Jr 6
6
Jerusalén taasute'q xb'aaneb' li xik' neke'ilok re
1Ex ralal xk'ajol laj Benjamín,
elenqex chaq sa' li tenamit Jerusalén!
Yaab'asihomaq li pur aran Tékoha,
taqsihomaq li eetalil aran Bet-Keren,
xb'aan naq chalk chaq re jun nimla rahilal ut raaxiik'
sa' xjayal releb'l li iq'.
2At xchaq'alil ru tenamit Jerusalén,
chi seeb' tatsache'q.
3Chalkeb' re naab'al chi awab'ej sa' aab'een,
jo'qeb' laj k'aak'alenel ketomq rochb'eeneb' li xketomq;
te'xyiib' li xmuheb'aaleb' chasutam
ut li junjunq tixk'aak'ale li xteepal:
4“Kawresihomaq eerib' chi yalok rik'in Jerusalén -cha'qeb'-.
Waklinqex ut yo'qeb' chi yalok rik'ineb' tuqtu wa'leb'!
Ab'anan q'axal toq'ob' qu xb'aan naq ak yo chi ewuuk,
ok re li q'oqyink.
5Maak'a' naxye, yo'qeb' chi yalok chiru li q'oqyink
ut qajuk'aq eb' li xch'ina'usal ochoch!”.
6A'an a'in li kixye li Qaawa', li Nimajwal Yos, reheb' li awab'ej a'an:
“Yok'omaq eb' li che' ut yiib'omaq eetaqleb'aal
re naq tex'ok chi yalok rik'ineb' laj Jerusalén.
Li tenamit xteneb'aak li rahilal sa' xb'een,
xb'aan naq numtajenaq li rahob'tesink aran.
7Jo' naq nayo'laak li ha' sa' junaq jul,
jo'kan ajwi' naq na'elk chaq li maa'usilal Jerusalén.
Sa' li tenamit a'an ka'ajwi' li rahilal ut li elq'ak na'ab'imank resil;
junes raaxiik' ut rahil ch'oolej nawil junelik.
8Chik'ajq aawu, a Jerusalén;
mare anchal tatinkanab' aajunes,
jo'kaqat li chaqich'och';
chi maajun chik aapoyanamil tatkanaaq”.
Resilal li rahilal chaalel
9Jo'ka'in kixye li Nimajwal Yos:
“Chixjunileb' laj Israel li te'kole'q
te'kok'sik'e'q jo' naq nasik'iik ru li uub',
toj reetal naq maak'a' chik nakanaak”.
10Ut laa'in kinye: “Ani taa'ab'inq we, at Qaawa'?
Ani twaatinaheb' re xyeeb'al li esilal a'in?
Tz'aptz'ookeb' li xxik ut ink'a' neke'ab'ink;
neke'xse'e laawaatin ut ink'a' nawulak chiruheb'.
11K'ajo' linjosq'il xb'aaneb', at Qaawa',
jo' laajosq'il laa'at. Ink'a' chik ninkuy”.
Li Qaawa' kixye we:
“Isi laajosq'il sa' xb'eeneb' li kok'al wankeb' sa' b'e
ut sa' xb'eeneb' li junq ch'uut chi saaj al.
Te'chape'q li b'eelomej, eb' li ixaqilb'ej
jo'wi' eb' li poyanam xikenaqeb' xchihab'.
12Eb' li rochocheb', li xk'aleb'aaleb' ut li rixaqileb'
jalan chik taa'eechaninq reheb',
naq tintaqla chaq li nimla rahilal re xrahob'tesinkileb' li wankeb' sa' li na'ajej a'in
-chan li Qaawa' Yos-.
13“Chixjunileb', jo' kok' ut ninqi poyanam,
junes li k'aru us cho'q reheb' neke'xk'oxla;
ut eb' li propeet jo'wi' eb' laj tij
ka'ajwi' b'alaq'ik neke'xb'aanu chixjunileb'.#6,12-13 Jr 8,10-12.
14Yal neke'xkotz b'ayaq li xrahilaleb' lintenamit
rik'in xyeeb'al: «Tuqtuukilal, tuqtuukilal»;
ab'anan maak'a' li tuqtuukilal.#6,14 Jr 8,11; Ez 13,10.
15Tento raj xe'xutaanak b'ayaq
chi xb'aanunkil li jo'maajo'il na'leb',
ab'anan maak'a' xxutaaneb'
chi moko xe'kaqo'k kach'inaq xb'aaneb' li xb'aanuhom.
Jo'kan naq te'tichk'oq ut te't'ane'q jo'eb' li junch'ol chik,
naq taawulaq xkutankil li xrahob'tesinkileb'”,
chan li Qaawa' Yos.
Li xq'etb'a aatin laj Israel
16Jo'ka'in kixye li Qaawa':
“Xaqlinqex sa'atqeb' li b'e ut ilonqex,
patz'omaq chirixeb' li najter b'e
b'ar wank li b'e chaab'il;
a'an li b'e teek'am re naq sa chik texwanq”.#6,16 Mt 11,29.
A'ut eb' a'an ke'xye: “Ink'a' naqaj xik sa' li b'e a'an”, chankeb'.
17Toja' naq li Qaawa' kixxaqab'eb' aj k'aak'alehom reheb'
ut kixye re li tenamit:
“K'ehomaq reetal naq taayaab'asiiq li pur”.
A'ut li tenamit ke'xye:
“Ink'a' naqaj rab'inkil”, chankeb'.
18Jo'kan naq kixye li Qaawa':
“Ab'ihomaq laa'ex li xninqal ru tenamit,
ut k'ehomaq reetal k'aru tixk'ul lintenamit.
19Ab'ihomaq li wankex sa' ruuchich'och'!
Tink'am chaq li rahilal sa' xb'een li tenamit a'in
xb'aan li maa'usilal neke'xk'uub'.
Ink'a' neke'raj xpaab'ankil li waatin
ut neke'xtz'eqtaana linchaq'rab'.
20K'aru na'ok wi' we li k'ajpom re Sabá
ut li sununkil b'an chalenaq sa' najtil tenamit?
Laa'in ink'a' nawulak chiwu leek'atb'il mayej
chi moko naxk'ul wu li k'a'aq chik ru nekeyeechi'i we”.
21Jo'ka'in kixye we li Qaawa':
“Tink'e xt'anleb'aal li tenamit a'in sa' li xb'e
re naq te'tichk'oq ut te't'ane'q.
Li na'b'ej yuwa'b'ej rochb'eeneb' li ralal xk'ajol,
eb' li rechkab'al ut eb' li ramiiw, tik te'oso'q chixjunileb'”.
Taachalq chaq jun xnimal rahilal sa' releb'l iq'
22Li Qaawa' kixye chi jo'ka'in:
“Toj sa' xjayal releb'l iq' xkawresi chaq rib'
jun tenamit q'axal kaw rib' chi yalok;
jun xnimal tenamit xwakliik chaq sa' xmaril li ruuchich'och'.
23Wankeb' chaq xsimaj ut xq'esnal ch'iich' sa' ruq'eb';
jwal anumeb' chi yalok, ut maajun neke'ril xtoq'ob'aal ru.
Chanchan xyaab' li palaw naq neke'xjap chaq reheb',
ut junes chirix kawaay neke'b'eek.
Junchalikaqeb' chi yalok eerik'in, ex aj Jerusalén”.#6,22-23 Jr 50,41-43.
24Ut eb' laj Jerusalén ke'xye:
“Naq xqab'i li esilal a'in,
xookanaak chi maak'a' chik qametz'ew xb'aan qaxiw;
k'ajo' naq xmayok sa' li qach'ool chi k'oxlak
ut ra wanko jo' junaq ixq ok re chi alank.
25Mexxik sa'eb' li k'aleb'aal,
mex'elk sa'eb' li b'e.
Laj xik'il uuchinel wank xch'iich' rik'in,
xiw xiw aj chik li b'eek yalaq b'ar”.#6,25 Sal 31,14; Jr 20,3.10; 46,5; 49,29; Lm 2,22.
26Ex intenamit, b'atomaq eerib' sa' q'es ruhil t'ikr
ut tolk'osiiq eerib' sa' li cha.
Japomaq eere chi yaab'ak,
tz'uyinqex chi q'axal ra sa' leech'ool,
jo' na'uxk tz'uyink chirix li alab'ej junaj chirib'il,
xb'aan naq ak chi seeb' chaq li taasachoq qe.
27Jo'ka'in kixye we li Qaawa':
“Xatinxaqab' sa' lintenamit
re taawil ut taatz'il rix li neke'xb'aanu,
jo' naxb'aanu li nayalok li oor”.
28Chixjunileb' jwal kaweb' li xjolom,
chanchaneb' li q'anch'iich' ut li ki'ch'iich';
q'etq'eteb' chixjunileb' ut junes q'ab'ank neke'xb'aanu.
29Sa' tiqwal xam nach'ajob'resiik li q'unch'iich',
ab'an maak'a' aj e naq naxtawasi rib' laj k'anjel
wi ink'a' na'elk li xtz'ajnil li q'unch'iich'.
Jo'kaneb' ajwi' li ink'a' useb' xna'leb':
ink'a' na'elk li xmaa'usilaleb' xch'ool.
30“Tz'eqtaananb'il plaat” te'xk'ab'a'in
xb'aan naq li Qaawa' xtz'eqtaanank reheb'.
Currently Selected:
Jr 6: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
