Génesis 27

Cacopo nonpinaton, iin yaꞌhuërëtërinsoꞌ

1Isaco noyá mashotohuachina, pëtorayataton co huachi quënantërinhuëꞌ. Aꞌna tahuëri huiꞌnin paninan Isao itopisoꞌ përarin. Huëꞌpachina:

—Conpa, itërin.

—Maꞌta tata yaꞌhuarahuë, itërin Isaori.

2—Niꞌquë conpa, nani caso mashotërahuë. Payo chiminapo huachi. 3Napoaton pëꞌchinanën, shinërënënpita, inapita masahuaton maꞌsha yoníquëꞌ. 4Nani tëpahuatan, costarincoso chachin poꞌmorahuaton, quëshico caꞌi. Ina quëran noya yaꞌhuëcamaso marëꞌ shaꞌhuitaranquën huachi. Coꞌhuara chiminyátërasocohuëꞌ, inapochinquën, itërin.

5-6Napoaponahuëꞌ, Nipicanta Isao napotërinso natanarin. Napoaton ina tananquë paaso chachin, aꞌnaroáchin Cacopo përaton shaꞌhuitërin:

—¡Natanquë huaꞌhua shaꞌhuichinquën. Nani iya masho tatari napotërinsoꞌ natayatërahuë! 7“Maꞌsha yoníquëꞌ. Nani tëpahuatan, costarincoso chachin poꞌmorahuaton, quëshico caꞌi. Ina quëran Sinioro niꞌtonënquë chachin noya yaꞌhuëcamaso marëꞌ shaꞌhuitaranquën huachi. Coꞌhuara chiminyátërasocohuëꞌ, inapochinquën,” itërin. 8Napoaton noya natanquë shaꞌhuichinquën. 9Pëꞌtahuaroꞌsa yaꞌhuërinquë paꞌsahuaton, cato chipoaꞌhua noya noyatopisoꞌ macontarahuaton quëshico. Cari, tata masho costarinso chachin poꞌmochi. 10Nani anpitohuato, quëmari quëpatëquë caꞌin. Inapotohuatan, quëma noya yaꞌhuëcamaso marëꞌ shaꞌhuitarinquën huachi. Coꞌhuara chimiyantërasohuëꞌ, inapochinquën, itërin.

11Aꞌshini napotopirinhuëꞌ, Cacoporiso itapon:

—Iyahuëso anporohuan. Caso nipirinhuëꞌ, tomapico. 12Tatahuë sëꞌhuahuachinco, nohuitarinco. Nohuitatonco: “Cacopo nonpintarinco,” topachin, co inapotatoncohuëꞌ ama huachi noya yaꞌhuëcaꞌhuaso marëhuëꞌ shaꞌhuitarinco, itërin.

13Itopirinhuëꞌ, aꞌshini itapon:

—Co huachi noya yaꞌhuëcamaso marëhuëꞌ shaꞌhuitohuachinquën huaꞌhua, ca marëꞌ niin. Quëmaso shaꞌhuitëranquënso chachin nicaton, cato chipoaꞌhua quëshico, itërin.

14Cacoposoꞌ, macontarahuaton aꞌshin quëshirin. Tëparahuaton, inari Isaco costarinso chachin, poꞌmotërin. 15Isao noya noya aꞌmorinsopita nëꞌmëtë pëinënquë taparinsontaꞌ, manin. Inaquë Cacopo aꞌmoantërin. 16Naporahuaton, chipoaꞌhua shaꞌhuëtë quëran, tanpaquënpita, cononën, inapita achinpitërin. 17Inapotahuaton, poꞌmorinso sënanquë oꞌhuintërin. Oꞌhuintahuaton, panë chachin paꞌpin quëtacaso marëꞌ huaꞌhuin quëtërin.

18Cacoposoꞌ, paꞌpin yaꞌhuërinquë yaꞌconahuaton, nontoonin:

—¡Tata! itërin.

—Yaꞌhuarahuë conpa. ¿Inso huiꞌnahuënquënta quëmasoꞌ? itërin paꞌpini.

19—Ca mini Isaoco, paninantërancosoꞌ. Nani shaꞌhuitërancosoꞌ quëshiranquën. Huënsëaton tata, maꞌsha inanahuësoꞌ, caꞌquëꞌ. Ina piquëran noya yaꞌhuëcaꞌhuaso marëꞌ shaꞌhuitoco huachi, itërin. 20Napotohuachina, Isacori natanapon:

—¿Onporahuatonta conpa aꞌnaroáchin quënan quënanaransoꞌ? itërin.

—Sinioro chinotëransoꞌ, inaso Yosë niꞌton, catahuarinco quënanaꞌhuasoꞌ, itërin Cacopori. 21Paꞌpiniso nipirinhuëꞌ, itaantarin:

—Yaꞌcarico nipachin sëꞌhuainquën. Tëhuënchachin Isaonquën ninanso yanitotërahuë, itërin. 22Napotohuachina, paꞌpini sëꞌhuacaso marëꞌ yaꞌcaririn. Sëꞌhuarahuaton, tapon: “Isao pochin tanpaquënsoꞌ niponahuëꞌ, Cacopo pochin nohuianantërahuë,” tënin. 23-24Isao tanpaquën pochin anporohuaninso marëꞌ co nohuitërinhuëꞌ. Napoaponahuëꞌ coꞌhuara noya yaꞌhuëcaso marëꞌ shaꞌhuichátërasohuëꞌ, naquëranchin nataantarin:

—¿Tëhuënchachin quëma Isaonquën? itaantarin.

—Inaco mini, itërin Cacopori. 25Napotohuachina, Isacori itapon:

—Acotoco nipachin conpa inantëranso caꞌi. Ina quëran nani coshatohuato, noya yaꞌhuëcamaso marëꞌ shaꞌhuitaranquën huachi, itërin. Napotohuachina, Cacoposoꞌ paꞌpin capacaso acotërin. Huinonta quëshirin. Isacosoꞌ, noya coshatahuaton, oꞌorin, naporin. 26Inaporahuaton huiꞌnin itapon:

—Yaꞌcariatonco conpa apinoco, itërin. 27Cacopori paꞌpin apinocaso marëꞌ yaꞌcaritohuachina, Isacori aꞌmorinso huëꞌëropinën imërin.

Naporoꞌ noya yaꞌhuëcaso marëꞌ iso pochin shaꞌhuitërin:

“Naporin taꞌa, ina pochin mini huëꞌëropitëran.

Siniorori catahuahuachina imin noya noyatërin.

Napohuachina pimoanahuaninso pochin quëmanta huëꞌëropitëran.

28Yosë nontërahuë ina nohuanton oꞌnan yaꞌhuëchinquën.

Shaꞌtohuatan noya noya nitacaso marëꞌ yaꞌhuëchinquën.

Aꞌnapita nitërinsoꞌ mapi quëran, noya noya maquë quëmasoꞌ.

Notohuaroꞌ trico nitërinsoꞌ maquë capamasoꞌ.

Notohuaroꞌ huinonta yaꞌhuëchinquën oꞌocamasoꞌ.

29Huaꞌhuayátërahuë piyapiꞌsa camaiquëꞌ.

Nacionoꞌsanta tëꞌhuatatënën natëinënquën.

Iyaparinpitanta camaiquëꞌ. Tëꞌhuatatënën inapitanta natëinënquën.

Noꞌhuitënën co huachi noya yaꞌhuëcamaso marëhuëꞌ shaꞌhuitohuachinën, Yosërinta inapotarin.

Inpitasona noya yaꞌhuëcaso marëꞌ shaꞌhuitohuachinën, Yosërinta inapotarin,” itërin.

30Isacori, Cacopo noya yaꞌhuëcaso marëꞌ shaꞌhuitërinsoꞌ, tonitërin. Tonitohuachina, inaso paꞌpin yaꞌhuërin quëran pipirin. Pipiso chachin, Isaonta inantapon paꞌnin quëran huëntararin huachi. 31Huëntarahuaton, inantërinso poꞌmointarin. Anpirahuaton, paꞌpin quëpataton, itapon:

—Huënsëquë tata, inantërahuëso poꞌmotëranquën caꞌquëꞌ. Capaton noya yaꞌhuëcaꞌhuaso marëꞌ shaꞌhuitoco huachi, itërin. 32Napotohuachina Isacori natanin:

—¿Inquënta quëmasoꞌ? itërin.

—Ca mini Isaoco, paninatërancosoꞌ, itërin. 33Huiꞌnin natanahuaton, Isaco paꞌpi paꞌyantërin. Paꞌyanaton ropa ropátarin quëran itapon:

—¿Inta nipachin apípora inantërinso poꞌmorahuaton, quëshirinco? Co quëma canquiyátërasënquënhuë quëshirinco niꞌton, nani yaꞌipi caꞌnahuë: “Isao mini,” taꞌto, nani noya yaꞌhuëcaso marëꞌ shaꞌhuitërahuë. Ipora inasoꞌ, noya noya yaꞌhuapon huachi, itërin. 34Paꞌpin naporinso natanahuaton, Isaoso co napion cancantaton naꞌnëmiatërin. Naꞌnëton paꞌpin nontërin:

—¡Canta tata, noya yaꞌhuëcaꞌhuaso marëꞌ shaꞌhuitoco! itërin 35Itopirinhuëꞌ, paꞌpini itapon:

—Iyaaꞌhua huëꞌsahuaton nonpintiirinco taꞌa. Quëma pochin ancantato, noya yaꞌhuëcaso marëꞌ shaꞌhuitërahuë, itërin.

36—¡Noꞌtën chachin inasoꞌ, Cacopo itopi paya! ¡Nani catoro monararinco! Paninan ninahuëso marëꞌ yaꞌhuëtiincoso nininsoꞌton, matërinco. Iporantaꞌ, tatahuë noya yaꞌhuëcaꞌhuaso marëꞌ shaꞌhuitiincosoꞌ mataantarinco. ¿Coꞌtama cantaꞌ, piꞌpiyan tëranta noya yaꞌhuëcaꞌhuaso marëꞌ shaꞌhuitaponcohuëꞌ to? itërin. 37Napotohuachina, Isacori itapon:

—Niꞌquë conpa: Nani Cacopo shaꞌhuitërahuë camairápainquënsoꞌ. Yaꞌipi quëmopinënpita camairápaso marëꞌ nani shaꞌhuitërahuë. Huaꞌhuayátërahuë, trico, huino, inapita yaꞌhuëtacaso marëꞌ Yosë nontërahuë. Inasá tiquiantërahuë niꞌton, ¡quëma marësoꞌ capa huachi taꞌa! itërin. 38Itopirinhuëꞌ, Isaoriso chiníquën nontaantarin:

—¿Iyayáchin noya yaꞌhuëcaso marëꞌ shaꞌhuitacaso yaꞌhuërin ti? ¡Canta onpopionta inapotoco! itërin. Napotahuaton chiníquën naꞌnëantarin.

39-40Napohuachina, Isacori itapon:

“Quëmaso nipirinhuëꞌ, noyaroꞌpaꞌ aquëtë yaꞌhuaran.

Oꞌnan pahuaninquë yaꞌhuëapon.

Noya yaꞌhuëcaso marëꞌ ahuëtápamaso yaꞌhuapon.

Iyaꞌhua camairáponquën.

Napoaponahuëꞌ, chini chiníquën nipatan,

iyaꞌhua quëran, pipiaran huachi,” itërin.

Cacopo iin taꞌananpirinsoꞌ

41Naporo quëran huarëꞌ Isaori Cacopo paꞌpi noꞌhuirin huachi. Inasá paꞌpini noya yaꞌhuëcaso marëꞌ shaꞌhuitërin niꞌton, naporin. Napoaton yonquirárin: “Payo tata chiminapon. Ina chiminpachin, Cacopo tëpaarahuë,” tënin. 42Isao napo yonquitërinsoꞌ, Nipicaso nitotërin. Napoaton Cacopo amatahuaton, itapon:

—Niꞌquë huaꞌhua. Iya masho, napotëranso marëꞌ yatëparinquën natantërahuë. 43Napoaton noya natanco shaꞌhuichinquën. Aꞌnaroáchin Aran ninanoquë taꞌaquëꞌ. Api masho Napano pëinënquë paquëꞌ. 44-45Inaquë paaton, huaꞌquimiachin yacapaontaquëꞌ. Iya masho noꞌhuitërinsoꞌ sanoquë huarëꞌ, inaquë yaꞌhuëcontaquëꞌ. Co huachi quënanpachinquënhuëꞌ, napotëransoꞌ naniantapon. Naporoꞌ huënantamaso marëꞌ amataranquën. Co nohuantërahuëꞌ naporo chachin catonquëma chiminamasoꞌ, itërin.

46Ina quëran Nipicasoꞌ, Isaco nontapon paꞌnin:

—Iti sanapiꞌsa Isaori maninsoꞌ co noyahuëꞌ nipi niꞌton, chiminchináchin cancantërahuë. Cacopo yaꞌhuërëꞌ ina sanapi chachin, iso Canaan roꞌtëquë yaꞌhuërinso maantahuachin, chiminaꞌhuaso noya noya nisarin, tënahuë, itërin.

Currently Selected:

Génesis 27: cbt

Highlight

Copy