Hch 2

Li Pentekostés

1Naq kiwulak xkutankil li Pentekostés,#2,1 Pentekostés naraj naxye xlaje roxk'aal kutan xnumik li Paswa. Sa' li ninq'e a'an naninq'ehimank li q'olok jo'wi' li xq'axtesinkil li Chaq'rab' reheb' laj Israel chiru li tzuul Sinaí. ch'utch'uukeb' chixjunileb' sa' jun chi na'ajej. 2Ak taachalq chaq sa' choxa kama' xyaab' jun kawil iq' najub'ub'nak chi chalk, ut kolxnujob'resi chixjunil li kab'l wankeb' wi'. 3Toja' naq ke'xk'ut rib' chiruheb' ru'uj aq' chanchan raq'xam, ke'xjek'i rib' ut kolhilanq sa' xb'eeneb' chi xjunjunqaleb'. 4Ut chixjunileb' ke'nujak chi Santil Musiq'ej ut ke'ok chi aatinak sa' jalan jalanq chi aatinob'aal, jo' chanru ke'k'ehe'k wi' chi aatinak xb'aan li Musiq'ej.

5Wankeb' aran Jerusalén aj Judiiy aj paab'aneleb', chalenaqeb' chaq sa' chixjunileb' li tenamit junsut junrub'el choxa. 6Naq ki'ab'iik li eek'ank a'an, ke'xch'utub' rib' li tenamit ut ke'sachk xch'ool xb'aan naq ke'ok chi rab'inkil chi aatinak tz'aqal sa' raatinob'aaleb'. 7K'ajo' naq sachsookeb' xch'ool. Neke'xyehatq:

—Ma maawa'eb' tab'i' aj Galilea chixjunileb' a'in li yookeb' chi aatinak? 8Chan put ru naq chiqajunjunqal yooko chi rab'inkileb' chi aatinak sa' li qaatinob'aal yo'lajenaqo wi'? 9Wankeb' sa' qayanq aj Paart, aj Media, aj Elam, aj Mesopotamia, aj Judea, aj Kapadocia, aj Ponto, aj Asia, 10aj Frigia, aj Panfilia, aj Ejiipt, aj Sirenaika, aj Roma yal numeleb' arin, 11aj Judiiy li wankeb' chi jo'kan chalen chaq sa' xyo'lajikeb' malaj li toj moqon chik okenaqeb' sa' qayanq. Wankeb' aj Kreta ut aj Arabia, ab'an neke'qab'i chixjunileb' chi xyeeb'al sa' qaatinob'aal li xninqal ru xb'aanuhom li Yos!

12Sachsookeb' xch'ool chixjunileb' ut ink'a' neke'xtaw xyaalal; neke'xyehatq chirib'ileb' rib':

—K'aru naraj naxye a'in?

13Wankeb' chik yookeb' chi se'ek:

—Te'kalaaq, chankeb'.

Laj Pedro kiraatinaheb' li tenamit

14Toja' naq laj Pedro#2,14 Laj Pedro a'an li xjolomil eb' li Kab'laju (cf. 1,15; 2,37; 3,4.6.12; 4,8.13; 5,3.8-9.15.29; 10-11). kixaqliik, rochb'eeneb' li Junlaju, ki'aatinak chi kaw xyaab' xkux ut kixye reheb': “Ex aj Judiiy ut chejunilex li wankex Jerusalén, ch'olch'o chikanaaq a'in cheru ut ab'ihomaq chi us li waatin. 15Moko te'kalaaq ta eb' a'in jo' nekek'oxla laa'ex, xb'aan naq anaqwan b'eleeb' honal re li kutan; 16a'in b'an li yeeb'il xb'aan li propeet Joel:

17«Taak'ulmanq sa' roso'jikeb' li kutan, chan li Yos:

Tinhoy linMusiq' sa' xb'eeneb' chixjunil.

Eb' leeralal ut leerab'in te'aatinaq jo' propeet;

eb' leesaaj al te'moyuhoq

ut leecheekelal te'matk'eq matk'.

18Jo'kan ajwi', sa'eb' li kutan a'an,

tinhoy linMusiq' sa' xb'een chixjunileb' linmoos, jo' winq jo' ixq,

ut te'aatinaq jo' propeet.

19Tinb'aanu sachb'ach'oolej taqe'q sa' choxa

ut xninqal ru eetalil taq'a sa' ruuchich'och':

kik', xam ut xb'ook sib'.

20Taa'aak'ab'o'q ru li saq'e ut li po taakik'o'q ru,

rub'elaj xk'ulunik li xnimal xkutankil li Qaawa'.

21Ab'anan chixjunileb' li te'yaab'anq re xk'ab'a' li Qaawa'

te'kole'q».#2,17-21 Jl 2,28-32.

22“Ex aj Israel, ab'ihomaq li aatin a'in: Li Jesus aj Nazaret a'an jun li winq xaqab'anb'il xwankil xb'aan li Yos sa' eeyanq rik'in sachb'ach'oolej, xninqal ru b'aanuhom ut eetalil li kixb'aanu li Yos sa' eeyanq sa' xk'ab'a' a'an, jo' nekenaw ajwi' laa'ex. 23Li winq a'in kiq'axtesiik sa' eeruq' jo' chanru kiraj li Yos ut kixk'oxla chi junxilaj, ut laa'ex keklawxi chiru krus ut kek'e chi kamsiik rik'in ruq'eb' li maak'a'eb' xpaab'aal. 24A'ut li Yos kiwaklesink re chi yo'yo naq kirisi xrahil li kamk sa' xb'een, xb'aan naq moko naru ta xkanaak rub'el xwankil li kamk. 25Naxye laj David chirix li Jesus:

«Junelik nawil li Qaawa' chiwu,

xb'aan naq wank sa' linnim uq'

re naq ink'a' taach'inanq linch'ool.

26Jo'kan naq sa sa' inch'ool ut ninb'ichank xb'aan linsahojik;

linch'och'el sululel taahilanq rik'in xnimal oyb'enink,

27xb'aan naq ink'a' tinaakanab' sa' xna'ajeb' li kamenaq

chi moko taak'e chi q'aak laj santil k'anjel chawu.

28Laa'at xak'ut chiwu li xb'ehil li yu'am

ut tinaanujob'resi chi sahil ch'oolejil chawe chawu».#2,25-28 Sal 16,8-11.

29“Ex was wiitz'in, chineekuy; tento tin'aatinaq chi ch'olch'o eerik'in chirix li qanajteril yuwa' laj David: a'an kikamk ut kimuqe'k, ut li xmuqleb'aal toj wank sa' qayanq chalen anaqwan. 30Ab'an a'an propeet ut naxnaw naq yeeb'il chaq re xb'aan li Yos rik'in jurament chi jo'ka'in: «Taak'ojlaaq sa' laak'ojarib'aal jun reheb' laawalal aak'ajol».#2,30 Sal 132,11. 31Jo'kan naq kiril chi junxilaj li xwaklijik chi yo'yo li Kriist ut ki'aatinak chirix: «A'in ink'a' kikanab'aak sa' xna'ajeb' li kamenaq chi moko kiq'aak li xch'och'el xsululel».#2,31 2 S 7,12. 32Li Jesus a'in kiwaklesiik chi yo'yo xb'aan li Yos ut chiqajunilo laa'o qilom ut nokoo'aatinak chirix. 33A'in kitaqsiik xb'aan xnim uq' li Yos, kixk'ul rik'in li Yuwa'b'ej li Santil Musiq'ej yeechi'inb'il xb'aan ut kixhoy, jo' yookex chi rilb'al ut chi rab'inkil. 34Laj David moko kitaqe'k ta sa' choxa, ab'anan kixye:

«Kixye li Qaawa' re linQaawa':

K'ojlan sa' linnim uq'

35toj reetal tink'eheb' li xik' neke'ilok aawe

rub'el laawoq».#2,34-35 Sal 110,1.

36“Che'xnawaq b'i' chixjunileb' li ralal xk'ajol laj Israel naq li Jesus a'in li xek'e laa'ex chiru krus, a'an kixaqab'aak xb'aan li Yos cho'q Qaawa' ut Kriist”.

37Naq ke'rab'i a'in, eb' li wankeb' aran k'ajo' naq ke'toch'e'k xch'ool, ut ke'xye re laj Pedro ut reheb' li xkomon apóstol:

—Ex qas qiitz'in, k'aru tento taaqab'aanu?

38Laj Pedro kixchaq'b'eheb' ut kixye:

—Cheyot' eech'ool chejal eek'a'uxl ut chikub'eeq eeha' chejunjunqal sa' xk'ab'a' li Jesus li Kriist, re te'kuymanq te'sachmanq leemaak; ut teek'ul li xsimaatan li Santil Musiq'ej. 39Xb'aan naq eere li yeechi'inb'il xb'aan li Yos, reheb' ajwi' leeralal eek'ajol ut reheb' chixjunil li wankeb' chi najt,#2,39 Li wankeb' chi najt a'aneb' li maawa'eb' aj Judiiy, eb' laj gentiles (cf. Is 49,1; 57,19; Zak 6,15; Ef 2,13-17). jo'k'ihaleb' tixb'oqeb' li Qaawa' li qaYos.

40Ut rik'in k'iila aatin kixch'olob' xyaalal ut kixk'eheb' xna'leb':

—Kolomaq eerib' chiruheb' li tenamit a'in ink'a' useb' xch'ool, chan.

41Toja' naq eb' li ke'xk'ul li raatin laj Pedro sa' xch'ooleb' ke'kub'siik xha', ut sa' li kutan a'an oxib' mil tana ke'ok sa' xyanqeb' laj paab'anel.

Li xb'een komonil

(Hch 4,32-35; 5,12-16)

42Junelik neke'xk'e xch'ool chi rab'inkil li xk'utum eb' li apóstol, jo'wi' chi wank sa' komonil,#2,42 Wank sa' komonil naraj naxye naq eb' laj paab'anel junajeb' xch'ool junajeb' xk'a'uxl, wankeb' chi ch'utch'u ut neke'xtenq'a rib' rik'in chixjunil. chi xjachb'al li Wa#2,42 Xjachb'al li Wa a'an li xloq'laj Wa li Qaawa', Ewkaristiiy ajwi' nayeemank re (cf. 1 Ko 10,16; 11,24; Hch 20,7.11; 27,35; Lk 24,35). ut chi tijok.

43Ut chixjunileb' sachsookeb' xch'ool xb'aan naq eb' li apóstol nalaje'xb'aanu naab'al sachb'ach'oolej ut xninqal ru eetalil. 44Chixjunileb' laj paab'anel wankeb' sa' junajil ut komon e chixjunil li k'aru wank reheb'. 45Neke'xk'ayi li xjunkab'laleb' jo'wi' li k'aru wank reheb', ut neke'xjek'i li xtz'aq reheb' chixjunil, a' yaal chanru li rajb'al ru wan wi' li junjunq. 46Neke'xk'e xch'ool chi xik sa' rochoch li Yos wulaj wulaj, chi junajeb' xch'ool; neke'xjachi li wa sa' rochocheb' ut neke'tzekank chi saheb' sa' xch'ool ut sa' q'unil. 47Neke'xnima ru li Yos, ut usilal neke'xtaw chiru chixjunil li tenamit. Ut li Qaawa' wulaj wulaj naxtiq li komonil rik'in eb' li yookeb' chi kole'k.

Currently Selected:

Hch 2: QQC

Highlight

Copy