Jr 4
4
“Wi taawaj sutq'iik chaq wik'in”
1“Wi taawaj sutq'iik chaq, a Israel,
-chan li Qaawa'-
wik'in laa'in tento tatsutq'iiq chaq.
Wi taakanab' xloq'oninkil li jalanil yos li k'ajo' xyib'al ru
ut ink'a' chik tat-eleliq chiwu,
2wi taaye aajurament sa' xk'ab'a' li Qaawa'
rik'in li yaal, li tiikilal ut tiikil ch'oolej,
sa' xk'ab'a' a'an osob'tesinb'ilaqeb' chixjunil li tenamit
ut te'nimaaq xloq'al chi junelik”.
3Jo'ka'in kixye li Qaawa' reheb' laj Judá ut aj Jerusalén:
“Pikomaq chi chaab'il li ch'och' tex'awq wi'#4,3 Os 10,12.
ut mex'awk chik sa' li k'ix ru.
4Ex poyanam aj Judá ut aj Jerusalén,
q'axtesihomaq eerib' re li Qaawa' Yos,
ut k'ehomaq sa' leech'ool li reetalil linSumwank.#4,4 Dt 10,16; 30,6; Ro 2,25-29.
Mare anchal taachalq injosq'il jo' li xam
ut taa'ok chi sachok, chi maajun chik taaramoq re,
xb'aan li k'iila maa'usilal nekeb'aanu.
Xchapb'al li tenamit Judá
5“Yehomaq li esilal a'in reheb' laj Judá
ut puktesihomaq reheb' laj Jerusalén.
Yaab'asihomaq li pur yalaq b'ar sa' li na'ajej a'in
ut yehomaq resil chi kaw xyaab' leekux:
«Ch'utub'omaq eerib' ut yo'qeb' sa'eb' li kawub'resinb'il tenamit.
6Taqsihomaq li eetalil sa' xjayal Sión
ut ayuqex sa' aanil chi elelik chi maak'a'aq hilank».
Xb'aan naq taachalq chaq li rahilal sa' xjayal releb'l iq';
nimla sachok ut raaxiik' tink'am chaq aran.
7Ak xwakliik chaq laj sachonel tenamit,
jo' jun li kaqkoj x'elk chaq sa' li xsok;
chalk re sa' aab'een re xsachb'al laana'aj:
nakirirnak te'kanab'aaq eb' laatenamit
chi maajunaq chik li poyanam chisa'.
8Jo'kan naq jutub'omaq eerib' sa' q'es ruhil t'ikr,
tz'uyinqex ut yaab'anqex xb'aan xrahil leech'ool,
xb'aan naq toj yo xjosq'il li Qaawa' sa' qab'een”.
9“Sa' li kutan a'an te'ch'inanq xch'ool li awab'ej jo'wi' li xjolomileb' li tenamit;
parpotqeb' laj tij xb'aan xxiweb',
ut eb' li propeet te'sachq xna'leb'eb'”,
chan li Qaawa'.
10Ut laa'in kinye: “At Qaawa',
k'ajo' naq xab'alaq'iheb' laj Jerusalén
rik'in xyeeb'al naq te'wanq sa' tuqtuukilal,
ut anaqwan a' chik li kamk xteneb'aak sa' xb'eeneb'!”.
11Chiruheb' li kutan a'an taayeemanq
reheb' li poyanam a'in ut reheb' laj Jerusalén:
“Chalk chaq re sa' li chaqich'och'
jun tiqwal iq' sa' xb'een lintenamit.
A'an maawa' iq' re xpuuxinkil ru li triiw,
12a'an b'an jun kawil iq'
li taachalq chi xb'aanunkil li nintaqla wi',
xb'aan naq ok we chi raqok aatin sa' xb'eeneb' a'an”.
Sutinb'il Jerusalén xb'aaneb' li xik' neke'ilok re
13Ilomaq, eb' li xik' neke'ilok re li tenamit
yookeb' chi chalk jo'eb' li choql;
li xkaareb' a'an chanchaneb' li kaqsut-iq' chi chalk,
ut eb' li kawaay neke'aanilak chi kaw
chanchan xseeb'aleb' li t'iw.
Q'axal toq'ob'aal qu xb'aan naq oso'k qe.
14At Jerusalén, ch'ajob'resi ru laach'ool re naq tatkole'q.
Jo' najtil chik twanq li maa'usilal sa' laawaanm?
15Ab'i li xyaab' kuxej li nachalk chaq toj Dan:
a'an naxye resil li rahilal yo chaq chi chalk sa' xteepal Efraín:
16“Yehomaq reheb' li xninqal ru tenamit ut re Jerusalén
naq eb' laj xik'il uuchinel ak wankeb' arin;
toj najt xe'chalk chaq,
japjookeb' chaq re chi chalk sa' xb'eeneb' li tenamit re Judá.
17Jo'keb' laj k'aak'alenel ch'och' naq te'xsut Jerusalén
xb'aan naq xq'etq'eti rib' chiwu -chan li Qaawa'-.
18“Laana'leb' ut laab'aanuhom
xk'amok chaq re li rahilal a'in sa' aab'een;
li maa'usilal xwulak li xmay toj sa' laawaanm,
xb'aan naq xaq'etq'eti aawib' chiwu”.
Xrahil xch'ool laj Jeremías xb'aan li xtenamit
19Jwal nayot'e'k linch'ool
ut q'axal namayok li waanm,
ka'aj chik maa na'elk linch'ool sa' li xna'aj.
Ink'a' ninkanab' xjapb'al we chi aatinak
xb'aan naq yookin chi rab'inkil xyaab'eb' li pur
li yo chi b'oqok re xik chi yalok.
20Sa' riiqaj rib' xchalk li rahilal sa' inb'een,
ut chixjunil li tenamit xjuk'mank.
Sa' junpaat xe'juk'e'k li qochoch
ut xookanaak chi maak'a' chik qamuheb'aal.
21Jo' najtil chik yooqin rilb'al li reetalil li yalok
ut yooqin rab'inkil xyaab'eb' li pur?
22“Maak'a' xna'leb' lintenamit,
ink'a' naxnaw wu -chan li Qaawa'-.
Jipeb' ut maak'a' xk'a'uxeb'.
K'ajo' xna'leb'eb' chi b'aanunk maa'usilal,
ab'an maak'a' neke'xnaw chirix li chaab'ilal”.
Laj Jeremías kiril sa' moy u li rahilal chaalel
23Kiwil li ruuchich'och' ut kink'e reetal naq maak'a' wank chiru;#4,23-26 Gn 1,2.
kin'ilok sa' choxa ut maak'a' saqenk chiru.
24Kiwil eb' li k'iche'
ut kink'e reetal naq neke'heetank sa' li xna'ajeb';
chixjunileb' li tzuul neke'chiq'lok sa' xna'ajeb'.
25Kiwil naq maajun chik poyanam;
elenaqeb' ajwi' chixjunileb' li xik'anel xul.
26Kin'ilok wi' chik
ut kiwil naq joxk' aj chik ru li chaab'il ch'och',
juk'b'ileb' chik chixjunileb' li tenamit xb'aan li Qaawa',
xb'aan xxamlel li xjosq'il.
27Jo'ka'in kixye li Qaawa':
“Chixjunil li ruuchich'och' taasachmanq,
ab'an moko taa'oso'q ta chixjunil.
28Taaraho'q xch'ool li ruuchich'och'
ut li choxa taa'aak'ab'o'q ru.
Xin'aatinak, ut ink'a' tinjal ru li aatin xinye;
jo'kan xink'uub' xb'aanunkil, ut ink'a' traho'q linch'ool.
29Xb'aan xyaab' xkuxeb' li k'iila aj puub'
jo'eb' ajwi' li neke'kutuk rik'in simaj,
chixjunileb' li poyanam te'xkanab' li na'ajej wankeb' wi':
wankeb' te'eleliq sa'atqeb' li k'iche',
wankeb' chik te'lochte'eq chiruheb' li saqoonak.
Nakirirnak te'kanaaq chixjunileb' li tenamit
ut maajun chik taatawmanq aran.
30Ut laa'at li xatk'uluk rahilal, k'aru taab'aanu?
Us ta taatiqib' aawib' rik'in chaab'il t'ikr,
us ta taak'e xsahob' aawu rik'in chaab'il oor
ut taab'onatq eb' li rixeb' laawu,
maak'a' chik aj e naq taach'ina'usi aawib':
xate'xtz'eqtaana li neke'rahink aawu,
a' chik laakamik neke'xsik'.
31Toja' naq xwab'i xyaab' xkux jun li ixq,
chanchan naq toj xb'enwa ok re chi alank.
A'an pe' li xyaab' xkux li xrab'in li tenamit Sión;
naxjiq' xch'ool chi yaab'ak, naxye' li ruq' ut naxye:
«Toq'ob' wu, oso'k we xb'aaneb' laj kamsinel poyanam!»”.
Currently Selected:
Jr 4: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
