Jn 16

1“Xinye a'in eere re naq ink'a' taaluktaaq eech'ool. 2Tex'isiiq sa'eb' li ch'utleb'aal kab'l. Ut taawulaq ajwi' xhonal naq yalaq ani taakamsinq eere tixk'oxla naq yo chi xloq'oninkil ru li Yos. 3Te'xb'aanu a'in xb'aan naq ink'a' xe'xnaw ru li Yuwa'b'ej chi moko xe'xnaw wu laa'in. 4Xinye a'in eere, re naq, jo'q'e taawulaq xhonaleb' a'an, chijultiko'q eere naq ak inyehom eere.

Li xk'anjel li Santil Musiq'ej

“Ink'a' xinye chaq a'in eere sa' xtiklajik xb'aan naq toj wankin chaq eerik'in. 5A'ut anaqwan xik we rik'in li kitaqlank chaq we ut maajun eere napatz'ok we: «B'ar xik aawe?». 6Rik'in naq xinye a'in eere, k'ajo' naq xraho'k eech'ool. 7Ab'anan a' li yaal ninye eere: us cho'q eere naq tinxik, xb'aan naq wi ink'a' tinxik, moko taachalq ta eerik'in laj K'ojob'anel ch'ool; ut wi tinxik, tintaqla chaq a'an eerik'in.

8“Naq taachalq a'an, tixk'ut chiru li ruuchich'och' li xtik'ti' chirix li maak, chirix li tiikilal ut chirix li raqb'a aatin: 9chirix li maak xb'aan naq ink'a' nikine'xpaab'; 10chirix li tiikilal xb'aan naq xik we rik'in li Yuwa'b'ej ut ink'a' chik teeril wu; 11chirix li raqb'a aatin xb'aan naq laj Taqlanel sa' xb'een li ruuchich'och' a'in ak teneb'anb'il chaq tojb'amaak sa' xb'een.

12“Toj naab'al raj chik tinye eere, ab'an toj maji' teekuy rab'inkil. 13Naq tol'elq li Musiq'ej re li yaal, a'an taak'amoq eeb'e toj sa' xjunxaqalil li yaal, xb'aan naq ink'a' taa'aatinaq yal xjunes rib', tixye b'an chixjunil li narab'i chaq ut tixk'ut cheru li k'aru chaalel. 14A'an tixk'e inloq'al xb'aan naq tixk'ul li k'aru we ut tolxye resil eere. 15Chixjunil li k'aru re li Yuwa'b'ej, we ajwi' laa'in. Jo'kan naq xinye: «Tixk'ul li k'aru we ut tixk'ut cheru».

16“Ink'a' chik najt teeril wu, ab'anan chi seeb' teeril wi' chik wu”.

Resil li xk'ulunik wi' chik li Jesus

17Toja' naq wankeb' li xtzolom ke'xye chirib'ileb' rib':

—K'aru xyaalal a'in li naxye qe: «Ink'a' chik najt teeril wu, ab'anan chi seeb' teeril wi' chik wu»; jo'kan ajwi': «Xik we rik'in li Yuwa'b'ej»? 18K'aru xyaalal li aatin a'in: «Ink'a' chik najt»? Ink'a' naqanaw k'aru yo chi xyeeb'al.

19Kixk'e reetal li Jesus naq patz'ok te'raj, jo'kan naq kixye reheb':

—Yookex chi xpatz'b'al cherib'il eerib' k'aru xyaalal li xinye: «Ink'a' chik najt teeril wu, ab'anan chi seeb' teeril wi' chik wu»? 20Relik chi yaal ninye eere: texhuyhutq chi yaab'ak ut li ruuchich'och' taasaho'q sa' xch'ool. Laa'ex taarahoq leech'ool, ab'an li xrahil eech'ool taasutq'iiq cho'q sahil ch'oolej. 21Li ixq naq ok re chi alank, ra sa' xch'ool xb'aan naq xwulak xhonalil; ab'anan naq ak xwank li xk'uula'al, ink'a' chik najultiko'k re li xnimal xrahilal xb'aan xsahojik sa' xch'ool naq xyo'laak jun li winq sa' ruuchich'och'. 22Jo'kan ajwi' laa'ex ra sa' eech'ool anaqwan, ab'anan tolwil wi' chik eeru ut taasaho'q leech'ool, ut li xsahil eech'ool maa'ani truuq taamaq'oq cheru.

23“Sa' li kutan a'an maak'a' teetz'aama chiwu. Relik chi yaal ninye eere: li k'aru teetz'aama chiru li Yuwa'b'ej, tixk'e eere sa' ink'ab'a'. 24Chalen toj anaqwan maak'a' xetz'aama sa' ink'ab'a'. Chextz'aamanq ut texk'uluq, re naq tz'aqalaq re ru li xsahil eech'ool.

25“Xinye a'in eere sa' jaljookil ru aatin. Taawulaq xq'ehil naq ink'a' chik texwaatina sa' jaljookil ru aatin, chi ch'olch'o b'an ru texwaatina chirix li Yuwa'b'ej. 26Sa' li kutan a'an textz'aamanq sa' ink'ab'a', ut moko tinye ta eere naq laa'in tintz'aamanq chiru li Yuwa'b'ej cherix, 27xb'aan naq a' ajwi' li Yuwa'b'ej narahok eere. A'an nekexra laa'ex xb'aan naq nikineera ut kaw nekepaab' naq rik'in li Yos elenaqin chaq. 28Kin'elk chaq rik'in li Yuwa'b'ej ut kinchalk sa' ruuchich'och'; anaqwan tinkanab' li ruuchich'och' ut tinsutq'iiq wi' chik rik'in li Yuwa'b'ej”.

29Toja' naq eb' li xtzolom ke'xye re:

—Anaqwan yookat chi aatinak chi ch'olch'o ru ut maajun jaljookil ru aatin nakaye. 30Ch'olch'o chiqu anaqwan naq nakanaw chixjunil, ut ink'a' na'ajmank ru naq ani taapatz'oq aawe. Jo'kan naq naqapaab' naq rik'in li Yos katchalk chaq.

31Kichaq'ok li Jesus ut kixye reheb':

—Ma nekepaab' anaqwan? 32K'ehomaq reetal, chalk re xhonal (ak xk'ulunk ajwi') naq teecha'cha'i eerib', ak xb'e xb'e li junjunq tixk'am, ut tineekanab' injunes. Ab'an moko injunes ta, xb'aan naq wank wik'in li Yuwa'b'ej. 33Xinye a'in eere re naq teetaw tuqtuukil usilal wik'in. Sa' li ruuchich'och' teek'ul li rahilal, ab'anan kawaq eech'ool! Laa'in xinq'ax ru xwankil li ruuchich'och'.

Currently Selected:

Jn 16: QQC

Highlight

Copy