Stg 2

Juntaq'eet cherileb' chixjunil sa' leepaab'aal

1Ex was wiitz'in li nekepaab' li Qaawa' Jesukriist li wank sa' xnimal xloq'al, juntaq'eet cherileb' chixjunil sa' leepaab'aal. 2Qayehaq: mare sa' leech'utam tox'okaq junaq q'axal chaab'il xtiqib'ankil ut wank xmatq'ab' oor, ut tox'okaq ajwi' junaq neb'a' chi tz'ajn ru li raq'. 3Wi teek'ul chi chaab'il li tiqto chi us ut teeye re: “K'ojlan arin sa' chaab'il na'ajej”, a'ut li neb'a' teeye re: “Laa'at kanaaqat aran chi xaqxo”, malaj: “Chunlan chi woq”, 4ma ink'a' tab'i' xtiib'al ru li junjunq yookex chi jo'kan? Nekek'e eerib' cho'q aj raqol aatin sa' li ink'a' usil k'a'uxl.

5Ex was wiitz'in raarookex inb'aan, ab'ihomaq: ma ink'a' tab'i' li Yos xsik'ok chaq ruheb' li neb'a' naq naxk'oxla li ruuchich'och' a'in, re naq b'ihomaqeb' sa' li paab'aal ut te'reechani li Nimajwal Wankilal li kixyeechi'i chaq reheb' li neke'rahok re? 6A'ut laa'ex xetz'eqtaana li neb'a'! Ma maawa'eb' tab'i' li b'ihom li neke'numtaak sa' eeb'een? Ma maawa'eb' tab'i' a'an li neke'k'amok eere sa' raqleb' aatin 7ut neke'xmajewa li loq'laj k'ab'a'ej li kiyaab'asimank sa' eeb'een?

8Us nekeb'aanu wi relik chi yaal nekepaab' li Chaq'rab' nim xwankil jo' naxye li Santil Hu: “Taara laawas aawiitz'in jo' naq nakara aawib' laa'at”.#2,8 Lv 19,18; Mt 22,34-39; Ro 13,9-10. 9Ab'an wi sa nekeril li jun ut li jun chik ink'a', yookex chi maakob'k, ut raqb'il aatin cherix xb'aan li Chaq'rab', xb'aan naq xexq'etok chaq'rab'. 10Li naxpaab' chixjunil li Chaq'rab', ab'an wi naxq'et junaq li xtaqlankil, ruuchil naxq'et chixjunil li Chaq'rab'. 11Li kiyehok: “Matmuxuk sumlaak”, kixye ajwi': “Matkamsink”.#2,11 Ex 20,13-14; Dt 5,17. Wi ut ink'a' nakatmuxuk sumlaak, ab'an nakatkamsink, laa'at nakaq'et li Chaq'rab'.

12Jo'ka'in chex'aatinaq ut chexk'anjelaq: jo'qex li taaraqmanq aatin sa' xb'eeneb' xb'aan li Chaq'rab' li nak'ehok chi wank chi ach'ab'anb'il. 13Xb'aan naq maak'a'aq uxtaanal sa' li raqb'a aatin cho'q re li ink'a' ki'uxtaanank u; a'ut li na'uxtaanank u naxq'ax ru li raqb'a aatin.

Li paab'aal tento taak'utunq rik'in li qab'aanuhom

14Ex was wiitz'in, k'a' ta taa'ok wi' naq tixye junaq: “Wank inpaab'aal”, ut maak'a' xchaab'il b'aanuhom? Ma taakole'q tab'i' xb'aan li xpaab'aal? 15Qayehaq: junaq leeras eeriitz'in winq malaj ixq t'ust'uukeb' ut maak'a'eb' xwa ruk'a' re xnumsinkil li kutan junjunq, 16wi junaq sa' eeyanq tixye reheb': “Ayuqex sa' tuqtuukil usilal, chexq'ixinq ut chextzekanq chi sa”, ab'an wi ink'a' teek'e reheb' li k'aru na'ajmank ru cho'q re li xjunxaqalileb', k'a' taa'ok wi' a'an? 17Jo'kan ajwi' li paab'aal, wi maak'a' xb'aanuhom, relik chi yaal a'an kamenaq.

18Jo'wi' anchal junaq taayehoq: “Laa'at wank aapaab'aal, a'ut laa'in wank inb'aanuhom. K'ut chiwu laapaab'aal li maak'a' xb'aanuhom, ut laa'in tink'ut chawu linpaab'aal rik'in linb'aanuhom”. 19Laa'at nakapaab' naq li Yos jun ajwi': us ajwi' naq nakapaab'. Eb' laj tza neke'xpaab' ajwi' a'an ut neke'xsiksiki rib' xb'aan. 20At winq maak'a' aana'leb', ma taawaj xtawb'al xyaalal naq li paab'aal chi maak'a' xb'aanuhom maak'a' na'ok wi'? 21Ma ink'a' kixtaw xtiikilal xch'ool laj Abrahán, li qayuwa', rik'in li xb'aanuhom naq kixk'e laj Isahak, li ralal, cho'q xmayej sa' xb'een li artal? 22K'e reetal naq li xpaab'aal laj Abrahán yo chaq chi k'anjelak rochb'een li xb'aanuhom, ut sa' xk'ab'a' li xchaab'il b'aanuhom kitz'aqlok ru li xpaab'aal. 23Chi jo'kan kitz'aqlok ru li naxye li Santil Hu: “Laj Abrahán kixpaab' li Yos ut a'an kik'ehe'k sa' ajl cho'q xtiikilal xch'ool”.#2,23 Gn 15,6; Ro 4,3; Gal 3,6. Jo'kan naq ramiiw li Yos kixk'ab'a'in.

24Ma xek'e reetal? Li winq naxtaw xtiikilal xch'ool xb'aan li xchaab'il b'aanuhom ut ink'a' ka'ajwi' sa' xk'ab'a' li xpaab'aal. 25Jo'kan ajwi' lix Rajab, laj yumb'eet.#2,25 Jos 2,6; Heb 11,31. Ma ink'a' tab'i' kixtaw xtiikilal xch'ool rik'in li xb'aanuhom naq kixk'e rochochnaal eb' li xtaql laj Israel ut kixsutq'isiheb' sa' jalan chik b'e? 26Jo' naq li tz'ejwalej chi maak'a' xmusiq', a'an kamenaq; jo'kan ajwi' li paab'aal chi maak'a' xb'aanuhom, kamenaq.

Currently Selected:

Stg 2: QQC

Highlight

Copy