1 Tesalonicenses 3

1Huaꞌquiꞌ co niꞌnainquëmahuëꞌ. Co nanan tërantaꞌ natantëraihuëꞌ. Napoaton co huachi ahuantatoihuëꞌ, “Quiyaora Atinasëquë quëparichii,” taꞌtoi, 2Timotio aꞌpatërainquëmaꞌ nitotacaso marëꞌ. Inantaꞌ noya imarin. Yosëri acorin Quisocristo nanamën aꞌchinacaso marëꞌ. Achinicancainquëmaso marëꞌ aꞌpatërainquëmaꞌ. 3Canpitantaꞌ parisitapiramahuëꞌ, co nohuantëraihuëꞌ nisha nisha yonquicamasoꞌ. Co ina marëꞌ aꞌpocasoꞌ yaꞌhuërinhuëꞌ. Quisocristo imapatëhuara, aparisitërinënpoaꞌ. Yosë nohuanton, ina marëꞌ parisitarëhuaꞌ, nani nitotëramaꞌ. 4Canpitataquë yaꞌhuasocoi, shaꞌhuitërainquëmaꞌ. “Imarëhuaso marëꞌ aparisitarinënpoaꞌ,” itërainquëmaꞌ. Napotërainquëmaso pochachin iporasoꞌ aparisitarinënquëmaꞌ. 5Napoaton casoꞌ co huachi ahuantatohuëꞌ, Timotio aꞌpatëranquëmaꞌ onpopinsona imaramasoꞌ nitotaꞌhuaso marëꞌ. Sopai yanonpintërinpoaꞌ Yosë aꞌpocaso marëꞌ. Minsërinquëmaꞌ naporini, topinan quëran aꞌchinchitënquëmahuëꞌ. “Co huachi noya imamaraihuëꞌ,” taꞌtoi, Timotio aꞌpatërainquëmaꞌ.

6Iporasoꞌ nani huënantaton, nanan shaꞌhuitiirincoi. “Ipora huantaꞌ noya imasapi. Inahua capini noya ninosoroapi,” itiirincoi. Naꞌcon yonquiramacoi. Quiya pochin cancantatomaꞌ, canpitantaꞌ yaniꞌnamacoi. 7Inantaꞌ shaꞌhuitiirincoi. Ina natantatoi, nóya cancantërai. Ipora huantaꞌ maꞌsha onpotërinacoi. Parisitapiraihuëꞌ, noya imaramaꞌ niꞌton, noya cancantarai. 8Quisocristo imamiataramaꞌ niꞌton, co huachi sëtëraihuëꞌ. Chiníquën cancantarai. 9Capa cancantërai niꞌton, ¿onporahuatëicha noya noya: “Yosparinquën Tata Yosë,” ichii? ¡Coꞌchi nanitëraihuë paya! 10Nani tahuëri tashirë chachin Yosë nontarai canpitataquë pacaꞌhuaiso marëꞌ. Co yaꞌipi Yosë nanamën nitochátëraramahuëꞌ. Pahuantarinquëmaꞌ niꞌton, ina aꞌchinchinquëmaꞌ noya noya imacamaso marëꞌ, tënahuë.

11Tata Yosë chachin catahuaincoi onpopiontaꞌ paꞌii. Sinioro Quisosontaꞌ catahuahuachincoi, paꞌsarai nicapoinquëmaꞌ. 12Naꞌcon nosororainquëmaꞌ. Inapochachin canpita capinintaꞌ ninosorocamasoꞌ yaꞌhuërin. “Catahuaquëꞌ Sinioro noya noya ninosoroꞌinaꞌ. Yaꞌipi piyapiꞌsaꞌ nosoroꞌinaꞌ,” itërahuë, Yosë nontato. 13Noya ninosorohuatamaꞌ, Quisocristo achinicancanarinquëmaꞌ noyasáchin nicacamaso marëꞌ. Catahuahuachinquëmaꞌ, noyápiachin cancantaramaꞌ. Ina quëran Quisocristo oꞌmantahuachin, Yosë noya niꞌsarinquëmaꞌ. Aꞌna tahuëri yaꞌipi piyapinënpitarë chachin oꞌmantararin.

Currently Selected:

1 Tesalonicenses 3: cbt

Highlight

Copy