Gn 21

Xyo'lajik laj Isahak

1Li Qaawa' kirula'ani lix Sara jo' yeeb'il chaq re, ut li Qaawa' kixb'aanu re lix Sara li b'arwan kixyeechi'i. 2Lix Sara kikanaak sa' yu'am ut kirala jun xk'uula'al laj Abrahán sa' xtiixilal,#21,2 Heb 11,11. sa' xq'ehil yeeb'il chaq re xb'aan li Yos. 3Ut laj Abrahán kixk'e Isahak cho'q xk'ab'a' li k'uula'al li kiyo'laak, a' li kiyo'laak rik'in xSara. 4Waqxaqib' kutan chik xyo'lajik li k'uula'al,#21,4 Gn 17,12; Hch 7,8. laj Abrahán kixset xtz'uumal li xtz'ejwal laj Isahak, jo' chanru chaq'rab'inb'il wi' xb'aan li Yos. 5O'k'aal (100) chihab' wank re laj Abrahán naq kiyo'laak laj Isahak li ralal. 6Toja' naq kixye lix Sara: “Li Yos xinxk'e chi se'ek; chixjunil li taa'ab'inq re a'an, taase'eq wochb'een. 7Ani anchal xyehok re laj Abrahán naq lix Sara taatu'resinq k'uula'al? Us b'i', laa'in xink'e jun xk'uula'al sa' xtiixilal”.

Lix Agar rochb'een laj Ismael ke'isiik sa' rochoch laj Abrahán

8Kik'iik li k'uula'al ut kimaq'e'k li xtu'. Ut laj Abrahán kixk'e jun nimla ninq'e sa' li kutan a'an. 9Kiril lix Sara naq li ralal laj Abrahán li kiyo'laak rik'in lix Agar aj Ejiipt, yo chi b'atz'unk rik'in li xyum; 10jo'kan naq kixye re laj Abrahán: “Aanilasi li ixq a'an rochb'een li xyum, xb'aan naq li xyum li loq'b'il ixq a'an ink'a' naru taatz'aq li reechanihom laj Isahak linyum”,#21,10 Gal 4,29-30. chan.

11K'ajo' naq kiraho'k xch'ool laj Abrahán, xb'aan naq laj Ismael ralal ajwi'. 12Ab'an li Yos kixye re laj Abrahán: “Miraho'k aach'ool chirix laamoos ixq. Chixjunil li tixye aawe lix Sara, chapaab', xb'aan naq eb' li te'k'amoq re laak'ab'a' a'aneb' li ralal xk'ajol laj Isahak.#21,12 Ro 9,7; Heb 11,18. 13Ut li xyum laamoos ixq, laa'in tink'e naq jun xnimal ru tenamit taa'elq rik'in, xb'aan naq a'an ajwi' aawalal”, chan li Yos.

14Kiwakliik laj Abrahán toj eq'la. Kixk'e chi xk'am xwa ut jun kuk xha' lix Agar; kixk'e chi xjelo li ch'ina'al ut kixchaq'rab'i. Ut a'an kixchap xb'e ut koho sa' li chaqich'och', sa' xteepal Berseba. 15Naq kilajk li ha' sa' li kuk, lix Agar kixkanab' laj Ismael sa' xmu jun li ch'ina che' 16ut koxchunub' rib' najt kach'inaq rik'in li ch'ina'al, xb'aan naq kixye sa' xch'ool: “Ink'a' nawaj rilb'al chi kamk linyum”. Ut naq chunchu aran lix Agar, ke'ok chi yaab'ak rochb'een li ch'ina'al.

17Kirab'i li Yos li xyaab' xkux li ch'ina'al ut li x'ánjel li Qaawa' kiraatina chaq lix Agar toj sa' choxa ut kixye re: “K'aru xak'ul, a Agar? Matxiwak, xb'aan naq li Yos xrab'i xyaab' xkux li ch'ina'al aran b'arwi' wank. 18Xaqlin! Waklesi li ch'ina'al ut chap chi ruq' xb'aan naq tink'e cho'q xnimal ru tenamit”. 19Toja' naq li Yos kixk'e chi ril lix Agar jun xjulel li ha'. Koho, kixnujob'resi li kuk ut kixk'e chiru'k li ch'ina'al.

20Li Yos kixtenq'a li ch'ina'al: a'an kiwinqilo'k ut kiwank sa' li chaqich'och'; kixtzol chi us li kutuk rik'in simaj. 21Kiwank sa' li chaqich'och' Parán xk'ab'a', ut li xna' kisik'ok re li rixaqil sa' li tenamit Ejiipt.

Laj Abrahán ut laj Abimélek aran Berseba

22Sa'eb' li kutan a'an laj Abimélek#21,22 Gn 26,26. rochb'een laj Pikol, xjolomileb' laj puub', kixye re laj Abrahán: “Li Qaawa' Yos wank aawik'in rik'in chixjunil li nalajaab'aanu. 23Jo'kan b'i', arin ajwi' ye laawaatin sa' xk'ab'a' li Yos naq ink'a' tinaab'alaq'i, chi moko taab'alaq'iheb' li walal ink'ajol, chi moko eb' li wi inmam: jo' naq xinb'aanu usilal aawe, jo'kan ajwi' taab'aanu we ut re li tenamit li xatqak'ul wi' jo' tz'aqal qula'”. 24Kixye laj Abrahán: “Ninye sa' xk'ab'a' li Qaawa'”.

25Ab'an laj Abrahán kijitok chiru laj Abimélek chirix jun b'ekb'il ha' li kimaq'e'k chiru xb'aaneb' laj k'anjel chiru laj Abimélek. 26Ut kixye laj Abimélek: “Ink'a' ninnaw ani xb'aanunk re a'an. Laa'at ink'a' xaye we, chi moko laa'in xinnawok re toj anaqwan”, chan.

27Toja' naq laj Abrahán kixchapeb' xkarneer ut xwakax, kixk'eheb' re laj Abimélek ut ke'xk'ojob' jun sumwank. 28Laj Abrahán kixjek' wuqub' ixqikarneer, 29ut laj Abimélek kixye re laj Abrahán: “K'a' aj e li wuqub' chi ixqikarneer a'in li xajek'?”, chan. 30Kichaq'ok a'an ut kixye: “Li wuqub' chi ixqikarneer a'in taak'ul chi wuq' re naq a'anaqeb' reetalil naq laa'in xinb'ekok re li ha' a'in”.

31Jo'kan naq li na'ajej a'an Berseba naxk'ab'a'in, xb'aan naq aran laj Abrahán ut laj Abimélek ke'xk'e rib' sa' aatin rik'in jurament.

32Naq ak xe'xk'ojob' li sumwank aran Berseba, laj Abimélek rochb'een laj Pikol, xjolomileb' laj puub', ke'xaqliik ut ke'sutq'iik sa' xtenamiteb' laj Filistea. 33Toja' naq laj Abrahán kiraw jun toon chi tamarisko aran Berseba ut kixyaab'a xk'ab'a' li Qaawa', li junelik Yos. 34Laj Abrahán najt kiwank sa' xch'och'eb' laj Filistea.

Currently Selected:

Gn 21: QQC

Highlight

Copy