Nm 22

Laj Balak kixb'oq chaq laj Balaham

1Eb' laj Israel ke'elk aran ut koheb' toj sa' xtaq'ahil Mohab, junpak'al li nima' Jordán, sa' xjayal Jerikó. Ut aran ke'xk'ojob' li xmuheb'aaleb'. 2Laj Balak, ralal laj Sipor, kiril chixjunil li ke'xb'aanu eb' laj Israel reheb' laj Amor. 3Jo'kan ajwi' eb' laj Mohab k'ajo' naq ke'chalk xxiw chi rilb'aleb' laj Israel, xb'aan naq q'axal naab'aleb', 4ut ke'xye reheb' li xcheekelaleb' laj Madián: “Anaqwan teeril chanru naq eb' li k'iila tenamit a'an te'xsach chixjunil li k'a'aq re ru wank chi qasutam; te'xsach chi junajwa jo' naq li wakax naxsach li pim”, chankeb'.

Sa'eb' li kutan a'an laj Balak, ralal laj Sipor, wank cho'q awab'ej re Mohab, 5ut kixtaqlaheb' aj yehol esil re xsik'b'al laj Balaham, ralal laj Pehor,#22,5 2 P 2,15-16; Jud 11. li wan chaq Petor, chire li nima' Éwfrates sa' xteepaleb' laj Amab'. Kixye re: “Arin wankeb' k'iila poyanam; ke'elk chaq Ejiipt, ke'xcha'cha'i rib' sa' xb'een chixjunil li ruuchich'och' ut nach' ke'kanaak wankin wi'. 6B'aanu usilal, kim chi xmajewankileb' li tenamit a'in, xb'aan naq q'axal kaweb' rib' chiwu. Mare chi jo'kan tinq'ax ruheb' ut tinruuq risinkileb' sa' linna'aj. Ninnaw naq li nakawosob'tesi, osob'tesinb'il chik nakanaak, ut li nakamajewa, majewanb'il ajwi'”.

7Koheb' b'i' li xcheekelaleb' laj Mohab ut laj Madián rik'in tumin re xtojb'al li majewank. Ke'wulak rik'in laj Balaham ut ke'xye re chixjunil li xyehom laj Balak. 8Kichaq'ok laj Balaham ut kixye reheb': “Kanaaqex arin chiru li q'oqyink a'in, ut wulaj tinye eere jo' chanru tixk'ut chiwu li Qaawa'”, chan. Ut li xcheekelaleb' laj Mohab ke'kanaak sa' rochoch laj Balaham.

9Toja' naq kichalk li Yos rik'in laj Balaham ut kixye re: “K'a' chi winqul wankeb' sa' laawochoch?”, chan. 10Laj Balaham kixsume: “Laj Balak, ralal laj Sipor, x'awab'ejeb' laj Mohab, xtaqla chaq xyeeb'al we: 11«Arin wankeb' k'iila poyanam li ke'elk chaq Ejiipt ut ke'xcha'cha'i rib' sa' xb'een chixjunil li ruuchich'och'. Kim ut majewaheb' re naq tinruhanq chi xq'axb'al ruheb' ut risinkileb' sa' lintenamit»”, chan laj Balaham.

12Ab'anan li Yos kixye re laj Balaham: “Matxik chirixeb', maamajewaheb' li tenamit a'an xb'aan naq osob'tesinb'ileb' inb'aan”, chan.

13Wulajaq kiwakliik toj hik'ho laj Balaham ut kixye reheb' laj k'amol b'e taqlanb'ileb' xb'aan laj Balak: “Ayuqex sa' leetenamit, xb'aan naq li Qaawa' ink'a' naraj naq tinxik cherix”, chan.

14Toja' naq eb' li xjolomileb' laj Mohab ke'sutq'iik wan wi' laj Balak ut ke'xye re: “Laj Balaham ink'a' xraj chalk qochb'een”, chankeb'.

15Ab'an laj Balak kixtaqlaheb' wi' chik naab'al li xjolomileb' ut jwal ninqeb' xwankil chiruheb' li xb'enwa. 16Koheb' rik'in laj Balaham ut ke'xye re: “Jo'ka'in xye chaq laj Balak, ralal laj Sipor: «B'aanu usilal, maaq'etq'eti aawib' chi chalk wankin wi', 17xb'aan naq tatinq'ajkamu chi chaab'il ut tinb'aanu chixjunil li taaye we. B'aanu usilal, kim ut majewa li tenamit a'in»”.

18Ab'an laj Balaham kixye reheb' li xtaql laj Balak: “Us ta laj Balak tixk'e we li rochoch nujenaq chi plaat ut oor, ink'a' naru tinq'et raatin li Qaawa' linYos, chi moko rik'in kach'in chi moko rik'in naab'al. 19Ab'an kanaaqex arin chiru li q'oqyink a'in ut toxwab'i k'a' chik ru tixye we li Qaawa'”, chan.

20Chiru li q'oqyink kichalk li Qaawa' rik'in laj Balaham ut kixye re: “Wi eb' li winq a'in xe'chalk chab'oqb'al, xaqlin ut ayu chirixeb'. Ab'an maak'a' taab'aanu; ka'ajwi' li aatin tinye aawe taapaab'”, chan.

21Toj eq'la ajwi' kiwakliik laj Balaham, kixb'ak' rix li xb'uur ut koho chirixeb' li xjolomileb' laj Mohab.

Li xb'uur laj Balaham

22K'ajo' naq kijosq'o'k li Qaawa' xb'aan naq laj Balaham koho chirixeb' li winq. Ut naq yo chi xik laj Balaham chirix li xb'uur rochb'een wiib' li xmoos, li x'Ánjel li Qaawa' kixxaqab' rib' chiru, re xramb'al li xb'e. 23Naq li b'uur kiril li x'Ánjel li Qaawa' xaqxo sa' xb'e, wank xq'esnal ch'iich' sa' ruq', kixjal li xb'e ut koho chik sa' pim. Toja' naq laj Balaham kixsak' li xb'uur re naq taasutq'iiq wi' chik sa' li b'e. 24A'ut li x'Ánjel li Yos kixk'e rib' sa' jun laatz'al b'e, sa' xyanq eb' li awimq ut wank tz'ak chi xka'pak'alil. 25Naq li b'uur kiril li x'Ánjel li Qaawa', kixjilosi rib' chiru li tz'ak ut kixq'oy li roq laj Balaham. Toja' naq a'an kixsak' wi' chik li xb'uur. 26Li x'Ánjel li Qaawa' kixjal wi' chik li xna'aj ut kixk'e rib' sa' jun laatz', b'arwi' ink'a' naru taaxik chi moko sa' xnim chi moko sa' xtz'e. 27Naq li b'uur kiril li x'Ánjel li Qaawa', kixtunub' rib' chi wank laj Balaham sa' xb'een. K'ajo' naq kijosq'o'k laj Balaham ut ki'ok chi xsak'b'al li xb'uur rik'in che'.

28Toja' naq li Qaawa' kixk'e chi aatinak li b'uur, ut kixye re laj Balaham: “K'aru xinb'aanu aawe naq nikinaasak'? Ak ox sut xinaasak'”, chan. 29Kichaq'ok laj Balaham ut kixye re li xb'uur: “Yookat chinb'alaq'inkil. Jwal us raj naq wanq linch'iich' wik'in: ak raj xatinkamsi anaqwan”, chan.

30Ab'an li b'uur kixsume: “Ma maawa'in tab'i' aab'uur ut chiwix nakatb'eek junelik chalen toj anaqwan? Ma k'aynaqin tab'i' xb'aanunkil jo' xinb'aanu anaqwan?”, chan. Kixye laj Balaham: “Ink'a'”.

31Toja' naq li Qaawa' kixte xsa' ru laj Balaham ut kiril li x'Ánjel li Yos xaqxo sa' xyi li b'e, wank xch'iich' sa' ruq'. Kiwiq'laak ut kixhupub' rib' chiru ch'och', 32ab'an li x'Ánjel li Yos kixye re: “K'a'ut naq ak ox wa xasak' laab'uur? Laa'in li yookin chi tz'apok laab'e, xb'aan naq cho'q we laa'in moko us ta li xik wi' aawe. 33Li b'uur xinril ut ox sut xjal xb'e. B'anyox re naq xinxjalb'ehi. Wi ta ink'a', ak raj xatinkamsi laa'at, ut a'an xinkanab' chi yo'yo”, chan.

34Toja' naq laj Balaham kixye re li x'Ánjel li Yos: “Xinmaakob'k. Ink'a' xinnaw naq laa'at yookat chi xramb'al linb'e. Ab'anan, wi ink'a' nakawaj naq tinxik, anaqwan ajwi' sutq'iik we”, chan.

35Kixye li x'Ánjel li Yos re laj Balaham: “Ayu chirixeb' li winq a'in, ab'an maak'a' chik k'aru taaye. Ka'ajwi' taaye li tinye aawe laa'in”, chan. Laj Balaham koho chirixeb' li xtaql laj Balak.

Laj Balaham ut laj Balak

36Naq kirab'i laj Balak naq yo chi chalk laj Balaham, ki'elk chi xk'ulb'al aran Ar-Mohab, sa' xnub'ajlil li nima' Arnón, li wank toj sa' xmaril li na'ajej. 37Ut kixye laj Balak re laj Balaham: “Ma ink'a' tab'i' xintaqla aab'oqb'al? K'a'ut naq ink'a' xatchalk wik'in? Malaj xak'oxla naq ink'a' tinruhanq chaq'ajkamunkil?”, chan.

38Kichaq'ok laj Balaham: “K'e reetal naq anaqwan xink'ulunk aawik'in. Ab'an ink'a' naru tin'aatinaq yal injunes. Ka'ajwi' li k'aru tixk'ut chiwu li Yos, naru tinye aawe”, chan.

39Chirix chik a'an laj Balaham koho rochb'een laj Balak, ut ke'wulak sa' li na'ajej Kiryat-Jusot xk'ab'a'. 40Aran laj Balak kixmayeja jun wakax ut jun karneer, ut kixtaqla xtzekemq laj Balaham jo'wi' cho'q reheb' li rochb'een.

41Toj eq'la re li kutan jun chik, laj Balak kixk'am laj Balaham chirix, toj sa' xb'een li tzuul Bamot-Bahal, b'arwi' nak'utunk kach'in li xmuheb'aaleb' laj Israel.

Currently Selected:

Nm 22: QQC

Highlight

Copy