Jn 2

Li sumlaak li kiwank Kanahán

1Oxejeraq chik a'an, kiwank jun li sumlaak aran Kanahán, sa' xteepal Galilea, ut wank li xna' li Jesus aran. 2Kib'oqe'k ajwi' li Jesus rochb'eeneb' li xtzolom rik'in li sumlaak. 3Naq kilajk xb'iinul li sumlaak, li xna' li Jesus kixye re:

—Maak'a' xb'iineb'.

4Kichaq'ok li Jesus ut kixye re:

—K'a' taawaj we, at ixq? Maji' nawulak linhonal.#2,4 Li xhonalil li Jesus a'an li xaqab'anb'il xb'aan li Yuwa'b'ej: a'an taatz'aqloq ru naq li Kriist taanimaaq xloq'al.

5Kixye li na'b'ej reheb' laj k'anjel:

—B'aanuhomaq li k'aru tixye eere.#2,5 Cf. Gn 41,55.

6Wankeb' aran waqib' li pek-kuk, neke'k'anjelak reheb' laj Judiiy re xch'ajob'resinkil rib'eb', ka'kab' malaj ox'ox kok' kuk naxkuy li junjunq. 7Kixye li Jesus reheb':

—Nujob'resihomaqeb' chi ha' li kuk.

Ut ke'xnujob'resi chi us. 8Toja' naq kixye reheb':

—Lekomaq anaqwan ut k'amomaq re laj k'ulul ula'.

Ut eb' a'an ke'xk'am. 9Naq laj k'ulul ula' kixyal li ha' jaltesinb'il chik cho'q b'iin (a'an ink'a' naxnaw b'ar ta xchalk, ab'an eb' laj k'anjel li xe'lekok chaq re li ha' neke'xnaw), kixb'oq chaq li b'eelomej 10ut kixye re:

—Chixjunil li poyanam xb'enwa neke'xk'e li chaab'il b'iin ut, naq ak xe'k'ojlaak xch'ool, aka' chik li ink'a' chaab'il. A'ut laa'at xak'uula li chaab'il b'iin toj anaqwan.#2,10 Li b'iin a'an reetalil naq ak xtz'aqlok ru chixjunil li yeeb'il chaq sa' li Najter Chaq'rab'. Ak xk'ulunk li Kriist, a'an li B'eelomej; ut a'an naxk'e xnimal xsahil qach'ool.

11A'in kixb'aanu li Jesus cho'q xtiklajik eb' li eetalil,#2,11 Sa' li Evangelio tz'iib'anb'il xb'aan San Jwan li milagro a'an jun eetalil k'eeb'il xb'aan li Yos re naq tqapaab' li xk'anjel li Jesus (cf. 2,23; 4,54; 11,42). aran Kanahán, sa' xteepal Galilea: kixk'ut li xnimal xloq'al ut eb' li xtzolom ke'xpaab' A'an.

12Chirix chik a'an kikub'eek Kafarnaúm rochb'een li xna', eb' li riitz'in#2,12 Cf. Mt 12,46. ut eb' li xtzolom. Ab'anan ink'a' k'iila kutan ke'kanaak aran.

Li Jesus kirisiheb' laj k'ay sa' rochoch li Yos

(Mt 21,12-13; Mk 11,15-18; Lk 19,45-46)

13Taanach'oq chaq li Paswa, xninq'eheb' laj Judiiy. Kitaqe'k li Jesus Jerusalén 14ut koxtaweb' sa' rochoch li Yos eb' laj k'ay b'ooyx, eb' laj k'ay karneer ut eb' laj k'ay mukuy, jo'wi' eb' laj jalol ru tumin k'ojk'ookeb' aran. 15Kixyiib' jun xrapleb' rik'in k'aam ut kirisiheb' chixjunil sa' rochoch li Yos rochb'eeneb' li b'ooyx ut eb' li karneer; kixpaji li xtumineb' laj jalol ru tumin, kixpak'lusihatq li xmeexeb' 16ut kixye reheb' li neke'k'ayink mukuy:

—Isihomaq a'in arin: meek'e cho'q k'ayiil li rochoch linYuwa'!

17Ke'naqk ut sa' xch'ooleb' li xtzolom naq tz'iib'anb'il: “Rik'in xraab'al laawochoch k'ajo' naq naxamnak linch'ool”.#2,17 Sal 69,10.

18Toja' naq eb' laj Judiiy ke'chaq'ok:

—K'aru li eetalil taak'ut chiqu naq nakab'aanu a'in?

19Li Jesus kixsumeheb' ut kixye:

—Juk'umaq li rochoch li Yos a'in ut chiru oxib' kutan tinwaklesi wi' chik.

20Ke'xye eb' laj Judiiy:

—Waqib' roxk'aal chihab' xyaalo'k wi' li rochoch li Yos a'in, ut laa'at yal chiru oxib' kutan taawaklesi?

21Ab'an li Jesus yo chi aatinak chirix li rochoch li Yos jun chik, a' li xtz'ejwal.#2,21 Li xtz'ejwal li Jesus waklijenaq chi yo'yo a'an li xmuheb'aal li Yos (1,14) b'arwi' taaloq'oniiq ru li Yuwa'b'ej rik'in Musiq'ej ut rik'in li yaal (4,21; Ap 21,22). 22Jo'kan naq sa' li xwaklijik chi yo'yo sa' xyanqeb' li kamenaq ke'naqk sa' xch'ooleb' li xtzolom naq ak xyehom chaq chi jo'ka'in, ut ke'xpaab' li Santil Hu ut li aatin yeeb'il chaq xb'aan li Jesus.

23Naq toj wankaq aran Jerusalén, sa' xninq'ehinkil li Paswa, naab'aleb' ke'paab'ank re xb'aan naq ke'ril li xninqal eetalil kixb'aanu. 24Ab'an li Jesus ink'a' naxk'ojob' xch'ool chirixeb', xb'aan naq naxnaweb' ru chixjunil 25ut ink'a' na'ajmank ru naq taa'aatinaq anihaq chirixeb' li poyanam, xb'aan naq A'an naxnaw k'aru wank sa' xch'ool li ju'junq.

Currently Selected:

Jn 2: QQC

Highlight

Copy