Génesis 38

Cota, Tamararëꞌ naporinsoꞌ

1Naporo tahuëriꞌsa Cotaso iinpita patahuaton, Atoran ninanoaꞌhuaquë paꞌnin. Inaquë aꞌna quëmapi Iro itopiso yaꞌhuërin. Ina yaꞌhuërinquë yacapatonin. 2-3Inaquë yacapatapon pochin, aꞌnara nanon nohuitërin. Inasoꞌ, Soa itopisoꞌ huiꞌnin. Soasoꞌ Canaan piyapi. Cotari natanpachina, acoantopi. Inaquë huiꞌnahuanpachina, paninanën nasitërin. Ina nohuitaton, Iri itërin. 4Naquëranchin saꞌin cayoantarin. Nasitohuachina, quëmapi chachin niantarin. Inasoꞌ, Onan itërin. 5Naquëranchin huaꞌhuaantahuachina, quëmapi chachin niantarin. Inasoꞌ, Sira itërin. Quisipo ninanoquë Cota yaꞌhuëasoꞌ, inaso nasitërin.

6Iri huiꞌnapitohuachina, paꞌpini Tamara acoantërin. 7Acoantopirinhuëꞌ, Iri co noyahuëꞌ nininsoꞌ co Sinioro costarinhuë niꞌton, ina nohuanton chiminin. 8Napohuachina, Cotari Onan yaꞌhuërëꞌ itapon:

—Iya masho ayananpirinso saꞌin, quëmari maquëꞌ. Canpoaso inachintërëhua niꞌton, imoya macaton, inaquë huiꞌnahuanquëꞌ. Huiꞌnahuanpatan, Iri quëran pipicaiso nipisopita quëmá quëran yaꞌhuëtarin huachi, itërin. 9Onansoꞌ Tamara macaponahuëꞌ: “Huiꞌnahuanpato, huaꞌhuaroꞌsa co caquën nisarinhuëꞌ. Irico huiꞌninpitaráchin pochin nisarin,” tënin yonquinënquë. Napoaton, Tamara tëcarihuachina, aipi aꞌpaconin. Ama iinco yaꞌhuërënamënpita, ina quëran yaꞌhuëcaso marëhuëꞌ naporin. 10Onan naporinso Sinioroso nitotaton, chiníquën noꞌhuitërin. Napoaton inantaꞌ, ina nohuanton chimiantarin. 11Naporoꞌ Cotasoꞌ, Tamara itapon:

—Quëyoroantaran niꞌquëhuarëꞌ, iporasoꞌ tataparin yaꞌhuërinquë paantaquëꞌ. Huiꞌnahuë Sira itërahuëso huiꞌnapitaquë huarëꞌ, inaquë yaꞌhuëtaquëꞌ, itërin. Itaponahuëꞌ, co tëhuënchachin napotërinhuëꞌ. Nonpintaton naporin: “Sira yaꞌhuërëꞌ, iinpita pochachin chimiantahuachin,” taꞌton naporin. Napoaton Tamarasoꞌ, paꞌpin yaꞌhuërinquë paꞌnin yaꞌhuapon.

12Cara piꞌiquëran pochin Cota saꞌin yaꞌhuërëꞌ chimiantarin. Inasoꞌ shaꞌhuitëranquëmaso chachin, Soa huiꞌnin. Chiminpachina, Cotaso sëtaton naꞌnërárin. Sëtërinsoꞌ inquihuachina, Tinato ninanoaꞌhuaquë paꞌnin. Ohuicanënpita yaꞌinapiroꞌsa inaquë yaꞌhuëapi niꞌton, paꞌnin nicapon. Amiconën Iro itopisorëꞌ paꞌnin. Irosoꞌ, Atoran piyapi. 13-14Tamaraso ina nitotaton, quëyoron aꞌmorinso ocoirin. Inaporahuaton, nitaparin. Niimomototërinsoꞌ nëꞌmëtëquë nipaꞌshinayatërin. Ama nohuitacaiso marëhuëꞌ naporin. Inaporahuaton, Inain ninanoaꞌhua yaꞌcariꞌ, huënsëconin. Inasoꞌ ninanoꞌ, Tinato iraquë yaꞌhuërin. Sira nani huiꞌnapitopirinhuëꞌ, co acoantopihuëꞌ niꞌton, shiin yanonpintërin. 15-16Cotari quënanahuaton, nipaꞌshinayatërinso marëꞌ: “Isoso sanapi, monshihuantëꞌ,” tënin. Napoaton pëshonin yaꞌcaricaso marëꞌ. Co shiin nohuitatonhuëꞌ, itapon:

—¿Canta quëmaroꞌco nii topirahuë? itërin.

—¿Maꞌta nipachin pahuërëaponco? tënin sanapintaꞌ.

17—Pëꞌtahuarahuësopita quëran, aꞌnara chipoaꞌhua aꞌpatiaranquën, itaantarin Cotari.

—Inta nipachin. Napoaponahuëꞌ, maꞌsha tëranta quëmaquën nininsoꞌ patëquëꞌ. Chipoaꞌhua aꞌpatianco huarëꞌ, cari tapaarahuë, itërin sanapiri.

18—¿Maꞌta nipachin pachi? tënin Cota.

—Sicho poꞌmoitëranën pëꞌnatëransoarë chachin, huaranën, inapita patëquëꞌ, itërin. Napotohuachina Cotasoꞌ, nataninsopita quëtërin. Inapoaton tëcarihuachina, naporo chachin huaꞌhuantërin. 19Ina quëran Tamarasoꞌ, paꞌpin yaꞌhuërinquë panantarin. Nipaꞌshinayatërinsoꞌ ocoirin. Aꞌmorinsonta ocoirahuaton, naquëranchin quëyoron aꞌmorinso aꞌmoantarin.

20Ina quëran Cotarisoꞌ, chipoaꞌhua aꞌpatërin. Amiconën Irori quëpatërin. Sanapi acoantërinsopita ayantacaso marëꞌ aꞌpatopirinhuëꞌ, inariso co huachi quënanconinhuëꞌ. 21Napohuachina, yaꞌhuëhuanoꞌsa natanin:

—Monshihuantë sanapi Inain ira pirayan huënsëyantërinsoꞌ: ¿Intohuata paꞌnin? itërin.

—Co isëquë monshihuantë sanapi yaꞌhuërinhuëꞌ, itopi. 22Napotohuachina, Cota yaꞌhuërinquë huëantarahuaton, itiintarin:

—Coꞌchi sanapi quënanconahuë paya. Yaꞌhuëhuanoꞌsantaꞌ: “Co isëquë monshihuantë sanapi yaꞌhuërinhuëꞌ,” itërinaco, itërin. 23Napotohuachina, Cotari itapon:

—Maꞌta pini. Noyatapon. Quëtërahuësopita yamapachin, main nipachin. Ina marëꞌ nanan ocoihuatëhuasoꞌ, piyapiꞌsa tëhuaponënpoaꞌ. Nanichi chipoaꞌhuaya aꞌpatochinpirahuëꞌ, co quëmari quënanconanhuëꞌ, itërin.

24Cara yoqui quëran pochin, Cota shaꞌhuitapona huëcapaipi:

—Shiparin Tamara itërëhuasoꞌ, monshihuanin. Napoaton iporasoꞌ cayorin huachi, itopi. Natanahuaton Cotasoꞌ, noꞌhuitaton yai tënin:

—¡Ocoirahuatomaꞌ, aꞌpëco chimiin! tënin. 25Yaꞌhuëhuanoꞌsari Tamara aꞌpëcaso marëꞌ ocoirapirinahuëꞌ, inaso shiin nanan aꞌpatërin: “Iso sicho poꞌmoitëra pëꞌnatërinsorë chachin nininsoꞌ huaꞌanën, napotërinco. Iso huarantaꞌ, inanquën chachin niꞌton, noya nicaton nohuitëquëꞌ,” itëquëꞌ, itërin. 26Cotasoꞌ, shiini aꞌpatërinsopita nohuitahuaton, naporin: “Tëhuënchachin caso co noyahuëꞌ ninahuëꞌ. Co Sira acoantatohuëꞌ, tëhuërahuë. Inaso nipirinhuëꞌ, noya noya ninin,” tënin. Naporo quëran huarëꞌ Cotasoꞌ, co huachi onporo tëranta shiin tëcariantarinhuëꞌ.

27Tamara huaicaso nanihuachina, catopiaꞌhuaya huaꞌhuatopi. 28-29Nasitapona napopi: Aꞌnaꞌton imiriaꞌhuain ocoirin. Napohuachina ahuaitonaꞌpiri, quëhuan piꞌshiquë, tonpotanpatërin. “Isoꞌton huaꞌhuacharin,” taꞌton, napotërin. Napopirinhuëꞌ, huaꞌhuashaso tanparaꞌhuain poꞌmoantarin. Shiarahuaton aꞌnasoꞌ, nasitochanin. Napoaton ahuaitonaꞌpiri nininën acotërin: Parisi#38.28-29 Parisisoꞌ: Pasoarinsoꞌ tapon naporin. itërin. “Yaꞌcopirinquënso inquirahuaton, pipiran,” itahuaton, inapochin nohuitërin. 30Quëhuan piꞌshiquë tonpotanpatërinsosoꞌ, ina piquëran huaꞌhuatërin. Inasoꞌ nohuitaton: Saro itërin.

Currently Selected:

Génesis 38: cbt

Highlight

Copy