Sal 147
147
SAALM 147 (146-147)
B'ich cho'q re li Qaawa' nim xwankil
1Aleluya!
Chenimaaq xk'ab'a' li Qaawa'
xb'aan naq q'axal us xb'ichankil;
cheloq'oni ru li qaYos
xb'aan naq xk'ulub' naq taak'ehe'q xloq'al.
2Li Qaawa' xwaklesi wi' chik Jerusalén,
ut xch'utub'eb' laj Israel li xe'cha'cha'iik.
3Xk'irtasiheb' li toq'ob'eb' ru
ut xb'an chixjunileb' li xtiq'ilaleb'.
4Naxnaw jo'k'ihaleb' li chahim
ut naxb'oq li junjunq rik'in xk'ab'a'.
5Q'axal nim xwankil li qaYos,
k'ajo' naq kaw rib';
ink'a' naru xb'isb'al li xchamal li xna'leb'.
6Li Qaawa' naxwaklesi li kub'enaq xwankil;
ab'an naxk'utzub' toj sa' pojtz' li ink'a' us xch'ool.
7Chexb'ichanq chiru li Qaawa' re xk'eeb'al xloq'al,
ch'e'omaq li aarp cho'q re li qaYos!
8A'an namoyok li choxa rik'ineb' li choql,
naxkawresi li hab' cho'q re li ch'och'
ut nak'ehok chi yo'laak li raxpim
sa'atqeb' li loq'laj tzuultaq'a.
9A'an nak'ehok xwa eb' li ketomq
ut naxch'oolaniheb' li ral li tz'oq naq yookeb' chi yaab'ak.
10Li Qaawa' ink'a' nawulak chiru li xkawilal li kawaay,
chi moko nasaho'k xch'ool rik'in xseeb'al li winq;
11naxraheb' b'an li neke'paab'ank re,
eb' li k'ojk'ookeb' xch'ool rik'in li xrahom.
12Chaloq'oni ru li Qaawa', at Jerusalén,
chanima ru laaYos, at Sión!
13A'an xk'ehok xkawub' laawokeb'aal
ut xrosob'tesiheb' laawalal aak'ajol chasutam;
14xk'ojob' tuqtuukilal sa'atqeb' laanub'ajlil,
ut nakatxch'oolani rik'in chaab'il tzekemq.
15Naxtaqla chaq li resilal sa' ruuchich'och',
ut k'ajo' naq na'aanilak li raatin!
16Chanchan li noq' naq naxk'e chaq li ratz'amke;
naxhiri li xchu'ke kama' naq napajiik li cha.
17Naxkut li saqb'ach kama' li xk'aj wa;
ani tawi' taakuyuq li ke taqlanb'il xb'aan?
18Naxtaqla chaq li raatin ut naxha'ob'resi chixjunil;
naxwaklesi li iq', ut nab'eek wi' chik roq li ha'.#147,16-18 Job 37,9-11.
19Naxpuktesi li raatin re laj Jakob,
naxk'ut li xchaq'rab' ut li xtaqlahom chiru laj Israel.#147,19 Ro 3,2.
20Ink'a' xb'aanu a'in re jun chik tenamit,
chi moko xk'e chi xnaweb' junaq li xchaq'rab'.
Aleluya!
Currently Selected:
Sal 147: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
