Knt 3
3
Sa' li tenamit chiru q'oqyink
Li ixq
1Chiru li q'oqyink, sa' linwarib',
xinsik' li xrahom li waanm.
Xinsik', ab'an ink'a' xintaw.
2Jo'kan naq tinwakliiq ut tinb'eeni li tenamit:
sa'eb' li b'e ut li k'ayiil
tinsik'i li xrahom li waanm.
Xinsik', ab'an ink'a' xintaw.
3Xine'xtaw eb' laj k'aak'alenel
li neke'xb'eeni li tenamit chiru q'oqyink:
“Ma xe'ril ru li xrahom li waanm?”, chankin.
4Toje' ajwi' teb'inkanab',
naq xintaw li xrahom li waanm.
Xinq'alu ut ink'a' chik tinkanab' chi xik,
toj reetal twoksi sa' rochoch linna',
toj sa' xwarib'aal li x'alank we.
5Nintz'aama cheru, ex rixqilal Jerusalén,
sa' xk'ab'a'eb' li kej ut li yuk li wankeb' sa' k'iche',
meerajsi ut meerisi xwara linrahom,
toj a'an yaal re.#3,5 Knt 2,7; 8,4.
Li xk'ojarib'aal laj Salomón
Eb' laj b'ichanel
6K'aru a'an li yo chaq chi taqe'k sa' li chaqich'och',
chanchan wi' li sib' nab'utz'utz'nak,
sa' xyanq xsib'el li miir ut k'ajpom,
jo'wi' rik'in xb'ook li k'iila paay chi sununkil b'an?
7Waye' chaq li xk'ojarib'aal laj Salomón!
Sutsu chaq xb'aaneb' oxk'aal chi aj puub',
a'eb' laj Israel li jwal kaweb' rib'.
8Chixjunileb' a'an wankeb' xch'iich'
ut neke'xnaw yalok chi us;
li junjunq b'ak'b'o li xq'esnal ch'iich' chi xsa'
xb'aan naq xiw xiw b'eek chiru li q'oqyink.
9Laj Salomón li awab'ej
xk'e chi yiib'aak jun xk'ojarib'aal
rik'in li chaab'il che' re Líbano.
10Li roq li xk'ojarib'aal yiib'anb'il rik'in plaat,
li x'anleb'aal wank x'oor,
li na'ajej nachunlaak wi' lanb'il rik'in kaqi t'ikr,
ut li xsahob' ru uutz'u'ujinb'il chi us xb'aaneb' li xtuq'ixqilal Jerusalén.
11Ex rixqilal Sión, elenqex chaq chi rilb'al
laj Salomón li awab'ej:
wank sa' xjolom li koroon
li kik'ehe'k re xb'aan li xna'
sa' xkutankil li xsumlajik,
sa' li kutan li q'axal kisaho'k wi' xch'ool.
Currently Selected:
Knt 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
