Nm 27

Li reechanihomeb' li rab'inej

1Toja' naq ke'nach'ok chaq eb' li xrab'in laj Selofjad, ralal laj Jéfer, a'in ralal laj Galahad, li ralal laj Makir, xteepalil laj Manasés, li ralal laj José. Eb' li ixqa'al a'in, a'aneb' li xk'ab'a': lix Majlá, xNohá, xJoklá, xMilká ut xTirsá. 2Ke'wulak rik'in laj Moisés ut laj Elehasar laj tij, eb' li xjolomileb' li tenamit ut chiruheb' chixjunil li komonil, sa' rokeb'aal li Loq'laj Muheb'aal, ut ke'xye: 3“Li qayuwa' kikamk sa' li chaqich'och'. A'an maawa' jun sa' xyanqeb' laj Koré li ke'wech'ok rix li Qaawa'; kikamk b'an xb'aan naq kimaakob'k, ut ink'a' kixkanab' xteelom al. 4K'a'ut naq taasachmanq li xk'ab'a' sa' xyanqeb' li xkomoneb' li xch'uutal, yal xb'aan naq maajun xteelom al xwank? Taak'e li qach'och' sa' xyanqeb' li rech'alal li qayuwa'”, chankeb'.

5Laj Moisés kixpatz' re li Qaawa' chirix li ch'a'ajkilal a'in, 6ut li Qaawa' kixye re: 7“Q'axal yaal li xe'xye eb' li xrab'in laj Selofjad. K'e b'i' xch'och'eb' sa' xyanqeb' li xkomon li xyuwa'eb'. K'e reheb' li ch'och' li xtz'aqk raj li xyuwa'eb'.#27,7 Nm 36,2. 8Ye ajwi' reheb' laj Israel: «Wi junaq winq taakamq chi ink'a' xkanab' junaq xteelom al, li xch'och' tkanaaq cho'q re li xrab'in. 9Wi ink'a' ajwi' xkanab' junaq xrab'in, li xch'och' taak'eemanq re li ras malaj li riitz'in. 10Ut wi maak'a' ras malaj riitz'in, li ch'och' taak'eemanq re li ras malaj li riitz'in li xyuwa'. 11Ut wi li yuwa'b'ej maak'a' ras malaj riitz'in, li xch'och' taak'eemanq re junaq rech'alal sa' xyanqeb' li xkomonil: a'an taa'eechaninq li ch'och'». A'an a'in li chaq'rab' tento te'xpaab' laj Israel chi junelik, jo' chanru kiyehe'k re laj Moisés xb'aan li Qaawa'”.

Kixaqab'aak laj Josué cho'q reeqaj laj Moisés

(Dt 31,1-8)

12Li Qaawa' kixye ajwi' re laj Moisés: “Taqen sa' xb'een li tzuul Abarín ut k'e reetal li ch'och' xink'e reheb' laj Israel. 13Naq ak xawil a'an, tatq'ajq tatsutq'iiq rik'ineb' laana' laayuwa', jo' xb'aanu laj Aharón laawas. 14Xb'aan naq laa'ex keq'etq'eti eerib' sa' li chaqich'och' re Sin, naq eb' li tenamit kine'xwech' ut laa'ex ink'a' kek'ut linsantilal chiruheb', chire li ha'”, chan li Qaawa'. A'an li ha' re Meribá, sa' xteepal Kadés, aran sa' li chaqich'och' re Sin.#27,12-14 Nm 20,10-13; Dt 3,23-27; 32,48-52.

15Ut laj Moisés kixye re li Qaawa': 16“At Qaawa' Yos, laa'at li nakatk'ehok xyu'am chixjunileb', xaqab' junaq winq re tixk'am xb'eheb' li komonil a'in 17ut tixb'eresiheb' yalaq b'ar, re naq ink'a' taakanaaq li xkomonil li Qaawa' jo'keb' li karneer maak'a' aj ilol reheb'”,#27,17 1 R 22,17; Ez 34,5; Jdt 11,19; Mt 9,36; Mk 6,34. chan laj Moisés.

18Kichaq'ok li Qaawa' ut kixye re laj Moisés: “B'oq laj Josué,#27,18 Ex 24,13. ralal laj Nun, a'an jun li winq nujenaq chi musiq'ej. K'e laawuq' sa' xb'een xjolom 19ut toxaaxaqab' chiru laj Elehasar laj tij ut chiru chixjunileb' li komonil, re naq taachaq'rab'i chiruheb' chixjunil a'an. 20Taak'e b'ayaq laawankil re, re naq taapaab'aaq xb'aaneb' chixjunil li xkomonileb' laj Israel.#27,18-20 Dt 34,9; Jos 1,16-18. 21Ab'an laj Josué tento toxk'ut rib' chiru laj Elehasar laj tij, ut a'in taapatz'oq wik'in, jo' chanru na'uxk rik'in li b'uulink, chiru li Qaawa'.#27,21 Ex 28,30; 1 S 14,41; 28,6. Laj Josué a'an li taataqlanq sa' xb'een chixjunileb' laj Israel, sa' xb'een chixjunil li komonil, rik'in li k'aru te'xb'aanu”.

22Laj Moisés kixb'aanu jo' kiyehe'k re xb'aan li Qaawa': kixk'am laj Josué ut koxxaqab' chiru laj Elehasar laj tij jo' ajwi' chiruheb' chixjunil li komonil. 23Laj Elehasar kixk'e eb' li ruq' sa' xb'een xjolom laj Josué ut kixchaq'rab'i chi chaab'il, jo' yeeb'il re laj Moisés xb'aan li Qaawa'.#27,23 Dt 31,23.

Currently Selected:

Nm 27: QQC

Highlight

Copy