Jr 32
32
Laj Jeremías kixloq' jun siir xch'och'
1Li Qaawa' kiraatina laj Jeremías naq ak lajeeb' chihab' rokik chi awab'ejink laj Sedesías#32,1 2 R 25,1-7. aran Judá, ut ak waqxaqlaju xka'k'aal chihab' rokik chi awab'ejink laj Nabukodonosor. 2Sa'eb' li kutan a'an, sutsu Jerusalén xb'aaneb' li xsoldaad li awab'ej re Babilonia, ut laj Jeremías b'ak'b'o chiru xneb'aalil li rochocheb' laj k'aak'alenel re li awab'ej re Judá. 3Laj Sedesías, li awab'ej, a'an kitaqlank xb'ak'b'al xb'aan xyeeb'al li aatin a'in: “Xyehom li Qaawa': «Li tenamit a'in taaq'axtesimanq sa' ruq' li awab'ej re Babilonia, ut taa'eechaniiq xb'aan; 4ut laj Sedesías, li awab'ej, ink'a' taakole'q sa' ruq'eb' laj Kaldeha, taaq'axtesiiq b'an sa' ruq' li awab'ej re Babilonia ut te'aatinaq chirib'ileb' rib'. 5Laj Nabukodonosor tixk'am laj Sedesías toj Babilonia, b'arwi' twanq toja' re naq laa'in tinraqoq aatin sa' xb'een. Us ta laa'ex texyaloq rik'ineb' laj Kaldeha, moko us ta tex'elq», chan li Qaawa'”.
6Kixye laj Jeremías: “Li Qaawa' x'aatinak wik'in ut xye we: 7«K'e reetal naq laj Janamel, ralal laj Salún, laawikan, chalk re chi xyeeb'al aawe: Loq' linna'aj li wank Anatot, xb'aan naq laa'at li wech'alal ut aak'ulub' xloq'b'al». 8Ut relik chi yaal naq laj Janamel, li ralal li wikan, xk'ulunk wik'in, jo' ak xyehom we li Qaawa'; xolinraatina chiru xneb'aalil li rochocheb' laj k'aak'alenel re li awab'ej ut xyeechi'i we li xna'aj li wank Anatot, sa' xteepal Benjamín, xb'aan naq ink'ulub' xloq'b'al ut reechaninkil. Toja' naq xintaw ru naq a'an xtaqlahom li Qaawa', 9-10ut xinloq' li na'ajej chiru laj Janamel, li ralal li wikan, li wank Anatot: wuqlaju chi tumin plaat xintoj wi', jo' chanru yeeb'il. Xintz'iib'a li xhuhul li ch'och', xinkaaxti ut xe'xjuch' xk'ab'a'eb' chisa' eb' li testiiw. 11Chirix chik a'an xinxok li xhuhul li xinloq'ok wi', chi ak kaaxtinb'il jo' chanru na'uxk xb'aanunkil, ut li jun chik ink'a' kaaxtinb'il ru, 12ut xinq'axtesi xkab'ichaleb' re laj Baruk, ralal laj Nerías, ri xmam laj Mahasías, chiru ajwi' laj Janamel, li ralal li wikan, chiruheb' lintestiiw li xe'xjuch' xk'ab'a'eb' sa' xhuhul li ch'och' ut chiru chixjunileb' laj Judá li k'ojk'ookeb' chiru xneb'aalil li rochocheb' laj k'aak'alenel. 13Chiruheb' chixjunileb' a'an xinye re laj Baruk: 14«Jo'ka'in xye li Nimajwal Yos, li xYos laj Israel: K'ul eb' li wiib' xhuhul li ch'och' a'in, li kaaxtinb'il ru ut li ink'a', ut k'uula sa' junaq ch'och'uk'al re naq ink'a' taaq'aaq. 15Xb'aan naq xyehom li Nimajwal Yos, li xYos laj Israel, naq sa' li na'ajej a'in taaloq'manq wi' chik ochoch, k'aleb'aal ut li xna'ajeb' li awimq».
Laj Jeremías kitijok
16“Naq ak xinq'axtesi re laj Baruk, ralal laj Nerías, li xhuhul li ch'och' xinloq', xintijok chiru li Qaawa' chi jo'ka'in:
17«At Qaawa' Yos, laa'at aj winqob'resihom re choxach'och' rik'in xnimal aawankil ut xkawilal laawuq': maak'a' k'aru ch'a'aj xb'aanunkil chawu, at Qaawa'. 18Laa'at nakawuxtaana ruheb' li k'iila o'q'ob' chi poyanam, ab'anan nakarahob'tesiheb' ajwi' eb' li winq xb'aan li xmaakeb' li xna' xyuwa'eb'. At Nimajwal Yos li rajawal kaw aawib'; laak'ab'a' laa'at a'an Nimajwal Yos! 19Sachb'ach'oolej rilb'al laak'anjel ut q'axal nim laawankil chi xb'aanunkil. Kutan saqenk chawu chixjunil li xb'aanuhomeb' li poyanam, re xq'ajkamunkil li junjunq jo' chanru xk'ulub' li xyehom ut xb'aanuhom. 20Relik chi yaal naq xninqal eetalil ut sachb'ach'oolej kab'aanu chaq Ejiipt, ut chalen chaq junxil toj anaqwan yookat chi xb'aanunkil rik'ineb' laj Israel jo'wi' junsut junrub'el choxa; jo'kan naq q'axal nim laaloq'al jo' na'ilmank anaqwan. 21Laa'at kawisi chaq laatenamit Israel aran Ejiipt rik'in xninqal eetalil ut sachb'ach'oolej; ut rik'in xnimal aawankil ut xkawilal laawuq' xak'e xxiweb' chixjunileb'. 22Kak'e li ch'och' a'in li k'ajo' xq'emal reheb' laj Israel, jo' chanru kayeechi'i chaq reheb' li xna' xyuwa'eb'. 23A'ut naq eb' a'an ke'ok sa' li na'ajej ut ke'reechani, ink'a' ke'xpaab' laawaatin chi moko ke'xk'e sa' xch'ooleb' li xchaq'rab'inkileb' aab'aan: tik ink'a' ke'xb'aanu li kaye reheb'; jo'kan naq xataqla chaq li rahilal a'in sa' xb'eeneb'.#32,20-23 Ex 3,8; 7-14; Dt 4,34-40.
24«K'e reetal naq eb' li taqleb'aal yiib'anb'ileb' xb'aaneb' laj Kaldeha yo chi wulak sa' li tenamit; ut xb'aan li raaxiik', li we'ej ut li raxkamk taa'eechaniiq Jerusalén xb'aaneb' li xik' neke'ilok qe. At Qaawa', yo chi k'ulmank anaqwan li kaye chaq junxil, ut yookat chi rilb'al rik'in laawu. 25Wi li tenamit ok re chi eechaniik xb'aaneb' laj Kaldeha, k'a'ut naq xaye we: Loq' li ch'och' a'an rik'in plaat ut sik'eb' aatestiiw?»”.
26Toja' naq li Qaawa' kinraatina ut kixye we: 27“K'e reetal, laa'in li Qaawa', li xYos chixjunileb' li wankeb' xyu'am. Maak'a' k'aru ch'a'aj xb'aanunkil chiwu.#32,27 Gn 18,14; Lk 1,37. 28Jo'kan naq ninye aawe: Tink'e li tenamit a'in sa' ruq' laj Nabukodonosor, li awab'ej re Babilonia, ut sa' ruq'eb' laj Kaldeha.#32,28 2 R 25,1-11; 2 Kr 36,17-21. 29Eb' laj Kaldeha li yookeb' chi yalok rik'in Jerusalén te'ok chisa', te'xk'e xxamlel ut taa'oso'q rochb'eeneb' li ochoch nak'atmank wi' pom chiru laj Bahal ut na'uk'mank b'iin sa' xk'ab'a'eb' li jalanil yos yal re xchiq'b'al linjosq'il. 30Chalen chaq sa' xtiklajik, eb' laj Israel jo'wi' eb' laj Judá junes maa'usilal neke'xb'aanu; eb' li ralal xk'ajol laj Israel junes xyoob'ankil injosq'il neke'xb'aanu rik'in xyiib'ankil li xjalanil yoseb' -chan li Qaawa'-. 31Chalen chaq sa' xtiklajik, li tenamit a'in junes injosq'il neke'xyoob'. Jo'kan naq twisiheb' sa' xnaq' wu, 32xb'aan chixjunil li maa'usilal xb'aanuhomeb' laj Israel jo'wi' eb' laj Judá, re xyoob'ankil linjosq'il, rochb'eeneb' li awab'ej, eb' laj jolominel, eb' laj tij, eb' li propeet ut chixjunileb' li wankeb' Judá ut Jerusalén. 33Us ta maajun sut xinkanab' xtijb'aleb' ut xq'usb'aleb', ink'a' xe'xk'ul ru li xtzolb'aleb'; ut a' chik lintz'eqtaanankil xe'xb'aanu ruuchil lintaaqenkil, 34toj reetal xe'xmux xsa' li ochoch nanimaak wi' link'ab'a' naq xe'xk'e aran eb' li tz'i'b'eetalil yos.#32,34 2 R 23,10; Jr 7,30-31; 19,1-6. 35Xe'xyiib'atq ajwi' x'artal laj Bahal sa' xtaq'ahil Ben-Hinón,#32,35 2 R 23,10; Jr 7,31. re xk'atb'al li ralal xk'ajoleb' cho'q xmayejeb' chiru laj Molok.#32,35 Lv 18,21. Chi jo'kan xe'xk'e chi maakob'k eb' laj Judá, li maajun wa inyehom reheb' chi moko xnume'k b'ayaq sa' inch'ool naq jo'kan te'xb'aanu.
Li Ak' Sumwank
36“Laa'in li Qaawa', li xYos laj Israel, jo'ka'in ninye chirix li tenamit a'in, li xaye laa'at naq taaq'axtesiiq sa' ruq' li awab'ej re Babilonia xb'aan li raaxiik', li we'ej ut li raxkamk: 37Teb'inch'utub' chaq sa' chixjunileb' li na'ajej b'arwi' kincha'cha'iheb' xb'aan linjosq'il ut li xmay linch'ool; tink'ameb' chaq wi' chik sa' li na'ajej a'in ut te'wanq sa' tuqtuukilal. 38A'anaqeb' lintenamit ut laa'inaq li xYoseb'. 39Tink'e naq junaj aj chik li xch'ooleb' ut li xyu'ameb' chi xloq'oninkil wu chi junelik, re naq sa wanqeb' a'an ut eb' li ralal xk'ajoleb' li te'wanq moqon. 40Tink'ojob' jun Sumwank rik'ineb', li wanq xwankil chi junelik: laa'in ninye li waatin naq junelik twusila ruheb', ut tink'e sa' xch'ooleb' naq te'roxloq'i wu ut ink'a' chik te'xnajtob'resi rib' wik'in.#32,38-40 Jr 31,31-34. 41Taasaho'q li waanm chi xb'aanunkil li usilal reheb',#32,41 Dt 30,9. ut tink'eheb' chi na'ajunk chi junwaakaj sa' li na'ajej a'in, chi anchal linch'ool ut chi anchal li waanm”.
42Li Qaawa' kixye ajwi' chi kama'in: “Jo' naq xinrahob'tesi chi kaw li tenamit a'in, jo'kan ajwi' naq twusila ruheb' chi yo'oon rik'in chixjunil li sahil eechej xinyeechi'i reheb'. 43Ut te'xloq'atq xch'och'eb' sa' li na'ajej a'in, li nekeye laa'ex: «Nakirirnak taakanaaq li tenamit a'in; maajun chik poyanam chi moko xul te'wanq chisa', ut taaq'axtesimanq sa' ruq'eb' laj Kaldeha», chankex. 44Te'xloq'atq xch'och'eb' ut te'xtoj rik'in plaat; te'xtz'iib'a xhuhul, te'xkaaxti ut eb' li testiiw te'xjuch' li xk'ab'a'eb' sa' xhuhul li ch'och'. A'in taak'ulmanq sa' xteepal Benjamín, sa' xsutam Jerusalén ut sa'atqeb' li tenamit re Judá, sa'eb' li tzuultaq'a ut sa' xteepal Nejeb, xb'aan naq te'sutq'iiq chaq wi' chik li wankeb' chaq chi preexil”, chan li Qaawa'.
Currently Selected:
Jr 32: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
