Génesis 37

1Cacoposo nipirinhuëꞌ, Canaan parti quëparitërin yaꞌhuëcaso marëꞌ. Paꞌpincontaꞌ inaquë chachin yaꞌhuëaponahuëꞌ, co huaꞌquiyahuëꞌ yaꞌhuërin.

Cosi, iinpitarë chachin napopisoꞌ

2Cacopo huiꞌninpita naporinso shaꞌhuichinquëma nitotocoꞌ. Cosi shonca canchisë piꞌipitapon pochin, iinpitarë chachin paꞌpin ohuicanënpita aꞌpairin. Paꞌpin cosonanënpita: Pira, Siripa, inapita huaꞌhuinpitarëꞌ aꞌpairin. Iinpitaso co noyahuëꞌ nipi niꞌton, Cosisoꞌ paꞌpinquë yáshaꞌhuirapirin.

3Cacoposoꞌ aꞌnapita huiꞌninpita quëran, Cosi naꞌcon naꞌcon nosororin. Nani másho nicaquë huarëꞌ, Cosiso huaꞌhuatërin niꞌton, nosoromiatërin. Napoaton aꞌmocaso marëꞌ noyápiachin nininsoꞌ nitërin. 4Iinpitariso nipirinhuëꞌ, paꞌpini ina naꞌcon naꞌcon nosororinsoꞌ nicatonaꞌ, co quëꞌyapihuëꞌ. Co quëꞌyatonaraihuëꞌ, co nanitopihuëꞌ noya nontacaisoꞌ.

5-7Aꞌna tashi Cosi huaꞌnarin. Tahuëririnquë, iinpita shaꞌhuitërin:

—Natanco iyaroꞌsa huaꞌnarahuëso shaꞌhuichinquëmaꞌ: Huëꞌëhuëquë, iminquë yaꞌipinpoa trico masarëhuaꞌ. Manëhuasonta tonporarëhua niꞌnahuë. Aꞌnanaya ca tonporahuësosoꞌ, huanirin. Canpita tonporamasoso nipirinhuëꞌ, ca tonporahuësoꞌ mosharapi. Yaꞌipi tahuitatonaꞌ, monshopi quëran mosharapi, itërin. Ina natanahuatonaꞌ, iinpitariso aquë aquëtë noꞌhuipi. 8Napohuachina, inapitari itapon:

—Huaꞌan yaꞌconpato iyahuëpita camaiyápo ¿tocomaranquën ti? ¡Catoroꞌ quëma camaiyáponcoi! itopi. Huaꞌnarinso marëpita naꞌcon naꞌcon noꞌhuipi. Shaꞌhuihuachina, co yainhuëꞌ natanpi.

9Ina piquëran Cosisoꞌ, huaꞌnaantarin. Naporonta iinpita shaꞌhuitaantarin:

—Natanco iyaroꞌsa aꞌna huaꞌnaantarahuëso shaꞌhuitaantaꞌinquëmaꞌ. Huaꞌnato niꞌpirahuëꞌ, piꞌi, yoqui, shonca aꞌna tayoraroꞌsaꞌ, inapita monshorahuatona moshararinaco niꞌnahuë, itërin. 10Cosi ina huaꞌnarinsoꞌ, paꞌpin iinpita inapita shaꞌhuitohuachina, paꞌpini pënënaton itapon:

—¿Maꞌta tapon inapochinpita huaꞌna huaꞌnamantaransoꞌ? Napoahuarëꞌ mamaparin, iyaparinpita, ca chachiontaꞌ ¿aꞌna tahuëri moshaponquën ti? itërin. 11Iinpitariso noyapatonaꞌ, aquë aquëtë noꞌhuirápi. Paꞌpinso nipirinhuëꞌ, huiꞌnin naporinso naꞌcon yonquirárin.

Cosi paꞌanpisoꞌ

12Aꞌna tahuëri Cosi iinpitasoꞌ, Siquimo ninano yaꞌcari paꞌpi. Paꞌpina ohuicanënpita, chiponënpita inapita quëpapi pasto yonitona aꞌcacaiso marëꞌ. 13Naporoꞌ paꞌpini Cosi itapon:

—Niꞌquë conpa. Iya mashoroꞌsa Siquimo yaꞌcari yaꞌhuëapi. Inaquë ohuicaroꞌsaꞌ, chiporoꞌsaꞌ, inapita aꞌpairapi. Paaton niꞌcontaquë topirahuë, itërin.

—Noya tatapaꞌ. Paꞌi nipachin, itërin.

14—Inta conpa. Paꞌsahuaton iyamashoroꞌsa niꞌcontaquëꞌ. Ohuicaroꞌsaꞌ, chiporoꞌsaꞌ, inapitanta onpoinsona nisapisoꞌ, nahuicontaquëꞌ. Ina quëran huëꞌsahuaton, onpoapisona shaꞌhuitiico canta nitochi, itërin.

Cacoposo Ipron motopianaroꞌsa quëran, Cosi aꞌparin. Inaso paꞌsápaton Siquimoquë canconin. 15Ina parti chihuëaton paꞌsápirinhuëꞌ, aꞌna quëmapiri quënanahuaton itapon:

—¿Maꞌta yonisaran?

16—Iyahuëpita yonisárahuë taꞌa. ¿Co pora nitotëranhuëꞌ insëquësona pëꞌtahuanëna aꞌpaiyapiso to? itërin. 17—Nani isëquëran paꞌpi: “Totanquë paꞌahuaꞌ,” niitapi pora, itërin.

Cosiso paꞌsápaton, Totan ninano yaꞌcariya iinpita quënanconin. 18Inapitarintaꞌ, áquë quëran Cosi quënanpi. Quënanahuatonaꞌ, coꞌhuara yaꞌcarichátërasohuëꞌ, tëpacaiso marëꞌ aꞌnaroáchin yonquipi. 19Inahua capini ninontopi:

—¡Niꞌcoꞌ. Huaꞌnatonaꞌpi huëꞌsarin! 20Huëco tëpaꞌahuaꞌ. Inapotatëhua poso yaninantëquë poꞌmoaꞌahuaꞌ. Ina quëran “paꞌpiniri caꞌnin,” itahuaꞌ. Inapotohuatëhuaꞌ, ¿naniintaꞌma huaꞌnarinsopita paꞌ? niitopi. 21Nopinoso natanahuaton, Cosi paꞌpoyacaso marëꞌ itapon:

—Ama tëpaꞌahuasohuëꞌ. 22Co tëpatacaso yaꞌhuërinhuëꞌ. Iso inotëroquë yaninantë poso nininquë tëꞌyatocoꞌ. Ama canpitarisoꞌ maꞌsha onpotocosohuëꞌ, itërin. Iyaꞌhuain nanin quëran ocoirahuaton, paꞌpinquëꞌpaꞌ aꞌpaantacaso yonquiaton, naporin.

23Cosiso iinpitataquë canconpachina, noꞌhuitona noyápiachin aꞌmorinso matopi. 24Matahuatona yaninantë posoquë, tëꞌyatopi.

25Inapotahuatonaꞌ, coshatapi huachi. Coshatasoi niꞌpirinahuëꞌ, aꞌna huëntonaꞌ Ismairo nicatonoꞌsaꞌ, nioshirin huëꞌsapi. Carata parti quëran huëꞌsapi. Camiyonënaquë, pimo huaꞌsairoꞌsaꞌ, parsamo nimirio, pimo yaquiꞌ, inapita quësapi. Iquipitoquë paꞌanaponaꞌ, quëparapi. 26Naporoꞌ Cotaso iinpita itapon:

—¡Iyaꞌhua tëpahuatëhuaꞌ, co manta canarihuahuëꞌ! Naporahuaton inapotohuatëhuaꞌ, nonpi nonpínantacasoꞌ yaꞌhuapon. 27Ama tëpaꞌahuasohuëꞌ. Ismairo nicatonoꞌsa tëhuënchinsoꞌ paꞌantahuaꞌ. Noꞌhuípiro mini nipirinhuëꞌ, co nishahuëꞌ. Iyanpoaꞌ, tënin. Napohuachina, iinpitari: “¡Tëhuënchachinchi paya!” topi. 28Nicatonoꞌsa inataquëchin naꞌhuërahuachinara, iinpitari Cosi ocoipi. Yaninantë poso quëran ocoirahuatonaꞌ, nicatonoꞌsa paꞌantopi. Cato shoncatë coriqui pahuërëtohuachinara, Iquipitoquë quëpapi huachi.

29Nopinoso Cosi tëꞌyatopiquë huënantahuachina, co huachi iin quënanquintarinhuëꞌ. Paꞌpi paꞌyanaton aꞌmorinso osharin#37.29 Aꞌmorinso osharin: Ina parti yaꞌhuëpisopitasoꞌ, co napion ancantohuachinara, inapopi.. 30Ina quëran iinpitataquë huënantarahuaton, itiintarin:

—¡Iyaꞌhua capa huachi! ¡Maꞌhuantacha caso nisarahuë paya! tënin.

31Naporoꞌ iinpitasoꞌ, Cosi aꞌmorinso masahuatona chipo tëpapisoꞌ huënainënquë, asëꞌcotëtopi. 32Inapotahuatona paꞌpinaquë aꞌpapi. Quëpanaꞌpisoꞌ iso pochin pënënpi: “Iso aꞌmopiso quënanai. Noya niꞌquëꞌ. ¿Huiꞌnanquën aꞌna nimara ti?” itëquëꞌ, itahuatona aꞌpapi huachi.

33Cacoposoꞌ nohuitahuaton, tapon: “¡Iso mini huiꞌnahuë aꞌmorinsoꞌ!” tanan niꞌniri napotërin ipora, tënin. 34Napoapon pochin co napion cancantaton aꞌmorinso nioshatërin. Naporahuaton, saꞌcatën nininsoꞌ sëtohuachinara aꞌmopisoꞌ, aꞌmorin. Ina aꞌmorin quëran huiꞌnin chimininso marëꞌ huaꞌqui naꞌnërárin, ayanárin, naporárin. 35Yaꞌipi huiꞌninpitari achinicancanpirinahuëꞌ, inaso co nohuanchátërarinhuëꞌ, sëtërinso inquicasoꞌ. Aquë aquëtë huiꞌnin marëꞌ naꞌnëton, naporin: “Chimipiroꞌsa yaꞌhuërinquë huiꞌnahuë quënancontaꞌ huarëꞌ sëtërahuësoꞌ copi tapo,” tënin.

36Ismairo nicatonoꞌsasoꞌ, Iquipitoquë camapi. Camahuachinara, Cosiso aꞌnara quëmapi Potihuaro itopisoꞌ, paꞌantopi. Inasoꞌ, Iquipito copirnori catahuacaso marëꞌ acorin#37.36 Copirno catahuapisopitasoꞌ: Naporo tahuëriꞌsa macayoraꞌpiapi.. Capitan yaꞌconaton, copirno aꞌpaipisopita sontaroꞌsa camairin.

Currently Selected:

Génesis 37: cbt

Highlight

Copy