Malaquías 2
2
1Naquëranchin Siniorori corto huaꞌanoꞌsa pënënaton: “Isontaꞌ, corto huaꞌanoꞌsanquëma shaꞌhuitaantaꞌinquëmaꞌ: 2Canpitasoꞌ, natëamacoso yaꞌhuërin: ‘Yaꞌipi cancanënpoa quëran Sinioro noya nicatëhua natëcaso yaꞌhuërin,’ tëcatoma natëco. Coꞌsoꞌ inapoatamahuëꞌ, ama huachi noya yaꞌhuëcamaso marëhuëꞌ, shaꞌhuitaranquëmaꞌ. Canpitasoꞌ, co yaꞌipi cancanëma quëran noya nicatomaco natëamacoso yonquiramahuë niꞌton, co noyahuëꞌ niꞌsaranquëmaꞌ. Corto huaꞌanoꞌsanquëma niꞌton, noya nininso maꞌpatëramasopita co huachi noya yaꞌhuëcamaso catahuarinquëmahuëꞌ. Inapotohuato, maꞌsha onpotarinënquëmaꞌ. Ipora chachin nani inapotaranquëmaꞌ. Co noya nicatomaco natëramacoso marëhuëꞌ, inapotaranquëma huachi. Caso Sinioroco yaꞌipi nanitapato, shaꞌhuitaranquëmaꞌ.
3Corto huaꞌanoꞌsanquëma nicatoma chiníquën nanantopiramahuëꞌ, ocoiaranquëmaꞌ. Chinotamacoso marëꞌ maꞌsharoꞌsa tëparamasopita chiꞌchinënquë, paꞌpirayataranquëmaꞌ. Naporahuaton chiꞌchi tëꞌyatërëso pochin, canpitanta corto huaꞌan quëran tëꞌyataranquëmaꞌ. 4Iráca shimashonëma Nihui itopisoroꞌco anoyatërahuë. Canpita corto huaꞌanoꞌsanquëma nicacamaso marëꞌ anoyatërahuë. Inaroꞌco anoyatërahuëso ama nishatacaso marëhuëꞌ, ipora pënënaranquëma nisahuasoꞌ. Ca Sinioroco yaipi nanitapato shaꞌhuitaranquëmaꞌ.
5Nihuiroꞌco anoyatërahuësoꞌ, noya yaꞌhuëcaso marëꞌ naꞌcon catahuarin. Naporahuaton noya aꞌpairahuë niꞌton, sano cancantërin. Tëꞌhuatatonco natëincoso marëꞌ ina pochin catahuarahuë. Inasoꞌ, tëhuënchachin tëꞌhuatatonco natërinco. 6Nisahuaton, nanamëhuë noꞌtëquënáchin piyapiꞌsa aꞌchintërin. Noyápiachin cancantaton noyasáchin nonin. Carëꞌco noya nipayaton, sano cancantërin. Inapochin cancantaton aꞌchininso marëꞌ naꞌcon piyapiꞌsa co noyahuëꞌ nipisoꞌ, aꞌpopi. 7Ina pochin mini corto huaꞌanoꞌsasoꞌ, piyapiꞌsa aꞌchintacaiso yaꞌhuërin. Aꞌchintohuachinaꞌ, nohuitarinaco huachi. Yaꞌipi piyapiꞌsa inapitari aꞌchintacaiso marëꞌ paapacaiso yaꞌhuërin. Ca Sinioroco yaꞌipi nanitaparahuësoꞌ, inapita quëran anitotaranquëmaꞌ.
8Canpitaso corto huaꞌanoꞌsanquëma nipomarahuëꞌ, noya ninamaso aꞌporamaꞌ. Nonpi nanan aꞌchinatomaꞌ, naꞌa piyapiꞌsa apëshonamaꞌ. Inapoatoma Nihuiroꞌco anoyatërahuësoꞌ tapiramaꞌ. 9Napoatoma co natëramacohuëꞌ. Naporahuaton aꞌchinpatamantaꞌ, co yaꞌipi piyapiꞌsa napopináchin niꞌnamahuëꞌ. Ina marëꞌ ca nohuanton, naní quëran apinapiroꞌsa pochin nicatënënquëmaꞌ, nocanaponënquëmaꞌ. Ca Sinioroco yaꞌipi nanitapato napotaranquëmaꞌ,” itaantarin.
Saꞌina tëꞌyatatona nisha sanapiꞌsa maantapiso marëꞌ pënëninsoꞌ
10Iporasoꞌ ca Maraquiasëco Yosë ayonquirinco niꞌton, pënënaranquëmaꞌ: Tëhuënchachin canpoasoꞌ, yaꞌipinpoaꞌ aꞌna tataíchin pochin yaꞌhuëtërinpoaꞌ. Inasoꞌ Yosë. Yaꞌipinpoa acorinpoaꞌ. Napoaton co canpoa capini ninonpitacaso yaꞌhuërinhuëꞌ. Ninonpintohuatëhuaꞌ, Yosë shimashonënpoapitarëꞌ anoyatërinso tapiarihuaꞌ. 11Cota huënton israiroꞌsanpoa co huachi Sinioroíchin cancantërëhuahuëꞌ. Napoaton aꞌnaquëma paꞌpi co noyahuëꞌ nininsopita Quirosarinquë ninamaꞌ. Yaꞌipi Israiro noꞌpaquë inapopi. Cota huënton noꞌpaquë chinotacaso pëi acopi niꞌton, Yosëri noya nicaton nosororin. Inapopirinhuëꞌ, noya sanapi manamasoꞌ tëꞌyatatomaꞌ, mamanshi camayo sanapiroꞌsa manamaꞌ. Inapoatoma Yosëri noya niꞌninsoꞌ, tapiramaꞌ. 12-14Inapoapomarahuë canpitasoꞌ: “¿Onpoatoncha Siniorosoꞌ maꞌsha ina marëꞌ quëshipirëhuahuëꞌ, co noya cancantaton maꞌparinpoahuëꞌ?” toconamaꞌ. ¡Maꞌchaꞌ naporamasopita yaꞌhuërëhua quëran, Sinioro yaꞌipi nanitapaton ataꞌhuantërinquëmahuë paya! Ina quëtacaso marëꞌ maꞌsha quëshipiramahuëꞌ, artaronënquë naꞌnëmiatopiramahuëꞌ, inapotërinquëma naporini, noya niitonhuëꞌ.
Yaꞌipi naporamasoꞌ, nani Sinioro niꞌninquëmaꞌ. Huiꞌnapitasëma sanapi macacaso marëꞌ anoyatëramaꞌ: “Chiminaquë huarëꞌ aꞌpoaranquën,” itëramaꞌ. Napopiramahuëꞌ, saꞌama tëꞌyatatatoma aꞌna manamaꞌ. 15¡Ina Yosëráchin nonënpoaꞌ, ispiritonënpoaꞌ, inapita acotërinpoaꞌ! ¡Tëhuënchachin Yosësoꞌ, ina imarëhuaso capiniráchin nimacacaso nohuantërin! Huiꞌnanpoapitantaꞌ, inanquën nicacaiso marëꞌ naporin. Napoaton ispiritonëma aꞌpaiatomaꞌ, huiꞌnapitasëma sanapi manamasoꞌ, ama nonpintocosohuëꞌ. 16Siniorosoꞌ, yaꞌipi nanitaparin. Inasoꞌ, israiroꞌsanpoa chinotërëhuaꞌ. Ina chachin napotaantarinpoaꞌ: “Ispiritonëma aꞌpaiatomaꞌ, yaꞌnan sanapi manamasoráchin cancantocoꞌ. Insosona saꞌin tëꞌyatahuaton aꞌna maantahuachin, cariso paꞌpi co noyahuëꞌ niꞌsarahuë. Ina pochin paꞌpi co noyahuëꞌ nipachina, tëpatërinso pochin niꞌsarahuë,” tënin.
Siniorori israiroꞌsa tapatë pochin nitarinsoꞌ
17Naquëranchin Sinioro shaꞌhuitaantarinquëmaꞌ: “Nonamaso natanatënquëmaꞌ, amiranquëma huachi,” tënin. Napoaponahuë canpitasoꞌ: “¿Maꞌta tënaisoꞌ natanaton Sinioro amirincoi?” toconamaꞌ. Napohuatamara, Sinioroso naporin: “Canpitaso nonpatamara: ‘Co noyahuëꞌ nipisopitantaꞌ, Yosëriso noya niꞌnin. Inapitanta yonquiaton noya cancantërin,’ tënamaꞌ. Napoatoma canpitasoꞌ, noyasáchin ninahuëso co natëramacohuëꞌ,” tënin.
Currently Selected:
Malaquías 2: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
