Jr 23
23
Li awab'ej tiik xch'ool ut wank xna'leb'
1“Ra chaalel sa' xb'eeneb' li neke'kanab'ank chi sachk ut chi cha'cha'inb'ileb' linkarneer”,#23,1-4 Ez 34,1-10; Jn 10. chan li Qaawa'.
2Jo'ka'in kixye li Qaawa', li xYos laj Israel, chirixeb' li neke'ilok re li xtenamit: “Laa'ex xexcha'cha'ink reheb' linkarneer, xek'eheb' chi elelik ut ink'a' xerileb'. Jo'kan naq laa'in texink'e chi xtojb'al rix leemaak -chan li Qaawa'-. 3Laa'in tink'ameb' chaq linkarneer b'arwi' xwaanilasiheb', tinch'utub'eb' ut teb'ink'am chaq wi' chik sa' li xna'ajeb', re naq te'k'iiq ut te'k'ihanq. 4Tinxaqab'eb' aj ilol reheb' re naq te'xch'oolaniheb'; chi jo'kan maak'a' te'xxiwa chi moko taasachq junaq sa' xyanqeb'”,#23,4 Jn 6,37. chan li Qaawa'.
5“Taawulaq xkutankil naq tinxaqab' junaq ralal laj David,
q'axal tiikaq xch'ool ut wanq xna'leb' chi awab'ejink;
a'an tixk'anjela ru li tiikilal ut li k'ulub'ej sa' li na'ajej a'in.
6Chiru li x'awab'ejihom, eb' laj Judá te'kole'q,
ut eb' laj Israel te'wanq sa' tuqtuukilal.
A'an a'in li te'xk'e cho'q xk'ab'a':
«Li Qaawa' a'an laj kolol qe».#23,5-6 Jr 33,14-16.
7“Taawulaq xkutankil -chan li Qaawa'- naq ink'a' chik taayeemanq jurament sa' xk'ab'a' li Qaawa' li ki'isink chaq reheb' laj Israel sa' li tenamit Ejiipt, 8te'xb'aanu b'an jurament sa' xk'ab'a' li Nimajwal Yos li xk'amok chaq eb' laj Israel sa' li tenamit wan chaq sa' xjayal releb'l iq' jo'wi' sa'atq chixjunileb' li tenamit b'arwi' kixcha'cha'iheb'.#23,7-8 Is 43,16-19; Jr 16,14-15. Ut te'wanq wi' chik sa' li xch'och'eb'”.
Xjitb'aleb' li propeet aj b'alaq'
9Xmaakeb' li propeet aj b'alaq':#23,9-32 Jr 14,13-15; 27,9-10.16-18; Ez 13,1-16.
“Q'axal namayok linch'ool -chan laj Jeremías-,
nasiksotk chixjunil linjunxaqalil,
sa' xk'ab'a' li Qaawa' ut li xloq'laj aatin;
chanchan wi' yo inkalajik,
jo' junaq winq li xruk' naab'al li b'iin.
10Nujenaq li tenamit chi aj muxuleb' sumlaak;
junes maa'usilal naxik wi' xch'ooleb' li poyanam,
ut neke'roksi li xwankileb' chi xb'aanunkil li ink'a' us.
Jo'kan naq majewanb'il li ruuchich'och' xb'aan li Qaawa';
xe'chaqik li ha' ut xk'ate'k li pim sa' li chaqich'och'.
11“Eb' li propeet jo'wi' eb' laj tij yib'ru xna'leb'eb',
ut xintaw ajwi' li xmaa'usilaleb' sa' li wochoch
-chan li Qaawa'-.
12Jo'kan naq tink'eheb' chi b'eek sa' li aak'ab' ut sa' li xiik',
re naq te'tiikisiiq ut te't'ane'q.
Tintaqla chaq junaq nimla rahilal sa' xb'eeneb'
sa' xkutankil li raqok aatin
-chan li Qaawa'-.
13“Jwal yib'ru li xb'aanuhomeb' li propeet aj Samaria:
neke'aatinak sa' xk'ab'a' laj Bahal
ut neke'xk'e eb' laj Israel, lintenamit, chi sachk sa' li xb'eheb'.
14Xwil ajwi' li k'aru neke'xb'aanu eb' li propeet aj Jerusalén:
q'axal yib' wi' chik ru li xb'aanuhomeb'.
Neke'muxuk sumlaak ut neke'b'alaq'ik;
neke'xk'e xkawil xch'ooleb' li ink'a' useb' xna'leb'
re naq maajun tixkanab' xb'aanunkil li maa'usilal.
Eb' a'an jo'wi' eb' li wankeb' Jerusalén
chanchaneb' laj Sodoom#23,14 Gn 18,20. ut eb' laj Gomoor!
15Jo'kan naq laa'in li Nimajwal Yos ninye chirixeb' li propeet:
Tink'e junaq tzekemq rayre chi xtzekaheb'
ut tink'e reheb' li ha' b'anb'il ru re kamsink,#23,15 Jr 9,15.
xb'aan naq xnumtaak li xmaa'usilaleb' li propeet aj Jerusalén
ut xpuka rib' yalaq b'ar”.
16Jo'ka'in kixye li Nimajwal Yos:
“Ex aj Israel, meepaab' li neke'xye eere eb' li propeet,
xb'aan naq yal yookeb' cheb'alaq'inkil:
junes tik'ti' neke'xye, yal k'oxlanb'il xb'aaneb' a'an.
Moko xin'aatinak ta rik'ineb' laa'in.
17Neke'xye reheb' li neke'majewank we:
«Li Qaawa' xye naq wanqex sa' tuqtuukil usilal».
Ut reheb' li neke'xb'aanu li naraj li xjipileb':
«Maajun rahilal taachalq sa' eeb'een», chankeb'”.
18Ab'anan, ani sa' xyanqeb' a'an xtz'aqonk sa' li xk'uub'ank li Qaawa'?
Ani x'ilok ut x'ab'ink li aatin kixye?
Ani xk'e xch'ool chi rab'inkil li raatin li Qaawa'?
19K'ehomaq reetal naq xchalk xjosq'il li Qaawa',
jo' jun kaqsut-iq' li xchalk sa' xb'eeneb' li neke'b'aanunk maa'usilal.
20Maajoq'e taaraqe'q li xjosq'il li Qaawa'
toj tixb'aanu li k'aru wank sa' xch'ool xb'aanunkil.
Taawulaq xkutankil naq laa'ex toxeetaw xyaalal eb' a k'a'aq re ru a'in.#23,19-20 Jr 30,23-24.
21Moko laa'in ta kintaqlank reheb' li propeet a'an,
chi moko kin'aatinak rik'ineb';
a'ut eb' a'an koheb' chi aatinak sa' ink'ab'a'.
22Wi ta neke'xnaw k'aru ink'uub'ahom,
a' raj lintenamit koheb' wi' chi xyeeb'al li waatin;
a'aneb' raj li ke'sutq'isink reheb' wik'in
re naq te'xkanab' xb'aanunkil li maa'usilal.
23“Laa'in li Qaawa' li Yos,
a' yaal ma najt malaj nach' wankin
-chan li Qaawa'-.
24Ma naru tixmuq rib' junaq poyanam chiwu
b'arwi' ink'a' twil ru laa'in?
Laa'in wankin yalaq b'ar
jo' sa' choxa jo' sa' ruuchich'och'#23,24 Sal 139,7-12; Eklo 16,17; Sab 1,7.
-chan li Qaawa'-.
25“Ak wab'ihom li xtik'ti'eb' li propeet a'an aj b'alaq'. Neke'tik'ti'ik ut neke'xye naq neke'aatinak wik'in sa' xmatk'eb'. 26Jo' najtil chik yooqeb' chi yehok tik'ti' sa' ink'ab'a' rik'in xyeeb'al li yal neke'xk'oxla? 27Rik'in li matk' li neke'xseeraq'i chirib'ileb' rib', neke'raj naq lintenamit tinxtz'eq chirix li xch'ool, kama' ke'xb'aanu chaq eb' li xna' xyuwa'eb' naq kinsachk sa' xch'ooleb' ut ke'ok chi xloq'oninkil ru laj Bahal. 28-29Wi junaq propeet xmatk'ek, xyehaq naq a'an jun matk'; ab'an li ani xk'ulum li waatin, xyehaq chi tz'aqal re ru. Ink'a' naru xjuntaq'eetankil li roq li triiw rik'in li ru. Li waatin a'an chanchan li xam, kama' li tenleb' li naxk'aji li pek -chan li Qaawa'-.
30“Jo'kan naq laa'in tink'eheb' chi xtojb'al xmaakeb' li propeet a'an li neke'relq'a li waatin chirib'ileb' rib' -chan li Qaawa'-. 31Tinraqoq aatin chirixeb' li neke'xye naq waatin laa'in li yal xk'oxlahomeb' a'an. 32Tink'eheb' chi xtojb'al xmaakeb' li propeet li neke'xseeraq'i li tik'ti' aj matk', ut neke'xk'e chi sachk lintenamit rik'in li xk'iila seeraq'eb'. Moko laa'in ta xintaqlank reheb' chi moko inchaq'rab'ihomeb'; jo'kan naq moko tz'aqaleb' ta re xtenq'ankileb' li tenamit -chan li Qaawa'-.
33“At Jeremías, wi junaq propeet, junaq aj tij malaj ani chik reheb' li tenamit te'xpatz' aawe: «K'aru li qachaq'rab'inkil xb'aan li Qaawa', k'aru li iiq xk'ehom sa' qab'een?», cha'aq, taaye reheb': «Li Qaawa' xye naq laa'ex li iiq! Tz'eqtaananb'ilex chik anaqwan», cha'qat.
34“Ut wi junaq propeet, junaq aj tij malaj ani chik reheb' li tenamit tixye aawe: «A'an a'in li iiq xk'ehom li Qaawa'», cha'aq, laa'in tinraq aatin sa' xb'een a'an ut sa' xb'een li xjunkab'al. 35Laa'ex jo'ka'in teeye reheb' leeras eeriitz'in malaj leeramiiw: «K'aru naxye li Qaawa'? K'aru xooxsume wi'?». 36Ab'anan maajoq'e chik teeye: «A'an li iiq xk'ehom li Qaawa'», xb'aan naq wi teeroksi li aatin a'an, a'an taaq'apluuq sa' eeb'een. Laa'ex xepo' xyaalal li raatin li yo'yookil Yos, a' li Qaawa', li qaNimajwal Yos.
37“At Jeremías, patz' reheb' li propeet: «K'aru xexsume wi' li Qaawa'? K'aru xye eere?». 38Ut wi ani tixye: «A'an a'in li iiq xk'ehom li Qaawa'», cha'aq, laa'at taaye re: «Li Qaawa' xye chi jo'ka'in: Xb'aan naq toj yookex chi roksinkil li aatin li xexinq'us wi', 39laa'in texintz'eq chirix linch'ool ut texwisi sa' xnaq' wu, laa'ex jo'wi' li tenamit ink'ehom eere ut cho'q reheb' leena' leeyuwa'. 40Texinkanab' sa' xutaan chi junwaakaj li maajun taasachq sa' xch'ool»”.
Currently Selected:
Jr 23: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
