Génesis 9
9
Yosë Noirëꞌ anoyatërinsoꞌ
1Naporoꞌ Noi, huiꞌninpitarë chachin, Yosëri nóya yonquirapiton iso pochin shaꞌhuitërin: “Naꞌa huiꞌnahuanatomaꞌ, yaꞌipiroꞌpaquë yaꞌhuëcoꞌ. 2Yaꞌipi maꞌsharoꞌsaꞌ, anpiantëhuanoꞌsaꞌ, marëquë yaꞌhuërinsopita, inapita huaꞌanëntaramaꞌ. Inapitaso tëꞌhuatarinënquëmaꞌ. 3Carima yaꞌipi inapita capamaso marëꞌ quëtaranquëmaꞌ. Nisha nisha huëronoꞌsanta caꞌcoꞌ. Maꞌsona tëranta nayaramaso caꞌcoꞌ. 4Huënaiso nipirinhuëꞌ, ama caꞌcosohuëꞌ. Maꞌsha tëpahuatamaꞌ, huënainën noyá inquitahuatomaꞌ, caꞌcoꞌ. Huënainëni ananpirin niꞌton, ama inaso caꞌcosohuëꞌ. 5Canpita capinisoꞌ, co nitëpamaso yaꞌhuërinhuëꞌ. Tëpatohuatamaꞌ, anaꞌintaꞌhuanquëmaso yaꞌhuërin. Maꞌsharoꞌsarinta piyapi tëpahuachin, anaꞌintarahuë. Tëpatohuatamaꞌ, aꞌnaya aꞌnayanquëma tëhuënchachin anaꞌintaranquëmaꞌ.
6Insosona piyapi tëpahuachin, aꞌnari iꞌhuërëtarin.
Cá pochachin nicamaso marëꞌ acoranquëmaꞌ.
Napoaton, co nitëpamaso yaꞌhuërinhuëꞌ.
7¡Napoaponahuëꞌ, canpitaso naꞌa huiꞌnahuanatomaꞌ,
yaꞌipiroꞌpaquë yaꞌhuëcoꞌ!” itërin.
8Ina quëran itaantarin: 9“Niꞌcoꞌ. Ipora canpitaroꞌco anoyatërahuësoꞌ, shiparimapitanta yonquiato, napotaranquëmaꞌ. 10Yaꞌipi maꞌsharoꞌsanta yonquiato napotaranquëmaꞌ: Anpiantëhuanoꞌsaꞌ, pëꞌtahuaroꞌsaꞌ, tananquë maꞌsharoꞌsa yaꞌhuërinsoꞌ, nisha nisha nipisopita nancha quëran pipipiso yonquiato, shaꞌhuitaranquëmaꞌ. 11Ipora canpitaroꞌco anoyatato shaꞌhuitëranquëmasoꞌ, co onporonta nishataponhuëꞌ. Co huachi piyapiꞌsaꞌ, maꞌsharoꞌsaꞌ, inapita pacon quëran ataꞌhuantaantapohuëꞌ. Co huachi paconi isoroꞌpaꞌ ataꞌhuantaantaponhuëꞌ.
12-13Canpitarëꞌco nani anoyatomiatërahuë. Maꞌsharoꞌsarëꞌcontaꞌ, nani anoyatërahuë. Ina yonquicamaso marëꞌ yahuaꞌtanëhuë inápaquë acoarahuë. 14Chitoro inápaquë yaꞌnohuachin, yahuaꞌtanëhuënta yaꞌnoarin. 15Naporoꞌ canpitaroꞌco anoyatato shaꞌhuitëranquëmasoꞌ, yonquiarahuë. Ama huachi iꞌ quëran, isoroꞌpaꞌ ataꞌhuaantaꞌhuaso marëhuëꞌ, yonquiarahuë. 16Yahuaꞌtan chitoroquë yaꞌnohuachin niꞌsarahuë. Ina niꞌpato, yaꞌipi piyapiꞌsarëꞌco yaꞌipi maꞌsharoꞌsarëꞌco anoyatërahuësoꞌ, ayonquiarinco. 17Nani ina acorahuë ayonquiinpoaso marëꞌ. Canpitarëꞌco anoyatërahuëso ayonquiarinpoaꞌ. Maꞌsharoꞌsarëꞌconta anoyatërahuëso ayonquiarinpoaꞌ,” itërin. Ina pochin Yosëri Noi shaꞌhuitërin.
Noi huiꞌninpitarëꞌ naporinsoꞌ
18Noi huiꞌninpita nancha quëran pipipisopita, iso nápo yaꞌhuëpi: Simo, Camo, Cahuito, inapita. Camosoꞌ, aꞌnara huiꞌnin yaꞌhuëtërin. Inasoꞌ, Canaan itopi. 19Caramiáchin Noi huiꞌninpita nipirinahuëꞌ, inayaquëranchin isoroꞌpaquë piyapiꞌsa naꞌantapi. 20Ina piquëran Noi iminaton, inaquë opasáchin shacaton, oparotërin. 21Aꞌna tahuëri Noi huino oꞌoton, noꞌpirin. Noꞌpiton, nëꞌmëtë pëinën huáncana notataton, iꞌnanpirashitë quëhuëánin. 22Camosoꞌ, inaquë yaꞌconahuaton niꞌpirinhuëꞌ, paꞌpin noꞌpiton huëꞌësárin quënanconin. Quënanahuaton iinpita shaꞌhuitapon paꞌnin: “Tata noꞌpiton iꞌnanpirashitë quëhuëánin niꞌconahuë,” itërin. (Nani shaꞌhuirahuëso chachin Camosoꞌ, Canaan paꞌpin.) 23Ina natanahuatonaꞌ, Simo, Cahuito, inapitaso aꞌnara aꞌmopiso mapi. Ina masahuatonaꞌ, niimopitopi. Niimopitopiquëranchin, pinëna quëran yaꞌconatonaꞌ, paꞌpina imotopi. Niquë notëtopi niꞌton, co paꞌpina niꞌpihuëꞌ.
24Noi nonatohuachina, huiꞌnin huaꞌhua nininsoari, napotërinso natantërin. 25Natantahuaton, Canaan itapon:
“¡Tata tëhuërin niꞌton, paꞌpi co noyahuëꞌ nicatënquën co huachi noya yaꞌhuëcamaso marëhuëꞌ shaꞌhuitaranquën!
Yosë chiníquën anaꞌichinquën.
Ipora quëran huarëꞌ iyaroꞌsa camaiáponquën.
Shiparimapitanta inaporáponaꞌ,” itërin.
26Ina quëran taantarin:
“Siniorosoꞌ, Yosënëhuë. Inari Simo noya nicaton noya yaꞌhuëcaso marëꞌ catahuain.
Canaansoꞌ, Simo piyapinën niin.
27Yosë nohuanton, Cahuito, pancana huaꞌanënchin.
Simo yaꞌhuërinquë noya ninicatona yaꞌhuëꞌinaꞌ.
Canaansoꞌ, Cahuito piyapinën niin,” tënin.
28Pacon paꞌninso piquëran, Noisoꞌ cara pasa aꞌnatërápo shonca piꞌipi yaꞌhuaantarin. 29Yaꞌipiya quëran iscon pasa aꞌnatërápo shonca piꞌi icanin. Ina piquëran chiminin huachi. Ina pochin Noi ninin.
Currently Selected:
Génesis 9: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
