,28; Mk 10,42-44)
24Kiwank ajwi' jun wech'ij ib' sa' xyanqeb', ani reheb' nimaq xwankil. 25Kixye ut li Jesus reheb': “Eb' li awab'ej reheb' li tenamit neke'numtaak sa' xb'eeneb'; ut eb' li neke'xk'e xwankil sa' xb'eeneb', aj b'aanuhom usilal nayeemank reheb'. 26Ab'anan moko jo'kanaq ta sa' eeyanq laa'ex: li nim xwankil sa' eeyanq kama'aq li jwal saaj, ut li najolomink kama'aq laj k'anjel. 27Xb'aan naq ani li q'axal nim xwankil? Ma li k'ojk'o sa' meex malaj li nak'anjelak chiru? Ma ink'a' tab'i' li k'ojk'o sa' meex? A'ut laa'in wankin sa' eeyanq jo' li yo chi k'anjelak.
28“Laa'ex xekuy wank wochb'een sa' li xyalb'al wix: 29ut laa'in texinxaqab' chi awab'ejink, jo' naq linYuwa' xinxxaqab' chi awab'ejink, 30re naq texwa'aq tex'uk'aq chire linmeex sa' linnimajwal wankilal ut texk'ojlaaq sa'eb' li k'ojarib'aal chi raqok aatin sa' xb'eeneb' li kab'laju xteepal aj Israel”.
Kixye resil naq laj Pedro taatik'ti'iq
(Mt 26,31-35; Mk 14,27-31; Jn 13,36-38)
31Kixye ajwi' li Qaawa':
—At Simón, at Simón! Chanawaq naq laj tza ak xpatz' chaq xwankil re naq texchiq'chiq'iiq kama' li triiw. 32A'ut laa'in xintijok chawix re naq ink'a' taalajq laapaab'aal. Ut laa'at, naq tatsutq'iiq chaq wik'in, chakawub'resi xch'ooleb' laawas aawiitz'in.#22,32 Laj Pedro taatik'ti'iq; ab'an moqon taasutq'iiq chaq rik'in li Jesus, ut li xpaab'aal tixkawub'resi xch'ooleb' li riitz'in sa' li paab'ank (cf. Mt 16,17-19; Jn 21,15-17).
33Kixye ut laj Pedro re:
—At Qaawa', yo'oon wankin chi xik chawix toj sa' li tz'alam jo' ajwi' chi kamk!
34A'ut li Jesus kixye:
—At Pedro, ninye aawe: toj maji'aq taayaab'aq hoon li tzo' kaxlan, akaq xaye ox sut naq ink'a' nakanaw wu.
35Ut kixye reheb' chixjunil:
—Naq xexintaqla chi maak'a' eeb'ools, chi maak'a' eechampa, chi moko eexaab',#22,35 Lk 9,3. ma wank k'aru xmajelo'k eere?
Ke'chaq'ok ut ke'xye:
—Maak'a'.
36Ut kixye reheb':
—Anaqwan li ani wank xb'ools chixk'amaq; jo'kanaq ajwi' li ani wank xchampa. Ut li ani maak'a' xch'iich' xk'ayihaq li raq' ut xloq'aq junaq xch'iich'.#22,36 Li Jesus naxye reheb' li apóstol naq chalen anaqwan tento naq yo'oon wanqeb', xb'aan naq te'xk'ul rahilal xb'aaneb' chixjunil (cf. 12,51; Mt 10,34). 37Ninye eere naq tento taatz'aqloq ru wik'in li tz'iib'anb'il chaq sa' li Santil Hu: «Xe'xk'e sa' ajl sa' xyanqeb' li ink'a' useb' xch'ool».#22,37 Is 53,12. Xb'aan naq tz'aqlok re li tz'iib'anb'il chaq chiwix.
38Ke'xye eb' a'an:
—At Qaawa', wiib' li ch'iich' wankeb' arin.
Ut a'an kixye reheb':
—Tz'aqal li xinye.#22,38 Li Jesus kixye a'in xb'aan naq eb' li apóstol ink'a' neke'xtaw ru.
Li Jesus kitijok Getsemaní
(Mt 26,36-46; Mk 14,32-42)
39Naq li Jesus ki'elk aran, koho sa' xb'een li tzuul Olivos jo' k'aynaq xb'aanunkil, ut kitaaqeek xb'aaneb' li xtzolom. 40Naq kiwulak aran, kixye reheb':
—Tijonqex re naq mext'ane'k sa' li aaleek.
41Kirisi rib' sa' xyanqeb' ut koho jo' xnajtil nakute'k wi' junaq pek; kixwiq'ib' rib' chi tijok ut kixye: 42“At inYuwa', wi taawaj, chawisi wik'in li sek' a'in;#22,42 Cf. Mt 26,39. ab'an ink'a' chi'uxmanq li nawaj laa'in, a' b'an laawajom laa'at”.
43Toja' naq jun li ánjel kichalk chaq sa' choxa ut kixk'ut rib' chiru li Jesus, yo chi xk'eeb'al xkawub' xch'ool. 44Ut naq yo chi k'aachi'ik, kaw chik ki'ok chi tijok: li xtiqob' kama' ninqi tz'uqul chi kik' naq kit'ane'k sa' ch'och'.
45Sa' xraqik chi tijok kixaqliik li Jesus, koho wankeb' wi' li xtzolom ut kixtaweb' chi wark xb'aan xrahilaleb' xch'ool; 46ut kixye reheb':
—K'a' naq yookex chi wark? Waklinqex ut tijonqex re naq mext'ane'k sa' li aaleek.
Kichape'k li Jesus
(Mt 26,47-56; Mk 14,43-50; Jn 18,3-11)
47Toj yo ajwi' chi aatinak naq xaqaamileb' li k'iila tenamit chiruheb', ut jun reheb' li Kab'laju, a' li nayeemank re laj Judas, k'amol b'e chaq chiruheb'. A'an kijilok chi xk'atq li Jesus chi xtz'ub'al ru. Ut li Jesus kixye re:
48—Judas, ma rik'in xtz'ub'al ru li K'ajolb'ej taaq'axtesi?
49Naq eb' li rochb'een li Jesus ke'ril li ok re chi xk'ulb'al, ke'xye re:
—At Qaawa', ma took'ehoq chi ch'iich'?
50Ut jun reheb' kixtiq' li xmoos li xyuwa'il aj tij ut kixch'ot li xxik li wank sa' xnim. 51Ki'aatinak li Jesus ut kixye:
—Tz'aqalaq a'in, kanab'omaq!
Ut kixch'e' li xxik ut kixk'irtasi.
52Toja' naq kixye li Jesus reheb' li xb'eenil aj tij, eb' laj k'amol xb'eheb' laj k'aak'alehom rochoch li Yos jo' ajwi' eb' li cheekel winq li xe'chalk chi chapok re:
—Ma jo' nachape'k junaq aj elq' naq xexchalk rik'in ch'iich' ut che'? 53Rajlal kutan xinwank chaq sa' eeyanq sa' rochoch li Yos, ut ink'a' xetaqsi chaq leeruq' chinchapb'al; ab'anan a'an a'in leehonal, naq nanumtaak xwankil li aak'ab'.
Kitik'ti'ik laj Pedro
(Mt 26,69-75; Mk 14,66-72; Jn 18,15-18, 25-27)
54Toja' naq ke'xchap li Jesus, ke'xk'am ut ke'roksi sa' rochoch li xyuwa'il aj tij, ut laj Pedro najt rik'in naq yo chi xtaaqenkil. 55Ke'xtz'ab' xxameb' sa' xyi li neb'aal ut ke'k'ojlaak sa' komonil; kik'ojlaak ajwi' laj Pedro sa' xyanqeb'. 56Toja' naq jun li moos ixq ki'ilok re, naq k'ojk'o chire li xam; kixka'ya ut kixye:
—A'in ajwi' rochb'een chaq li Jesus.
57Ab'an a'an kitik'ti'ik:
—At ixq, ink'a' ninnaw ru a'an.
58Junpaataq chik a'an, ki'ile'k xb'aan jun li winq:
—Laa'at ajwi' jun reheb' a'an, chu'uxk re.
Ut laj Pedro kixye:
—At winq, maawa'in!
59Jun honal tana xnumik a'an naq jun chik ki'ok chi yehok chi kaw:
—Relik chi yaal naq a'in rochb'een ajwi' chaq li Jesus, xb'aan naq aj Galilea.
60Kixye laj Pedro:
—At winq, ink'a' ninnaw k'aru yookat chi xyeeb'al.
Ut chi junpaat, toj yo ajwi' chi aatinak laj Pedro, naq kiyaab'ak jun li tzo' kaxlan. 61Li Qaawa' kixsutq'isi rib', kixka'ya laj Pedro, ut a'an kinaqk sa' xch'ool li kiyehe'k re xb'aan li Qaawa': “Toj maji'aq taayaab'aq hoon li tzo' kaxlan, akaq ox sut xaye naq ink'a' nakanaw wu”. 62Ut ki'elk chirix kab'l: k'ajo' naq kiyot'e'k chi yaab'ak.
Li Jesus kihob'e'k ut kisak'e'k
(Mt 26,67-68; Mk 14,65)
63Eb' li winq li yookeb' chi k'aak'alenk re li Jesus ke'ok chi reetz'unkil ut chi xteninkil; 64ke'xtz'ap li xnaq' ru ut ke'xpatz' re:
—Q'ehi: ani xsak'ok aawe?
65Ut naab'al chik k'a'aq re ru neke'xye re xmajewankil.
Li Jesus chiruheb' li xninqal ru aj raqol aatin
(Mt 26,57-66; 27,2; Mk 14,53-64; 15,1)
66Naq kikutano'k, ke'xch'utub' rib' li xcheekel winqilaleb' li tenamit, li xb'eenileb' aj tij ut eb' laj tz'iib'; ke'xk'am li Jesus sa' li xnimal raqleb'aal aatin#22,66 A'an li Sanedrín. 67ut ke'xye re:
—Wi laa'at li Kriist, ye qe.
Kichaq'ok a'an ut kixye reheb':
—Wi tinye eere, moko tineepaab' ta; 68ut wi laa'in tinpatz'oq eere, ink'a' ajwi' tineesume. 69Chalen ut anaqwan li K'ajolb'ej taak'ojlaaq sa' xnim uq' li Nimajwal Yos.
70Toja' naq ke'xye chixjunileb':
—Ma laa'at Ralal li Yos chi jo'kanan?
Kixsumeheb':
—Yaal xeye naq laa'inin, chan.
71Ut eb' a'an ke'xye:
—K'a' chik te'ok wi' qe li testiiw? Laa'o ajwi' xoo'ab'ink re li k'aru x'elk chi xtz'uumal re.
Currently Selected:
Lk 22: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
