Jn 6
6
Li Jesus kixk'eheb' chi wa'ak oob' mil chi winq
(Mt 14,13-21; Mk 6,30-44; Lk 9,10-17)
1Chirix chik a'in koho li Jesus junpak'al li palaw re Galilea, Tiberias ajwi' nayeemank re li palaw a'an; 2ut naab'al li tenamit ke'taaqenk re xb'aan naq neke'rilatq li xninqal ru eetalil kilajxb'aanu rik'ineb' li yaj. 3Toja' naq kitaqe'k li Jesus chiru tzuul ut kik'ojlaak aran rochb'eeneb' li xtzolom. 4Taanach'oq chaq li Paswa, li xninq'eheb' laj Judiiy. 5Naq kixtaqsi li rilob'aal, li Jesus kirileb' li k'iila tenamit yookeb' chi chalk rik'in, ut kixye re laj Felipe:
—B'ar tooloq'oq wa re te'wa'aq eb' a'in?
6Kixye a'in yal re xyalb'al rix, xb'aan naq ak naxnaw chi us k'aru tixb'aanu. 7Kichaq'ok laj Felipe:
—Lajeek'aal (200) tumin chi wa ink'a' taatz'aqloq re naq te'tz'aq b'ayaq chi xjunjunqaleb'.
8Toja' naq jun reheb' li xtzolom, a' laj Andrés riitz'in laj Simón Pedro, kixye re:
9—Wank arin jun li al wank oob' xwa ut wiib' xkar; ab'an k'a' taxaq tixb'aanu a'in re li k'iila tenamit?
10Kixye li Jesus:
—K'ehomaqeb' chi hilank li tenamit.
K'ajo' li rax pim sa' li na'ajej a'an. Ke'hilank eb' li winq: wankeb' tana oob'aq mil. 11Toja' naq li Jesus kixchap eb' li wa, kiyoxink ut kixjek'i reheb' li k'ojk'ookeb' aran. Jo'kan ajwi' kixb'aanu rik'ineb' li kar; kixk'e reheb' jo'k'ihal li ke'raj. 12Naq ke'k'ojlaak xch'ool, kixye reheb' li xtzolom:
—Xokomaq li rela' li wa, re naq maak'a' taatz'eqmanq.
13Ke'xxok ut ke'xnujob'resi kab'laju chakach, junes rela' li oob' chi wa li ke'xwa'. 14Naq eb' li tenamit ke'ril li xnimal eetalil kixb'aanu li Jesus, ke'xye:
—Relik chi yaal naq a'in li propeet li tento taak'ulunq sa' ruuchich'och'.
15A'ut li Jesus kixk'e reetal naq chalkeb' re chi xk'amb'al re te'xk'e cho'q awab'ej; jo'kan naq ki'elelik wi' chik sa' li tzuul xjunes.
Li Jesus kib'eek chiru li palaw
(Mt 14,22-27; Mk 6,45-52)
16Naq ki'ewuuk, ke'kub'eek eb' li xtzolom chire li palaw 17ut ke'ok sa' jun li jukub', yookeb' chi xik junpak'al li palaw, toj Kafarnaúm. Ak q'oqyink chik chi us ut li Jesus maji' nawulak wankeb' wi' eb' a'an, 18naq ki'ok chi eek'ank ru li palaw xb'aan jun kawil iq' yo chi apunk. 19Ak numenaq tana jun leew xb'eenikeb' chiru ha' naq ke'ril li Jesus yo chi b'eek chiru li palaw, ak taanach'oq chaq rik'in li jukub'. K'ajo' naq ke'xiwak. 20Ut li Jesus kixye reheb':
—Laa'inin, mexxiwak!
21Ke'raj raj xk'ulb'al sa' li jukub' rik'ineb', ab'an li jukub' tikto koxtaw li na'ajej b'arwi' yookeb' chi xik.
Li Jesus ki'aatinak Kafarnaúm sa' li ch'utleb'aal kab'l
22Sa' li kutan jun chik eb' li tenamit li ke'kanaak chaq junpak'al li palaw, ke'xk'e reetal naq jun ajwi' li jukub' kiwank aran ut li Jesus ink'a' ki'ok chisa' rochb'eeneb' li xtzolom, xjuneseb' b'an koheb' li xtzolom. 23Ab'anan wankeb' kok' jukub' ke'elk chaq Tiberias, ke'wulak nach' rik'in li na'ajej b'arwi' ke'wa'ak. 24Naq ke'ril eb' li tenamit naq maa'ani chik li Jesus aran chi moko eb' li xtzolom, ke'ok sa'eb' li kok' jukub' ut koheb' Kafarnaúm chi xsik'b'al li Jesus.
25Ut naq koxe'xtaw junpak'al li palaw, ke'xye re:
—At Tzolonel, jo'q'e xatk'ulunk arin?
26Li Jesus kixsumeheb' ut kixye:
—Relik chi yaal ninye eere: nikineesik' moko rik'in ta naq xerilatqeb' li xninqal ru eetalil, rik'in b'an naq xexwa'ak ut xexnujak. 27Chexk'anjelaq moko chirix ta li tzekemq na'oso'k, chirix b'an li tzekemq ink'a' nalajk na'oso'k, a' li naxk'e li junelik yu'am: a'an taak'ehe'q eere xb'aan li K'ajolb'ej, xb'aan naq A'an a'in li xaqab'anb'il xwankil xb'aan li Yuwa'b'ej Yos.
28Eb' a'an ke'xye re:
—K'a' raj ru tqab'aanu re xk'anjelankil li naraj li Yos?
29Kichaq'ok li Jesus ut kixye reheb':
—Li k'anjel naraj li Yos, a'an: naq chepaab' li taqlanb'il chaq xb'aan.
30Toja' naq ke'xye re:
—K'aru li eetalil nakab'aanu laa'at re naq taaqil ut tatqapaab'? K'aru li k'anjel nakab'aanu? 31Eb' li qana' qayuwa' ke'xwa' chaq li maná sa' li chaqich'och' jo' naq tz'iib'anb'il: «Choxahil wa kixk'e chi xwaheb'».#6,31 Sal 78,24.
32Li Jesus kixchaq'b'eheb' ut kixye:
—Relik chi yaal ninye eere: moko a' ta laj Moisés kik'ehok eere li choxahil wa; a' b'an linYuwa' nak'ehok eere li tz'aqal choxahil wa. 33Xb'aan naq li xwa li Yos a'an li nakub'e chaq sa' choxa ut naxk'e xyu'am li ruuchich'och'.
34Toja' naq ke'xye re:
—Qaawa', chak'e ta qe chi junelik li wa a'in.
35Kixye li Jesus reheb':
—Laa'in li yu'am wa. Ani taachalq wik'in ink'a' taatz'okaaq, ut li taapaab'anq we maajaruj taachaqiq re. 36Ab'anan ak xinye eere: Xeril wu ut ink'a' nekepaab'. 37Chixjunil ani tixk'e we li Yuwa'b'ej taachalq wik'in, ut li taachalq wik'in ink'a' tintz'eqtaana. 38Xb'aan naq xinkub'e chaq sa' choxa moko re ta xb'aanunkil li wajom laa'in, re b'an xb'aanunkil li rajom li kitaqlank chaq we. 39Ut a'an a'in li rajom li kitaqlank chaq we: naq chixjunil li xk'ehom we ink'a' taasachq chiwu, tinwaklesi b'an chi yo'yo sa' roso'jikeb' li kutan. 40Xb'aan naq a'an a'in li rajom linYuwa': naq yalaq ani taaril ru li K'ajolb'ej ut tixpaab', wanq xyu'am chi junelik, ut laa'in tinwaklesi chi yo'yo sa' roso'jikeb' li kutan.
41Yookeb' chi choqink eb' laj Judiiy chirix li Jesus, xb'aan naq kixye: “Laa'in li wa xinkub'e chaq sa' choxa”. 42Ut neke'xyehatq:
—Ma maawa' tab'i' a'in li Jesus, li ralal laj José? Laa'o naqanaweb' ru li xna' xyuwa'. K'a' put naq naxye anaqwan: «Xinkub'e chaq sa' choxa»?
43Li Jesus kixchaq'b'eheb' ut kixye:
—Meechoqoqi eerib' cherib'il eerib'. 44Maa'ani naru nachalk wik'in, wi ink'a' k'amb'il chaq xb'aan li Yuwa'b'ej li kitaqlank chaq we; ut laa'in tinwaklesi chi yo'yo sa' roso'jikeb' li kutan. 45Tz'iib'anb'il sa' xhuheb' li Propeet: «Tzolb'ilaqeb' chixjunileb' xb'aan li Yos».#6,45 Is 54,13; Jr 31,33-34. Chixjunil li na'ab'ink re li Yuwa'b'ej ut naxtzol rib' rik'in, nachalk wik'in.
46“Maa'ani rilom ru li Yuwa'b'ej; ka'ajwi' Li nachalk rik'in li Yos, a'an rilom ru li Yuwa'b'ej. 47Relik chi yaal ninye eere: ani wank xpaab'aal, wank xyu'am chi junelik. 48Laa'in li yu'am wa. 49Leena' leeyuwa' ke'xwa' li maná sa' li chaqich'och' ut ke'kamk. 50A'an a'in li wa nakub'e chaq sa' choxa, re naq ani taawa'oq re ink'a' taakamq. 51Laa'in li yo'yookil wa xinkub'e chaq sa' choxa. Li taawa'oq re li wa a'in, yo'yooq chi junelik; ut li wa tink'e laa'in, a'an lintz'ejwal re twanq xyu'am li ruuchich'och'”.
52Ab'an eb' laj Judiiy neke'xwech'i rib'eb':
—Chanru naq a'in tixk'e li xtz'ejwal chiqatzeka, chankeb'.
53Kixye li Jesus reheb':
—Relik chi yaal ninye eere: wi ink'a' neketzeka li xtz'ejwal li K'ajolb'ej, wi ink'a' nekeruk' li xkik'el, maak'a'aq yu'am eerik'in. 54Ani natzekank re lintz'ejwal ut naruk' linkik'el, wank xyu'am chi junelik ut laa'in tinwaklesi chi yo'yo sa' roso'jikeb' li kutan. 55Xb'aan naq lintz'ejwal a'an tz'aqal tzekemq ut linkik'el a'an tz'aqal uk'a'. 56Ani natzekank re lintz'ejwal ut naruk' linkik'el, nakanaak wik'in ut laa'in rik'in. 57Jo' naq li yo'yookil Yuwa'b'ej kitaqlank chaq we ut laa'in yo'yookin sa' xk'ab'a' li Yuwa'b'ej, jo'kan ajwi' li taatzekanq we yo'yooq sa' ink'ab'a'. 58A'an a'in li wa kikub'e chaq sa' choxa; moko jo' ta li ke'xwa' leena' leeyuwa' ut ke'kamk. Li taawa'oq re li wa a'in, yo'yooq chi junelik.
59Chixjunil a'in kixye li Jesus naq yo chi xtzolb'aleb' sa' li ch'utleb'aal kab'l aran Kafarnaúm.
Wan ke'ch'inank xch'ool, a'ut laj Pedro kaw xch'ool chirix li Jesus
60Naq ke'rab'i a'in, naab'aleb' li xtzolom ke'xye:
—Q'axal kaw li aatin a'in. Ani taakuyuq rab'inkil?
61Ab'an li Jesus naxnaw chi us naq eb' li xtzolom yookeb' chi choqink chirix a'in; jo'kan naq kixye reheb':
—Ma xluktaak eech'ool xb'aan li aatin a'in? 62K'a' raj ru teeye naq teeril li K'ajolb'ej chi taqe'k b'arwi' kiwank chaq xb'enwa? 63A' li musiq'ej nak'ehok yu'am; li tz'ejwalej maak'a' na'ok wi'. Eb' li aatin xinye eere a'an musiq'ej ut yu'am. 64Ab'anan wankeb' sa' eeyanq li ink'a' neke'paab'ank.
Xb'aan naq chalen chaq sa' xtiklajik naxnaw chi us li Jesus aniheb' li ink'a' neke'paab'ank ut ani li taaq'axtesinq re. 65Ut kixye:
—Jo'kan naq xinye eere naq maa'ani naru nachalk wik'in, wi ink'a' ta k'eeb'il re xb'aan li Yuwa'b'ej.
66Chalen utan naab'aleb' li xtzolom ke'sutq'iik chirixeb' ut ink'a' chik ke'rochb'eeni. 67Toja' naq li Jesus kixye reheb' li Kab'laju:
—Ma teeraj ajwi' xik laa'ex?
68Kichaq'ok laj Simón Pedro ut kixye:
—Qaawa', ani aj ik'in tooxik? Aawik'in wank li aatin nak'ehok li junelik yu'am. 69Laa'o naqapaab' ut naqanaw naq laa'at li xSantil Alal li Yos.
70Li Jesus kixsumeheb':
—Ma ink'a' tab'i' laa'in xinsik'ok eeru laa'ex li Kab'laju? Ut jun eere laa'ex, a'an aj tza.
71A' laj Judas, ralal laj Simón Iskariote, yo chi xyeeb'al xb'aan naq a'an taaq'axtesinq re, ut a'an jun reheb' li Kab'laju!
Currently Selected:
Jn 6: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
