Nm 8

Li xna'aj kanteel

1Li Qaawa' kixye re laj Moisés: 2“Ye re laj Aharón: Naq taaloch li wuqub' chi saqenk, taak'eheb' sa' xb'een xna'aj kanteel re naq te'xkutanob'resi chi uub'ej”. 3Ut laj Aharón kixb'aanu chi jo'kan: kixk'e li saqenk chiru li xna'aj kanteel, jo' kixye li Qaawa' re laj Moisés. 4Li xna'aj kanteel a'an tz'aqal oor yiib'anb'il wi', chalen li xk'ochleb'aal toj sa'eb' li ruutz'u'ujil. Laj Moisés kixk'e chi yiib'aak li xna'aj kanteel, jo' kik'utb'esiik chiru xb'aan li Qaawa'.#8,1-4 Ex 25,31-40; 37,17-24.

Q'axtesinb'ileb' re li Qaawa' eb' laj Leví

5Chirix chik a'an li Qaawa' kixye re laj Moisés:

6“Isiheb' laj Leví sa' xyanqeb' laj Israel ut ch'ajob'resiheb'. 7B'aanu chi jo'ka'in: taapuuxiheb' rik'in osob'tesinb'il ha'. Te'xjo chixjunil li xjunqxaqalileb', te'xpuch' li raq'eb' ut ch'ajob'resinb'ileb' te'kanaaq. 8Chirix chik a'an, te'xk'e junaq wakax rochb'een li k'aj yoq'inb'il rik'in aseeyt, ut laa'at taak'e jun chik li wakax re xmayejankil chirix li kuyuk maak. 9Taaye reheb' laj Leví naq te'jiloq chiru li Loq'laj Na'ajej ut taab'oq chixjunil li xkomonileb' laj Israel. 10Taaye reheb' laj Leví naq te'jiloq chiru li Qaawa', ut eb' li ralal xk'ajol laj Israel te'xk'e li ruq'eb' sa' xb'een li jolomeb' laj Leví. 11Toja' naq laj Aharón tixq'axtesiheb' laj Leví chiru li Qaawa' cho'q xmayejeb' laj Israel. Chi jo'kan eb' laj Leví q'axtesinb'ilaqeb' chi k'anjelak chiru li Qaawa'. 12Eb' laj Leví te'xk'e li ruq'eb' sa' xb'een xjolomeb' li wakax, ut laa'at taamayeja li jun chirix li kuyuk maak ut li jun chik taamayeja chi k'atb'il re xsachb'al li xmaakeb' laj Leví chiru li Qaawa'. 13Chirix chik a'an, taaxaqab'eb' laj Leví chiru laj Aharón ut chiruheb' li ralal, ut taaq'axtesiheb' chiru li Qaawa' cho'q mayej. 14Jo'ka'in naq taajek'eb' laj Leví sa' xyanqeb' laj Israel re naq te'k'anjelaq chiwu. 15Moqon eb' laj Leví te'ok chi k'anjelak sa' li Loq'laj Na'ajej. Taapuuxi ruheb' ut taaq'axtesiheb' cho'q mayej, 16xb'aan naq siib'ileb', siib'ileb' we xb'aaneb' laj Israel, ruuchileb' chixjunileb' li xb'een ralaleb' laj Israel. Xink'ameb' cho'q we sa' xyanqeb' chixjunileb' laj Israel. 17Xb'aan naq weheb' chixjunileb' li xb'een ralaleb' laj Israel, jo' li ralaleb' li winq malaj li xb'een raleb' li ketomq: kinsik'eb' ru cho'q we sa' li kutan kinsacheb' wi' chixjunil li xb'een ralaleb' laj Ejiipt.#8,17 Ex 13,2.11-16.

18“Jo'kan naq laa'in xink'ameb' cho'q we laj Leví, ruuchileb' chixjunileb' li xb'een ralaleb' laj Israel. 19Laa'in xinsik' ruheb' sa' xyanqeb' laj Israel ut xinq'axtesiheb' re laj Aharón ut eb' li ralal, re naq te'k'anjelaq sa' li Loq'laj Na'ajej sa' xk'ab'a'eb' laj Israel, ut te'mayejaq chirixeb' laj Israel re xkuyb'al xmaakeb'. Relik chi yaal naq ink'a' te'kamq naq te'nach'oq chi xk'atq li Loq'laj Na'ajej”.

20Laj Moisés, laj Aharón ut chixjunil li xkomonileb' laj Israel ke'xb'aanu reheb' laj Leví chixjunil li yeeb'il xb'aan li Qaawa' re laj Moisés. 21Eb' laj Leví ke'xch'ajob'resiheb' rib' ut ke'xpuch' li raq'eb'. Laj Aharón kixq'axtesiheb' chiru li Qaawa' cho'q mayej, ut laj Aharón kimayejak sa' xk'ab'a'eb' re xch'ajob'resinkileb'. 22Chirix chik a'an eb' laj Leví ke'ok chi yeechi'ink mayej sa' li Loq'laj Na'ajej chiru laj Aharón ut eb' li ralal. Jo' yeeb'il chaq xb'aan li Qaawa' re laj Moisés, jo'kan naq ki'uxmank reheb' laj Leví.

23Li Qaawa' kixye re laj Moisés:

24“Eb' laj Leví tento te'ok chi k'anjelak sa' li Loq'laj Na'ajej chalen laj oob' xka'k'aal chihab', 25ut te'xkanab' k'anjelak naq te'xkooloni lajeeb' roxk'aal chihab'; chirix chik a'an ink'a' chik te'k'anjelaq. 26Yal te'xtenq'aheb' aj chik eb' li ras riitz'in sa' li k'anjel na'uxmank sa' li Loq'laj Na'ajej, ab'anan ink'a' chik naru te'ok chi k'anjelak. Jo'kan taab'aanu reheb' laj Leví chirix li xk'anjeleb'”, chan li Yos re laj Moisés.

Currently Selected:

Nm 8: QQC

Highlight

Copy