Génesis 10
10
Noi shinpita napopisoꞌ
1Iporasoꞌ, Simo, Camo, Cahuito, inapita shinpita napopiso shaꞌhuichinquëmaꞌ. Pacon paꞌninso piquëran huiꞌnahuanatona naꞌantapisoꞌ, shaꞌhuichinquëmaꞌ. Simo, Camo, Cahuito, inapitaso nani shaꞌhuirahuëso chachin, Noi huiꞌninpita.
2Cahuito huiꞌninpitasoꞌ, isopita: Comiri, Macoco, Matai, Capano, Toparo, Misico, Tirasi, inapita. 3Comiri huiꞌninpitantaꞌ: Asiquinasi, Nipato, Tocarama, inapita. 4Capano huiꞌninpitantaꞌ: Inisi, Tarsis, Quitimo, Notanimo, inapita. 5Ina nápo Cahuito huiꞌninpita, shinpita inapita yaꞌhuëpi. Inapitasoꞌ, marë yonsanoꞌsa parti, yaꞌhuëpi. Inatohua ninanoroꞌsa ocoirahuatonaꞌ, aꞌnaya aꞌnaya nacionënaquë, aꞌna huënton aꞌna huënton, nisha nisha yaꞌhuëpi. Inahuara noꞌpanënaquë yaꞌhuëpi. Naporahuatonaꞌ, inahuara nonpiso nananquë nonatonaꞌ, yaꞌhuëpi.
6Camo huiꞌninpitanta isopita: Coso, Misiraimo, Oto, Canaan, inapita. 7Coso huiꞌninpitantaꞌ: Sipa, Apira, Sapota, Naama, Sapitica, inapita. Naama huiꞌninpitantaꞌ: Sipa, Titan, inapita. 8Cososoꞌ, aꞌna huiꞌnin yaꞌhuëtërin antaꞌ, inasoꞌ, Nimoroto itopi. Inaꞌton chini chiníquën nanantaton, isoroꞌpaquë huaꞌan yaꞌconin. 9Nimorotoso Siniorori catahuarin niꞌton, paꞌpi míso inantërin. Napoaton piyapiꞌsa nonpachinara paꞌyatopi napocaisoꞌ: “Siniorori Nimoroto catahuarin niꞌton, míso inantërin. Inapochachin quëmanta catahuainquën,” topi. 10Nimoroto huaꞌanëntërinso noꞌpaquë, ninanoroꞌsa panca panca nipisopita, isopita yaꞌhuërin: Papiri, Irico, Acato, Carini, inapita. Inapita ninanoroꞌsasoꞌ, Sinaro parti yaꞌhuëpi. 11Ina parti quëran Asoronta pipirahuaton, ninanoroꞌsa ocoirin: Ninihui, Niopoto-iri, Cara, inapita itopisoꞌ. 12Naporahuaton, Nisin ninanonta ocoirin. Inasoꞌ, panca ninanoꞌ. Ninihui, Cara, inapita ninanoroꞌsa huáncana yaꞌhuërin.
13-14Misraimo shinpitasoꞌ: Notoroꞌsaꞌ, anamoroꞌsaꞌ, niapiroꞌsaꞌ, napotoroꞌsaꞌ, patrosoroꞌsaꞌ, casonoroꞌsaꞌ, capotoroꞌsaꞌ, inapita. Capotoroꞌsa quëran huiristinoꞌsa pipipi.
15Canaansoꞌ, paninan huiꞌnahuanpachina, Siton itërin. Ina quëran huiꞌnahuaantahuachina, Iti, itërin. 16-18Canaan shinpitanta isopita: Quiposoroꞌsaꞌ, amororoꞌsaꞌ, quiriquiroꞌsaꞌ, iporoꞌsaꞌ, arasiroꞌsaꞌ, siniroꞌsaꞌ, arapatiroꞌsaꞌ, simariroꞌsaꞌ, amatiroꞌsaꞌ, inapita. Ina piquëran Canaan huëntonoꞌsa niquë niquë yanquëëpi. 19Cananoꞌsa noꞌpaꞌ huaꞌanëntopisoꞌ, Quiraro parti huarëꞌ icanin. Siton ninano quëraontaꞌ, Casa ninanoquë huarëꞌ icanin. Naporahuaton, Sotoma, Comora, Atoma, Sipoin, inapita ninanoroꞌsataquëchin noꞌpaꞌ mapi. Nasa ninanoquë huarëꞌ noꞌpaꞌ huaꞌanëntopi. 20Ina nápo Camo huiꞌninpita, shinpita inapita yaꞌhuëpi. Aꞌnaya aꞌnaya nacionënaquë, aꞌna huënton aꞌna huënton, nisha nisha yaꞌhuëpi. Inahuara noꞌpanënaquë yaꞌhuëpi. Naporahuatonaꞌ, inahuara nonpiso nananquë nonatonaꞌ, yaꞌhuëpi.
21Cahuito iin mashonënsoꞌ, Simo itopi. Inantaꞌ, huiꞌninpita yaꞌhuëtërin: Ipiri huiꞌninpitasoꞌ, Simo shinpita nipi. 22Simo huiꞌninpita isopita yaꞌhuëpi: Iramo, Asoro, Arapasato, Noto, Aramo, inapita. 23Aramonta huiꞌninpita isopita yaꞌhuëpi: Osi, Ori, Quitiri, Masi, inapita. 24Arapasatontaꞌ, Saro paꞌpin. Sarontaꞌ, Ipiri paꞌpin. 25Ina quëran Ipirinta cato huiꞌninpita yaꞌhuëtërin: Aꞌnasoꞌ, Piriqui itopi. Naporo tahuëriꞌsa piyapiꞌsa itohua itohua yanquëëpi niꞌton, ina pochin ninihuanin. Iyaꞌhuainta Cotano itopi. 26-29Cotanosoꞌ, iso nápo huiꞌninpita yaꞌhuëtërin: Aromota, Siripi, Asaromapi, Quira, Atoramo, Osaro, Tiquira, Oparo, Apimairo, Sipa, Opiro, Apira, Copa, inapita. 30Inapitaso Misa parti yaꞌhuërahuatonaꞌ, Sipari parti huarëꞌ yaꞌhuëpi. Ina partisoꞌ, motopiroꞌsaráchin niconin. Cortaniiꞌ quëran, piꞌi pipirinso parti yaꞌhuërin. 31Ina nápo Simo huiꞌninpita, shinpita, inapita yaꞌhuëpi. Aꞌnaya aꞌnaya nacionënaquë, aꞌna huënton aꞌna huënton, nisha nisha yaꞌhuëpi. Inahuara noꞌpanënaquë yaꞌhuëpi. Naporahuatonaꞌ, inahuara nonpiso nananquë nonatonaꞌ, yaꞌhuëpi.
32Ina nápo Noi huiꞌninpita quëran pipipi. Nisha nisha huënton nipisopita. Nisha nisha shimashonëna quëran pipitonaꞌ, nisha nisha parti noꞌpaꞌ huaꞌanëntopi. Pacon paꞌninso piquëran itohua itohua yanquëpi. Yanquërahuatonaꞌ, nisha nisha nacionoꞌsa isoroꞌpaquë yaꞌhuërinso ocoipi.
Currently Selected:
Génesis 10: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
