Gn 28

Laj Isahak kixtaqla laj Jakob sa' rochoch laj Labán

1Toja' naq laj Isahak kixb'oq laj Jakob, kirosob'tesi ut kixchaq'rab'i chi jo'ka'in: “Maasik' aawixaqil sa' xyanqeb' li ixq aj Kanahán. 2Xaqlin ut ayu Padán-Aram, sa' rochoch laj Betuel, li xyuwa' laana', ut aran taasik' laawixaqil, sa' xyanqeb' li xrab'in laj Labán, li ras laana'. 3A' taxaq li Nimajwal Yos chi'osob'tesinq aawe, chixk'e taxaq aawalal aak'ajol, ut chatk'ihanq re naq laa'ataq xnimal xteepaleb' tenamit. 4A'an chixk'e taxaq aawe li rosob'tesinkil laj Abrahán#28,4 Gn 17,4-8. ut chixk'e ajwi' reheb' laawalal aak'ajol, re naq taaweechani li ch'och' b'arwi' wankat jo' aj numel, a' li kik'ehe'k re laj Abrahán xb'aan li Yos”.

5Jo'ka'in naq laj Isahak kixchaq'rab'i laj Jakob, ut a'an koho Padán-Aram, sa' rochoch laj Labán, ralal laj Betuel aj Aram, ras lix Rebeka, a' li xna' laj Jakob ut laj Esaú.

Jun chik rixaqil laj Esaú

6Laj Esaú kiril naq laj Isahak kirosob'tesi laj Jakob ut kixtaqla Padán-Aram chi k'amok aran. Jo'kan ajwi' kixk'e reetal naq sa' li rosob'tesinkil kixchaq'rab'i chi jo'ka'in: “Maasik' aawixaqil sa' xyanqeb' li ixq aj Kanahán”, 7ut laj Jakob koho aran Padán-Aram, jo' chanru yeeb'il re xb'aan li xna' xyuwa'. 8Jo'kan naq laj Esaú kixtaw ru naq eb' li ixq aj Kanahán ink'a' sa ilb'ileb' xb'aan laj Isahak li xyuwa'. 9Koho b'i' laj Esaú wan wi' laj Ismael, ralal laj Abrahán, ut kixk'am jun chik li ixq: a' lix Majalat, xrab'in laj Ismael ut ranab' laj Nebayot.

Laj Jakob kimatk'ek

10Laj Jakob ki'elk Berseba ut koho Harán. 11Naq kiwulak sa' jun na'ajej, kikanaak chi wark aran xb'aan naq ak x'ok li saq'e. Kixxok jun li pek li wank sa' li na'ajej a'an, kixk'e cho'q xsok xjolom ut kixsotob' rib' chi wark. 12Ut kimatk'ek. Kiril sa' xmatk' jun taqleb'aal xaqxo sa' ch'och': li xmaril nawulak toj sa' choxa ut eb' li x'ánjel li Qaawa' neke'taqe'k neke'kub'eek chiru a'an.#28,12 Jn 1,51. 13Kiril ajwi' li Qaawa' wan chaq sa' xb'een li taqleb'aal ut kirab'i li aatin a'in: “Laa'in li Qaawa', xYos laj Abrahán laayuwa' ut xYos laj Isahak. Li ch'och' sotsookat wi' tink'e aawe ut reheb' laawalal aak'ajol.#28,13 Gn 13,14-15. 14Li xk'ihaleb' laawalal aak'ajol jo'aq li xpojtz'il li ch'och'; ut laa'at tatpukanq chalen sa' releb'l saq'e toj sa' rokeb'l; chalen sa' releb'l li iq' toj sa' rokeb'l. Sa' aak'ab'a' ut sa' xk'ab'a'eb' laawalal aak'ajol osob'tesinb'ilaqeb' chixjunil li tenamit sa' xb'een li ruuchich'och'.#28,14 Gn 12,3; 22,18. 15K'e reetal, laa'in wankin aawik'in. Tatinkol yalaq b'ar tatxik, ut tatinsutq'isi chaq sa' li na'ajej a'in. Ink'a' tatinkanab' toj reetal tinb'aanu li xinyeechi'i aawe”.

16Naq laj Jakob ki'ajk ru sa' xmatk', kixye: “Relik chi yaal naq wank li Qaawa' sa' li na'ajej a'in, ut laa'in ink'a' xinnaw!”. 17Taaxiwaq naq kixye: “Q'axal xiwajel li na'ajej a'in: a'an rochoch li Yos ut rokeb'aal li choxa!”, chan.

18Toj hik'ho kiwakliik laj Jakob, kixchap li pek li xk'e cho'q xsok xjolom, kixxaqab' jo' loq'laj eetalil ut kixhoy aseeyt sa' xb'een. 19Ut Betel kixk'e cho'q xk'ab'a' li na'ajej a'an; ab'an junxil Lus nayeemank re li tenamit a'an.

20Aran laj Jakob kixyeechi'i a'in chiru li Qaawa': “Wi li Yos tinxb'eresi ut tinxkol chiru linb'eenik, wi tixk'e inwa ut li waq', 21wi tinsutq'iiq sa' rochoch linyuwa' chi kawaqin ut sahaq sa' inch'ool, relik chi yaal naq li Qaawa' a'anaq linYos. 22Li pek a'in li xinxaqab' cho'q loq'laj eetalil a'anaq rochoch li Yos; ut chixjunil li taak'e we, tintoj aawe, at Qaawa', rik'in li xlajeetqil li k'aru we”,#28,10-22 Sab 10,10. chan laj Jakob.

Currently Selected:

Gn 28: QQC

Highlight

Copy