Efesios 5

Yosë imatëhuaꞌ, noyasáchin niahuaꞌ

1Yosë nosoroatonpoaꞌ, huiꞌninpita pochin niꞌninpoaꞌ. Tatanpoaꞌ niꞌton, ina nonahuanꞌ. 2Quisocristo nosoroatonpoaꞌ, canpoa marëꞌ chiminin. Oshanënpoa marëꞌ chiminpachina, Yosëri noya niꞌnin. Napoaton canpoantaꞌ nani tahuëriya inapochachin ninosoroaꞌahuaꞌ Yosë noya niꞌinpoaꞌ.

3Yosë anoyacancantërinquëmaꞌ niꞌton, ama iyaroꞌsaꞌ monshihuancosohuëꞌ. Ama aꞌna quëmapi saꞌin noyapacosohuëꞌ. Ama maꞌsharáchin cancantatomaꞌ, apiracosohuëꞌ. Ama aꞌnapita tëranta ina pochin nipiso shaꞌhuitocosohuëꞌ. 4Ama taparoꞌ ninontocosohuëꞌ. Ama narinacasoachin yonquicosohuëꞌ. Co topinan quëran ninontacasoꞌ yaꞌhuërinhuëꞌ. Yosë catahuarinpoasoꞌ naꞌcon naꞌcon nishaꞌhuitatëhuaꞌ: “Yosparinquën Sinioro,” itahuaꞌ. 5Monshihuanpatamaꞌ, co Quisocristo huëntonënquë yaꞌconamahuëꞌ. Taparoꞌ nininsoꞌ nipatamaꞌ, co imaramahuëꞌ. Maꞌsharáchin yonquihuatamaꞌ, co tëhuënchachin Yosë yonquiaramahuëꞌ. Nani maꞌsha nohuantohuatamaꞌ, mamanshi moshapiso pochin niconamaꞌ. Ina nitotatomaꞌ iyaroꞌsaꞌ yonquicoꞌ. 6Aꞌnaquën yanonpintatënënquëmaꞌ, napopi: “Quisocristo imapomarahuëꞌ, maꞌsona nohuantëramasoꞌ nicoꞌ, co anaꞌintarinquëmahuëꞌ,” itopirinënquëmahuëꞌ, ama piꞌpian tërantaꞌ natëcosohuëꞌ. Co Yosë natëpisopitahuëꞌ chiníquën anaꞌintarin. 7Napoaton ama inapitarëꞌquëmaꞌ nipayacosohuëꞌ.

8Iráca tashi pochin cancantopiramahuëꞌ, iporasoꞌ Yosë imaramaꞌ niꞌton, anoyacantërinquëmaꞌ tahuëri pochin nicacamaso marëꞌ. Napoaton tahuëri pochin nicoꞌ. 9Tahuëri pochin cancantohuatamaꞌ, nóya nisaramaꞌ. Noꞌtëquënáchin yonquiatomaꞌ, noyápiachin cancantaramaꞌ. 10Noya yonquiatomaꞌ, Yosë nohuantërinsoꞌ nitotocoꞌ. Ina nitotohuatamaꞌ, yaꞌipiya natëcoꞌ. 11Aꞌnaquën tashi pochin cancantatonaꞌ, co noyahuëꞌ nipi. Topinan quëran yaꞌhuërapi niꞌton, ama inapita pochin cancantocosohuëꞌ. Noꞌtëquën shaꞌhuitocoꞌ co noyahuëꞌ nipisopita naniantacaiso marëꞌ. 12Paꞌpi co noyahuëꞌ nipi. Poꞌoana quëran aꞌnaratipita nipi. Napopiso aꞌninquëchin shaꞌhuirahuëꞌ naporini, paꞌpi tapaintërihuahuëꞌ. 13Noyasáchin nipatëhuaꞌ, oshahuanoꞌsaꞌ oshaquëran yonquiapi. “Tëhuënchachin co noyahuëꞌ ninëhuaꞌ,” tosapi. 14Tahuëri nipachina, yaꞌipi quënanëꞌ. Ninshitatona napopiso chachin ninin.

“Co noyahuëꞌ nipatamaꞌ, huëꞌërëso pochin cancantaramaꞌ.

Ama ina pochin cancantatomarahuëꞌ, Yosë yonquicoꞌ.

Chimipi pochin cancantohuatamaꞌ, Yosë nontocoꞌ nasha cancan quëchinquëmaꞌ. Ina quëran nanpiantarëso pochin cancantaramaꞌ.

Quisocristo chachin aꞌpintarinquëmaꞌ noya nicacamaso marëꞌ,” topi.

15Napoaton iyaroꞌsaꞌ noya yonquiatomaꞌ yaꞌhuëcoꞌ. Aꞌnaquën co mantaꞌ yonquipihuëꞌ. Ama inapita pochin cancantocosohuëꞌ. Noꞌtëquën yonquicoꞌ. 16Ama tahuëri chiniacosohuëꞌ. Iporasoꞌ naꞌa piyapiꞌsaꞌ co noyahuëꞌ cancantopi. Napoaton apira apira aꞌnapita catahuacoꞌ Yosë yonquicaiso marëꞌ. Onpopiontaꞌ nanamën anitotocoꞌ. 17Ama topinan quëran yaꞌhuëcosohuëꞌ. Yosë nohuantërinsoꞌ nitotatomaꞌ, natëcoꞌ. 18Aꞌnaquën noꞌpicasoáchin cancantopi. “Huëcoꞌ noꞌpiahuaꞌ. Capa cancantahuaꞌ,” nitopirinahuëꞌ. Ama canpitasoꞌ noꞌpicosohuëꞌ, nishacancantotamaꞌ. Yosë nontocoꞌ Ispirito Santo noyá yaꞌcoancanchinquëmaꞌ. Nani tahuëri yaꞌcoancantomiachinquëmaꞌ. Ina quëran co noꞌpipomarahuëꞌ, tëhuënchachin capa cancantomiataramaꞌ. 19Yosë quiricanënquë cantapisoꞌ yonquiatomaꞌ, nishaꞌhuitocoꞌ. Yosë cantanën cantacoꞌ. Nisha nisha cantanën cantatomaꞌ, yaꞌipi cancanëma quëran Yosë chinotocoꞌ. 20Nani tahuëri Tata Yosë nontatomaꞌ: “Yosparinquën,” itocoꞌ. Maꞌsha onpoapomarahuëntaꞌ, noya cancantocoꞌ. “Sinioro Quisocristo nanan quëtërinco niꞌton, nontaranquën,” taꞌtomaꞌ Yosë nontocoꞌ.

Quëmapiꞌsaꞌ saꞌinarë chachin pënëninsoꞌ

21Quisocristosoꞌ huaꞌanëmaꞌ niꞌton, ina yonquiatomaꞌ, imaramasopita capini nicatahuacoꞌ. Yaꞌipinquëmaꞌ nipënënatomaꞌ, ninatancoꞌ. 22Sanapiꞌsaꞌ Sinioro natëtonaꞌ, soꞌinantaꞌ natëinaꞌ. 23Imarëhuasopitasoꞌ Quisocristo nonën pochin ninëhuaꞌ. Inasoꞌ huaꞌanënpoaꞌ niꞌton, camairinpoaꞌ. Yaꞌipi imarëhuasopita nichaꞌësarinpoaꞌ. Napoaton inasáchin natëcasoꞌ yaꞌhuërin. Inapochachin quëmapiꞌsaꞌ saꞌina quëran chini chiníquën nanantërin. Napoaton sanapiꞌsaꞌ soꞌinaꞌ natëinaꞌ. 24Imarëhuasopita Quisocristo natërëhuaso pochachin sanapiꞌsantaꞌ soꞌinaꞌ natëinaꞌ.

25Quëmapiꞌsantaꞌ saꞌinaꞌ nosoroꞌinaꞌ. Quisocristosoꞌ imarëhuasopita naꞌcon nosororinpoaꞌ. Nosoroatonpoaꞌ, yaꞌhuërënamënpoaꞌ chiminin. Ina nosororinpoaso pochachin quëmapiꞌsaꞌ saꞌinaꞌ nosoroꞌinaꞌ. 26Quisocristo chiminin anoyacancantinpoaso marëꞌ. Nanamën natëhuatëhuara, noyápiachin cancan quëtërinpoaꞌ. Iꞌquë amarëso pochin oshanënpoaꞌ inquitërinpoaꞌ. 27Yaꞌipi imarëhuasopita noya noya acoinpoaso marëꞌ naporin. Co piꞌpian tërantaꞌ nëꞌhuëtërinso pochin cancantacasoꞌ nohuantërinhuëꞌ. Napoaton yaꞌipi co noyahuëꞌ yonquirëhuasopita inquitërinpoaꞌ. Noyápiachin cancan quëtërinpoa niꞌton, noya niꞌsarinpoaꞌ. 28Inapochachin quëmapiꞌsaꞌ saꞌinaꞌ nosoroꞌinaꞌ. Inahuara nonëna pochin nicatonaꞌ, nosoroꞌinaꞌ. Insosona saꞌin nosorohuachin, inaora ninosoroarin. 29Co insontaꞌ inaora ninoꞌhuirinhuëꞌ. Tanahuachina, coshatërin. Canotohuachina, chinotërin. Noya ina pochin ninosororin. Quisocristo imarëhuasopita nosororinpoaso pochin ninin. 30Imarëhuasopitasoꞌ inaora nonën pochin niꞌninpoaꞌ niꞌton, aꞌnaya aꞌnayanpoaꞌ nosororinpoaꞌ. 31“Napoaton quëmapi saꞌapachina, co huachi paꞌpin, aꞌshin, inapita naꞌcon naꞌcon yonquicasoꞌ yaꞌhuërinhuëꞌ. Saꞌin naꞌcon naꞌcon yonquiaton, chinpitacasoꞌ yaꞌhuërin. Catoꞌ piyapi nipirinhuëꞌ, aꞌnaíchin pochin Yosëri niꞌnin,” tënin quiricanënquë. 32Inasoꞌ sacaiꞌ nitotacasoꞌ. Caso nipirinhuëꞌ Quisocristo noya yonquirinpoasoꞌ shaꞌhuitaranquëmaꞌ. Yaꞌipi imarëhuasopita inarëꞌquënpoaꞌ nichinpitërëhuaꞌ niꞌton, aꞌnaíchin pochin Yosë niꞌninpoaꞌ. 33Canpitantaꞌ iyaroꞌsaꞌ, saꞌamaꞌ naꞌcon nosorocoꞌ. Canpitaora ninosororamaso pochachin saꞌamaꞌ nosorocoꞌ. Sanapiꞌsanquëmantaꞌ soꞌyamaꞌ noya niꞌcoꞌ. Noya nicatomaꞌ, natëcoꞌ.

Currently Selected:

Efesios 5: cbt

Highlight

Copy