Génesis 26

Isaco Quiraro ninanoquë naporinsoꞌ

1Naporo tahuëriꞌsa Isaco yaꞌhuërinso parti panca tanarotopi. Apraan nanpiso tahuëriꞌsa napopiso pochin, ninin. Napoaton saꞌin, piyapinënpita, inapitarë chachin Quiraro ninanoquë paꞌpi. Huiristino copirno, Apimirico itopiso yaꞌhuërinquë paꞌpi. 2Inaquë Siniorori yaꞌnotahuaton, itërin: “Ama Iquipitoquë paꞌmaquësohuëꞌ. Insëquësona quëparitacasoꞌ, carinquën shaꞌhuitaranquën. 3Ipora marësoꞌ, iso noꞌpaquë yaꞌhuëtacoꞌ. Carinquën caꞌtanatënquën catahuararanquën. Yaꞌipi iso noꞌpaꞌ, carinquën quëtaranquën. Shiparinpitantaꞌ, ina chachin quëtarahuë. Tataparin Apraan nani shaꞌhuitërahuë niꞌton, quëtaranquëmaꞌ. 4Ca nohuanto quëma shiparinpita, naꞌamiataponaꞌ. Tayoraroꞌsa piꞌiroꞌtëquë yaꞌhuërinso nápo, yaꞌhuaponaꞌ. Inapitari yaꞌipi iso noꞌparoꞌsa huaꞌanëntaponaꞌ. Naporahuaton, yaꞌipi isoroꞌpaquë nacionoꞌsa yaꞌhuërinsopitantaꞌ, shiparinpita quëran catahuararahuë. 5Apraansoꞌ: Yaꞌipi shaꞌhuitërahuësopita, camairahuësopita, pënënahuësopita, aꞌchintërahuësopita, yaꞌipi inapita natërin niꞌton, napoarahuë,” itërin.

6Siniorori napotohuachina, Quiraro ninanoquë quëparitopi. 7Yaꞌhuëhuanoꞌsari Nipica niꞌsahuatonaꞌ, soꞌin natanpachinara: “Saꞌahuë,” taꞌcaso nipirinhuëꞌ, tëꞌhuaton nonpinin: “Oshihuë,” tënin. “Nipica noyápiroyanchin niꞌton, yaꞌhuëhuanoꞌsari macaponaꞌ. Yaꞌhuërëꞌ caso tëpaponaco,” taꞌton naporin.

8Huaꞌqui quëran pochin Apimiricosoꞌ, huintananën quëran notëtarin. Notëtapirinhuëꞌ, Isacori Nipica apinorarin quënanin. 9Naporoꞌ amatahuaton:

—¡Nipicasoꞌ, saꞌan tënahuë! Ina niponahuëꞌ: ¿Onpoatontaꞌ, “oshihuë,” tënan? itërin.

—“Ina naꞌintërinco tëpaponaco casoꞌ,” taꞌto naporahuë, itërin Isacori. 10Napopirinhuëꞌ, Apimiricori itapon:

—¡Co napochitoncoihuë pora! Onpichin saꞌan inso yaꞌhuëhuani tërantaꞌ, ichihuëꞌërin. Ina marëꞌ quiyasoꞌ oshahuaintoihuëꞌ, itërin. 11Napotahuaton, piyapinënpita camairin:

—Inquëma tëranta iso quëmapihuë nipon, saꞌinhuë nipon sëꞌhuahuatamaꞌ, tëhuënchachin chiminaramaꞌ, itërin.

12Ina piꞌiquë Isaco inaquë iminapatërin. Shaꞌtohuachina, Yosëri catahuarin niꞌton, paꞌpi notohuaroꞌ nitërinsoꞌ manin. 13Notohuaroꞌ maꞌsha yaꞌhuëtahuaton, paꞌpi maꞌhuan quëparitërin. 14Paꞌpi notohuaroꞌ ohuicaroꞌsaꞌ, ohuacaroꞌsaꞌ, piyapinënpita, inapita yaꞌhuëtërin. Ina marëꞌ huiristinoꞌsari noyapatonaꞌ, noꞌhuipi. 15-17Napoin quëran Apimiricori Isaco itapon:

—Quëmasoꞌ quiya quëran naꞌcon naꞌcon maꞌhuanan niꞌton, pipiquë huachi, itërin. Napotohuachina Isacosoꞌ, saꞌin, piyapinënpita, pëꞌtahuanënpitarë chachin paꞌpi. Quiraro motopianaquë, paꞌsahuatonaꞌ, inaquë quëparitopi. Iráca Apraan nanpipon, ina piyapinënpitari posoroꞌsa ihuapisoꞌ, huiristinoꞌsari amëntarotopi.

18Inaquë yaꞌhuëapona pochin, naquëranchin ina posoroꞌsa ihuaantararin. Iráca paꞌpincori nanpipon ihuapisopita, inapotaantapi. Ina chiminpachina huiristinoꞌsari, amëntarotopirinahuëꞌ, ina posoroꞌsa chachin ihuaantarin. Iráca paꞌpincori ina posoroꞌsa nohuitërinso chachin, inarinta nohuitaantarin.

19Aꞌna tahuëri Isaco piyapinënpitari motopianaquë aꞌna poso ihuarapi. Ihuarapirinahuëꞌ, noꞌpa quëran iꞌ pipirinsoꞌ quënanpi. 20Napoaponahuëꞌ, Quiraro motopianaquë, huiristinoꞌsa ohuicanëna aꞌpaipisopita, noꞌhuitopi. Isaco ohuicanënpita aꞌpaipisopitarëꞌ, ninoꞌhuitona niahuëpi: “¡Iso iꞌshasoꞌ, quiyaquën!” Niitatonaꞌ, niahuëpi. Napoaton Isacori, apoyatërin: “Niahuëyatopisoꞌ poso,” itërin. 21Ina piquëran piyapinënpitari, aꞌna yaꞌhuërëꞌ ihuaantapi. Ina marëntaꞌ, naquëranchin niahuëantapi. Inantaꞌ, Isacori apoyataantarin: “Niinimicotopisoꞌ poso,” itërin. 22Isacosoꞌ, saꞌin, piyapinënpita, pëꞌtahuanënpita, inapitarë chachin, áquë paꞌpi huachi. Inaquë aꞌna poso ihuantapi. Ina marësoꞌ co huachi niahuëpihuëꞌ niꞌton: “Chaꞌëpisopita, posonën,” itërin. “Ipora tëhuënchinsoꞌ Sinioro nichaꞌërinpoa noya noya isëquë yaꞌhuëcaso marëꞌ” taꞌton, ina pochin ina poso nohuitërin.

23Ina quëran, Piirsipa parti paantapi. 24Naporo tashi Siniorori yaꞌnotahuaton itapon:

“Caso Yosëco. Tataparin Apraan chinotërinco.

Ama tëꞌhuaquësohuëꞌ.

Carinquën caꞌtanatënquën catahuamiataranquën.

Piyapinëhuë Apraan natërinco niꞌton,

ca nohuanton shiparinpita naꞌamiatapon,” itërin.

25Napotohuachina Isacosoꞌ, aꞌnara artaro inaquë ninin. Ina nisahuaton, Sinioro chinotërin. Inaquë yaꞌhuapona pochin piyapinënpitari aꞌna yaꞌhuërëꞌ poso ihuaantapi.

Isaco Apimiricorë anoyatërinsoꞌ

26Aꞌna tahuëri Apimiricosoꞌ, Quiraro quëran Isaco nontapon huëꞌnin. Aosato, Huicoro, inapitari caꞌtanin. Aosatosoꞌ, amiconën. Huicoroso nipirinhuëꞌ, capitan, sontaronënpita camairinsoꞌ. 27Canquihuachinara, Isacori itapon:

—Canpitaso co quëꞌyatomacohuëꞌ, yaꞌhuërama quëran ocoiramaco. ¿Maꞌmarëta iporasoꞌ yaniantaramaco? itërin.

28—Tëhuënchachin quëmasoꞌ, Sinioro catahuamiatërinquën niꞌnai. Napoaton yonquirai quëmarëꞌcoi anoyataꞌhuaisoꞌ. Iso pochin anoyatahuaꞌ: 29Quiyaso yaꞌhuëraiquë, co maꞌsha onpotërainquënhuëꞌ, noya nicatëinquën, noya quëran aꞌparainquën. Napoaton quëmantaꞌ, ama maꞌsha onpotocoisohuëꞌ. Yosë quëmasoꞌ ipora noya nicatënquën catahuarinquën niꞌton, napotarainquën, itërin. 30Napotohuachinara, naporo chachin Isacori panca pita nitërin niꞌton, coshatopi, oꞌopi, napopi. 31Tahuëririnquë tashiramiachin, huënsëantahuachinara itohuara capini: “Yoscoarëꞌ noya niniꞌtëhuaꞌ yaꞌhuarihuaꞌ,” nitopi. Ina quëran, nani anoyatahuatonaꞌ: “Paꞌsarai huachi,” topachinara, Isacori itapon: “Osharan pacoꞌ, Yosë catahuainquëmaꞌ,” itërin.

32Naporo tahuëri chachin, Isaco piyapinënpitari huëꞌsahuatonaꞌ, shaꞌhuitiipi: “Poso ihuaráraisoꞌ, nani iꞌsha quënanai,” itiipi. 33Napotohuachinara, Apimiricorë anoyatatonaꞌ: Yoscoarëꞌ niitopisoꞌ, yonquiaton, ina pososoꞌ aninihuanin, “Sipa” itërin. Napoaton ina ninanosoꞌ, ipora Iso quirica ninshitasoco huarëntaꞌ Piirsipa itopi.

34Isao catapini shonca piꞌipitohuachina, Cotita manin. Inasoꞌ, Piiri itopisoꞌ huiꞌnin. Piirisoꞌ, Iti piyapi. Ina piquëran Isaosoꞌ, aꞌna maantarin, Pasima itopisoꞌ. Inasoꞌ, Iron huiꞌnin. Ironta Iti piyapi chachin. 35Ina catoroꞌsa co Yosë imatonahuëꞌ, Isaco, Nipica inapita naꞌcon asëtatonaꞌ, aparisitopi.

Currently Selected:

Génesis 26: cbt

Highlight

Copy