Malaquías 1
1
Siniorori israiroꞌsa nosororinsoꞌ
1Caso Maraquiasëco. Sinioro israiroꞌsanpoa pënëinpoaso marëꞌ anitotërincosopita, iso quiricaquë ninshitarahuë.
2-3Sinioro chachin naporin: “Iráca quëran huarëꞌ nosororanquëmaꞌ,” itërinquëmaꞌ. Canpitaso napoaponahuëꞌ, co yayonquiramahuëꞌ. Inapoatomaꞌ: “¿Onporahuatonta nosororincoisoꞌ?” toconamaꞌ. Napohuatamara: “Coꞌta tëhuënchachin nosoroatënquëma catahuaranquëmaꞌ. Shimashonëma Cacoposoꞌ, Isaorë ina yoꞌnanquëranchin pipipi. Shimashonëmaso napoaponahuëꞌ, huayonato naꞌcon naꞌcon nosororahuë. Napoaton canpitantaꞌ, huayonatënquëma nosororanquëmaꞌ. Isaoso nipirinhuëꞌ, co huayonatohuëꞌ, co onpopinchin nosororahuëꞌ. Napoaton shinpitanta co huayonatohuëꞌ, co onpopinchin catahuarahuëꞌ. Isao noꞌpaꞌ quëtërahuësosoꞌ, tanan motopiroꞌsa nipirinhuëꞌ, ca nohuanton tomaroꞌtë motopiroꞌsa quëparitërin. Noyaroꞌpaꞌ huaꞌanëntopirinhuëꞌ, tomaroꞌtë motopiroꞌsaquë maꞌsha yaꞌhuërinsopitaráchin yaꞌhuërin huachi. 4Isao shinpitasoꞌ, itomoroꞌsa itopi. Inapitaso inahua capini ninontatonaꞌ: ‘Inimiconënpoapita yaꞌhuërëhuaso noꞌpaꞌ, tapitërinënpoaꞌ. Napoaponahuëꞌ, huëco anoyataantaꞌahuaꞌ,’ niitopi naporini: Caso Sinioroco yaꞌipi nanitapato: ‘Canpitaso yaꞌhuëramaso noꞌpaꞌ anoyataantahuatamaꞌ, cariso naquëranchin tapitaantaranquëmaꞌ,’ ichitohuëꞌ. Napoaton piyapiꞌsasoꞌ, ina noꞌpaꞌ apoyatatonaꞌ: ‘Paꞌpi co noyahuëꞌ nipisopita yaꞌhuëpiso noꞌpaꞌ,’ itaponaꞌ. Naporahuaton: ‘Siniorori noꞌhuimiatërinso nacion,’ itaponaꞌ. 5Napotërinsoꞌ, canpitaora yaꞌpiranëma quëran chachin niꞌsaramaꞌ. Ina nicatomaꞌ: ‘Sinioroso chini chiníquën nanantërin. Yaꞌhuërëhuaso noꞌpaꞌ aquëtëntaꞌ, ina nohuantërinsoráchin ninin,’ tosaramaꞌ,” itërinquëmaꞌ.
Corto huaꞌanoꞌsa pënëninsoꞌ
6Siniorosoꞌ, yaꞌipi nanitaparin. Corto huaꞌanoꞌsa pënënaton: “Huaꞌhuaroꞌsasoꞌ, paꞌpina noya nicatona natëcaiso yaꞌhuërin. Patronoꞌsantaꞌ, piyapinënpitari natëcaiso yaꞌhuërin. Caso canpita tatanëmaco niꞌquëhuarëꞌ, ¡noya nicatomaco natëamacoso yaꞌhuërin! Patronëmaco niꞌquëhuarëꞌ, ¡natëamacoso yaꞌhuërin! Canpitaso napoaponahuëꞌ, nocanamaco. Napoapomarahuëꞌ: ‘¿Maquëta nocanainquën?’ itëramaco. 7Artaronëhuëquë cosharo quëpatamara, co maꞌpachináchinhuëꞌ nininsoꞌ, quëshiramaco. Inapoatoma noꞌhuitë pochin nitëramaco. Inapoapomarahuëꞌ, ‘¿maquëta noꞌhuitë pochin nitërainquën?’ itaantaramaco. ‘Manta tëranta Sinioro artaronënquë ahuiquitohuatëhuaꞌ, co maꞌshahuëꞌ,’ toconamaꞌ. Inapo yonquiatomaꞌ, noꞌhuitë pochin nitëramaco. 8‘Somaraya, sonpacha, caniaꞌpi, inapochin nininso tërantaꞌ, Sinioro marëꞌ quëpatëhuaꞌ, co maꞌshahuëꞌ,’ tomantatoma noꞌhuitë pochin nitëramaco. Inta nipachin, huaꞌanëmapita nicanacamaso marëꞌ ina pochin nininso maꞌsha quëpatëricoꞌ. ¡Co inapita tëranta ina pochin maꞌsha nininsoꞌ, maꞌpaponquëmahuëꞌ! 9Corto huaꞌanoꞌsanquëmaꞌ. Nosoroatënquëma catahuaꞌhuanquëmaso marëꞌ nontoco. Ina marëꞌ canpitaso yaꞌhuërama nipirinhuëꞌ. Ina pochin maꞌsha nininsopita aꞌnotëramaco. Ina pochin nipatamaꞌ, co carimanta noya nicaꞌhuanquëmaso yaꞌhuërinhuëꞌ. Caso Sinioroco yaꞌipi nanitapato shaꞌhuitaranquëmaꞌ: 10Inquëma tërantaꞌ, chinotëramacoso pëi yaꞌcoananën oncoatoma noyá patanantërama naporini, noya niitonhuëꞌ. Co huachi insonta yaꞌconaton, artaronëhuëquë topinan quëran aꞌpëchitonhuëꞌ. Co noyahuëꞌ ninama niꞌton, carimanta co noya niꞌnanquëmahuëꞌ. Maꞌsha quëshiramacosopitantaꞌ, co huachi maꞌpaponquëmahuëꞌ. 11Yaꞌipi isoroꞌpaquë nisha nisha piyapiroꞌsa yaꞌhuëpisoꞌ, noya nicatonaco natërinaco. Inapotatonaco yonarin pochin nininsoꞌ, chinotiinacoso marëꞌ aꞌpëpi. Naporahuaton noya nininsopita maꞌsha quëshirinaco. 12Canpitaso napoaponahuëꞌ, co ina pochin yonquiramahuëꞌ. Artaronëhuësoꞌ, misanëhuë pochin nipirinhuëꞌ, manta tëranta inaquë aꞌnotatomaco nocanamaꞌ. Cosharonëhuë pochin nininsontaꞌ, co ina inahuëꞌ aꞌnotëramaco. Inapotatomaco noꞌhuitë pochin nitëramaco. 13Canpitaso nonpatamara, napomantaramaꞌ: ‘Maꞌcháchinta Yosë marëꞌ sacatatëhua poꞌsárëhuasoꞌ,’ tënamaꞌ. Napoatoma nocanamaco. Ihuatëramasohuë nipon, ohuaca sonpachahuë nipon, caniaꞌpihuë nipon, quëshitomaco chinotamacoso marëꞌ aꞌnotohuatamacora: ‘Noya ipora ina marëꞌ Sinioro cancantërin,’ toconamaꞌ. 14Aꞌnaquëma pëꞌtahua huëntonëma quëran noya nininsoꞌ, huayonahuatomaꞌ: ‘Iso pëꞌtahua Sinioro marëꞌ acoarahuë,’ tënamaꞌ. Napoapomarahuëꞌ, naponin nininso quëshitomaco, ca marëꞌ tëparamaꞌ. Ina pochin nonpintësoꞌ, paꞌpi co noyahuëꞌ nicato ama huachi noya yaꞌhuëcaso marëhuëꞌ, shaꞌhuitarahuë. Yaꞌipi copirnoroꞌsa quëran, caso chini chiníquën nanantërahuë. Yaꞌipi isoroꞌpaquë nisha nisha piyapiꞌsa yaꞌhuërinsoꞌ, tëꞌhuatatonaco natërinaco. Caso Sinioroco yaꞌipi nanitapato, ina pochin shaꞌhuitaranquëmaꞌ,” itërin.
Currently Selected:
Malaquías 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
