Jr 28
28
Laj Jeremías ut laj Ananías aj b'alaq'
1Ak oob' po chik xtiklajik li xka chihab' chi awab'ejink laj Sedesías#28,1 2 R 24,18-20; 2 Kr 36,11-13. aran Judá, ki'aatinak li propeet Ananías, ralal laj Asur, aj Gabahón, ut kixye re laj Jeremías sa' rochoch li Yos, chiruheb' laj tij ut chiruheb' chixjunil li tenamit:
2“Jo'ka'in xye li Nimajwal Yos, xYos laj Israel: «Tinjuk' li xwankil li awab'ej re Babilonia 3ut sa' wiib' chihab' tink'e chaq chi q'ajsiik li k'a'aq re ru re li wochoch, li kik'ame'k Babilonia xb'aan laj Nabukodonosor, li awab'ej. 4Tink'e ajwi' chi sutq'iik chaq laj Jekonías, ralal laj Johakín, awab'ej re Judá, ut chixjunileb' laj Judá li ke'k'ame'k chi preexil Babilonia -chan li Qaawa'-, xb'aan naq laa'in tinjuk' li xwankil li awab'ej re Babilonia»”.
5Toja' naq laj Jeremías kixye re li propeet Ananías, chiruheb' laj tij ut chiruheb' chixjunil li poyanam ch'utch'uukeb' sa' rochoch li Yos:
6“Us raj naq li Qaawa' tixb'aanu chi jo'kan! Us raj naq li Qaawa' tixk'e chi tz'aqlok ru li xaye ut chiq'ajsiiq chaq wi' chik li k'a'aq re ru re li xloq'laj ochoch. Us raj naq tixk'eheb' ajwi' chi sutq'iik chixjunileb' li ke'k'ame'k Babilonia. 7Ab'an ab'i eb' li aatin a'in li tinye aawe ut cho'q reheb' chixjunil li poyanam: 8Eb' li propeet li ke'wank chaq junxil, naq toj maji' nokooyo'laak chaq laa'o, ke'xye chaq resil li raaxiik', li we'ej ut li raxkamk taawanq sa' naab'aleb' chi tenamit ut xninqal awab'ejihom. 9Ab'anan wi junaq propeet naxye naq taawanq tuqtuukil usilal, taanawmanq naq li Qaawa' kitaqlank chaq re, ka'ajwi' naq taatz'aqloq ru chixjunil li xyehom”.#28,9 Dt 18,21-22.
10Toja' naq laj Ananías, li propeet, kixchap li b'itche' li wank chi xkux laj Jeremías, ut kixtoqi. 11Ut kixye chiruheb' chixjunil li tenamit: “Jo'ka'in xye li Qaawa': «Jo' naq xwisi li b'itche' a'in chirix xkux laj Jeremías, jo'kan ajwi' naq twisiheb' chixjunileb' li tenamit rub'el xwankil li awab'ej re Babilonia sa' wiib' chihab', ut tinjuk'i»”.
Laj Jeremías ki'elk aran ut koho. 12Ut naq laj Ananías ak xtoqi li b'itche' wank chirix xkux laj Jeremías, li Qaawa' kiraatina wi' chik li propeet ut kixye re chi jo'ka'in: 13“Ayu ut ye re laj Ananías sa' ink'ab'a': «Yal che' b'itche' li xatoqi, ab'anan laa'in tink'e jun b'itch'iich' cho'q reeqaj. 14Xb'aan naq li Nimajwal Yos, li xYos laj Israel, xye chi jo'ka'in: B'itch'iich' chik xink'e chirix xkuxeb' chixjunileb' li tenamit re naq te'kanaaq chi munil chiru laj Nabukodonosor, li awab'ej re Babilonia. A'atqeb' li k'iche'il xul te'wanq rub'el li xwankil»”.
15Toja' naq laj Jeremías kixye re laj Ananías: “Ab'i, a Ananías. Maawa' li Qaawa' xtaqlank chaq aawe chi aatinak, ut laa'at yookat chi xk'ojob'ankil xch'ool li tenamit a'in rik'in laatik'ti'. 16Jo'kan naq li Qaawa' xye chi jo'ka'in: «Laa'in tin'isinq aawe sa' li ruuchich'och'. Chiru li chihab' a'in tatkamq xb'aan naq xatakchi'eb' li tenamit chi q'etq'eto'k chiwu -chan li Qaawa'»”.
17Ut li propeet Ananías kikamk sa' xwuq li po re li chihab' a'an.#28,15-17 Dt 13,6-10.
Currently Selected:
Jr 28: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
