Nm 21

Kichape'k li tenamit Jormá

1Li awab'ej re Kanahán li na'awab'ejink sa' xb'eeneb' laj Arad, sa' xteepal Nejeb, kirab'i naq eb' laj Israel yookeb' chi nach'ok chaq#21,1 Nm 33,40. ut neke'xk'am sa' xb'ehil Atarín; jo'kan naq ki'elk chi yalok rik'ineb', ut wankeb' aj Israel ke'k'ame'k chi preexil. 2Toja' naq laj Israel kixye sa' jurament re li Qaawa': “Wi taaq'axtesi eb' li poyanam a'an sa' wuq', tinsach ruheb' chi junajwa li xtenamiteb'”, chan. 3Li Qaawa' kirab'i xyaab' xkux laj Israel ut kixq'axtesiheb' laj Kanahán sa' ruq'. Ut eb' laj Israel ke'xsach ruheb' chi junajwa eb' a'an ut li xtenamiteb'. Jo'kan naq Jormá ke'xk'e cho'q xk'ab'a' li na'ajej a'an.

Li k'anti' yiib'anb'il rik'in q'anch'iich'

4Eb' laj Israel ke'elk chiru li tzuul Hor, sa' xb'ehil li palaw Suf, re naq ink'a' te'nume'q sa' li na'ajej Edom.#21,4 Dt 2,1. Ab'anan eb' li tenamit ke'ch'inank xch'ool sa' li b'e 5ut ke'ok chi xwech'b'al rix li Qaawa' ut laj Moisés; ke'xye: “K'a'ut naq koohaawisi chaq Ejiipt yal re tookamq sa' li chaqich'och'? Arin maak'a' qawa quk'a' ut xootitz'k rik'in li tzekemq a'in maak'a' xsahil”, chankeb'.

6Toja' naq li Qaawa' kixtaqlaheb' chaq li k'anti' li neke'kamsink; ke'xtiweb' naab'al aj Israel li ke'kamk.#21,5-6 1 Ko 10,9. 7Toja' naq eb' li tenamit ke'wulak rik'in laj Moisés chi xyeeb'al: “Xoomaakob'k, xqawech' rix li Qaawa' ut laa'at. Tz'aaman, elajin chiqix chiru li Qaawa', re naq trisiheb' sa' qayanq eb' li k'anti'”, chankeb'.

Laj Moisés kitijok chirixeb' li tenamit, 8ut li Qaawa' kixye re laj Moisés: “Yiib' junaq k'anti' xkomoneb' li neke'kamsink ut taqsi chi ru'uj junaq che'. Chixjunil li tiwb'il xb'aan junaq k'anti', taak'iraaq naq taaril a'an”, chan.

9Laj Moisés kixyiib' jun li k'anti' rik'in q'anch'iich' ut kixtaqsi chi ru'uj jun che'.#21,9 2 R 18,4; Sab 16,5-7; Jn 3,14. Ut wi junaq k'anti' naxtiw junaq winq ut a'an tixka'ya li k'anti' yiib'anb'il rik'in q'anch'iich', ink'a' nakamk.

Eb' laj Israel ke'xq'ax ruheb' li tenamit kilaje'nume'k wi'

10Eb' laj Israel ke'elk aran ut koxe'hilanq toj Obot. 11Ke'elk Obot ut koxe'hilanq sa' li na'ajej Abarín, sa' li chaqich'och' xnub'ajlil Mohab, sa' xjayal releb'l saq'e. 12Ke'elk aran ut koxe'hilanq toj chire li nima' Séred. 13Ke'elk aran ut koxe'hilanq toj junpak'al li nima' Arnón li wank sa' li chaqich'och'. Li nima' a'an na'elk sa' xch'och'eb' laj Amor ut wank cho'q xnub'ajlil Mohab rik'ineb' laj Amor. 14Jo'kan naq nayeemank sa' xHuhil li Nimla Yalok kixb'aanu li Qaawa':

“Koonume'k chaq Baheb, sa' xteepal Sufá,

jo' ajwi' sa'eb' li kok' roqha' ut li nima' Arnón,

15chi junqre li nima' naxik sa' xjayal Ar

ut nawulak toj sa' xnub'ajlil Mohab”.

16Naq ke'elk chire li nima' Arnón, koheb' toj Beher. Aran wank li xjulel ha' b'arwi' li Qaawa' kiraatina laj Moisés chi jo'ka'in: “Ch'utub'eb' li tenamit ut laa'in tink'e ruk'a'eb'”, chan. 17Toja' naq eb' laj Israel ke'xb'icha li b'ich a'in:

“Yo'lan, at ha'.

B'ichahomaq ru li xjulel li ha'.

18Li julha' a'in xb'ekmank xb'aaneb' li xninqal ru winq;

eb' li xjolomileb' li tenamit ke'pikok re rik'in xxuq'eb'”.

Chirix chik a'an ke'elk sa' li chaqich'och' 19ut koheb' Mataná; chalen Mataná toj Najaliel, chalen Najaliel toj Bamot, 20ut chalen Bamot toj chiru taq'a sa' xteepalil Mohab, sa' xjayal li tzuul Piská, sa' xka'yab'aal li chaqich'och'.

Eb' laj Israel ke'xq'ax ru laj Sijón

(Dt 2,26-37)

21Eb' laj Israel ke'xtaqla aj esil rik'in laj Sijón, awab'ej re Amor: 22“Twaj nume'k sa' laatenamit. Ink'a' tqach'ik qib' sa'eb' laawawimq ut sa' xyanqeb' laa'uub', chi moko too'uk'aq sa' xjulel laaha'. Tiik tooxik sa' li nimb'e toj reetal toowulaq sa' xnub'ajlil laatenamit”, chankeb'.

23Ab'an laj Sijón ink'a' kiraj naq eb' laj Israel te'nume'q sa' li xna'aj, kixch'utub'eb' b'an chixjunileb' li poyanam ut ke'elk chi xk'ulb'aleb' laj Israel sa' li chaqich'och'. Naq ke'wulak Yahás, ke'ok chi yalok rik'ineb'. 24Ab'an eb' laj Israel ke'xkamsiheb' chi ch'iich' ut ke'reechani li xch'och'eb' chalen Arnón toj Yabok, toj sa' xnub'ajleb' laj Amón (xb'aan naq Jaser wank sa' xnub'ajleb' laj Amón). 25Eb' laj Israel ke'reechani chixjunileb' li xtenamit. Ke'reechani chixjunileb' li xtenamit eb' laj Amor, naraj naxye li tenamit Jesbón ut chixjunileb' li xk'aleb'aal. 26Xb'aan naq Jesbón a'an li tenamit wan wi' laj Sijón, awab'ej re Amor. Laj Sijón kiyalok junxil rik'in li xb'een awab'ej re Mohab ut kireechani chixjunil li xch'och' toj wan wi' li nima' Arnón. 27Jo'kan naq eb' laj uutz'u'ujinel aatin neke'xb'icha:

“Kimqex sa' li tenamit Jesbón.

Waklesiiq ut kawub'resiiq wi' chik li xtenamit laj Sijón.

28Xb'aan naq xlochk xxamlel Jesbón,

yo chi k'atk li xtenamit laj Sijón:

x'oso'k li tenamit Ar sa' xteepal Mohab,

xchoqlenk li tzuul chire li nima' Arnón.

29Toq'ob' aawu, a Mohab,

xat-oso'k, at tenamit Kamós.

Xakanab'eb' chi elelik laawalal,

ut eb' laarab'in xe'k'ame'k chi preexil xb'aan laj Sijón,

awab'ej re Amor.#21,28-29 Jr 48,45-46.

30X'oso'k xwankilal Jesbón, chalen Nofaj toj Dibón,

ut xqak'e xxamlel toj Mádaba”.

Eb' laj Israel ke'xq'ax ru laj Og

(Dt 3,1-11)

31Jo'ka'in naq eb' laj Israel ke'na'ajunk sa' xch'och'eb' laj Amor. 32Laj Moisés kixtaqlaheb' aj k'ehol eetal sa' li tenamit Jaser; ut eb' laj Israel ke'risiheb' laj Amor aran ut koxe'reechani li tenamit rochb'een li xk'aleb'aalil. 33Chirix chik a'an ke'sutq'iik chaq ut koheb' sa' li b'e naxik Basán; a'ut laj Og, awab'ej re Basán, ki'elk chaq chi xk'ulb'aleb' laj Israel, rochb'een chixjunileb' li xpoyanam, re yalok sa' li na'ajej Edreí xk'ab'a'. 34Toja' naq li Qaawa' kixye re laj Moisés: “Maaxiwa ru laj Og, xb'aan naq xinq'axtesi sa' laawuq' rochb'een chixjunileb' li xpoyanam ut li xna'aj. B'aanu re laj Og jo' xab'aanu chaq re laj Sijón, awab'ej re Amor, li xwank aran Jesbón”, chan li Qaawa'.

35Jo'kan naq eb' laj Israel ke'xq'ax ru laj Og, eb' li ralal xk'ajol ut chixjunileb' li poyanam; ke'xkamsi chixjunileb' toj reetal maajun kikanaak chi yo'yo. Ut ke'reechani li xch'och'eb'.

Currently Selected:

Nm 21: QQC

Highlight

Copy