Gn 48

Laj Jakob kirosob'tesi laj Efraín ut laj Manasés

1Moqon chik ke'xye re laj José: “Ab'i, yaj laayuwa'”. Naq kirab'i a'in, laj José kixk'ameb' chirix xkab'ichaleb' li ralal, laj Manasés ut laj Efraín, 2ut kixtaqla xyeeb'al re laj Jakob: “Laj José laawalal xk'ulunk chawilb'al”. Toja' naq laj Jakob chira chisa kik'ojlaak chiru xch'aat 3ut kixye re laj José:

“Li Nimajwal Yos kixk'ut rib' chiwu aran Lus, sa' xteepal Kanahán, kinrosob'tesi 4ut kixye we: «K'e reetal: laa'in tink'eheb' chi k'ihank ut chi pukank eb' laawalal aak'ajol. Aawik'in twisi jun xnimal xteepaleb' chi tenamit, ut li ch'och' a'in tink'e chi junajwa reheb' li te'yo'laaq aawik'in».#48,3-4 Gn 28,13-14. 5Weheb' xkab'ichaleb' laawalal li xe'yo'laak aawik'in sa' li tenamit Ejiipt naq toj maji' ninchalk aawik'in arin: weheb' laj Efraín ut laj Manasés, kama'eb' ajwi' laj Rubén ut laj Simehón. 6A'ut eb' li te'yo'laaq moqon aawehaqeb', ut sa' xk'ab'a'eb' li ras te'eechaninq ch'och'. 7Naq kin'elk Padán, lix Rakel laana' kikamk chiwu sa' b'e, sa' li na'ajej Kanahán, kach'in chik maa nokoowulak Efratá, ut aran kinmuq sa' li b'e naxik Efratá, Belén ajwi' nayeemank re”.#48,7 Gn 35,16-19.

8Naq laj Israel kirileb' li ralal laj José, kixpatz': “Aniheb' a'in?”, chan. 9-10Kixye laj José re li xyuwa': “A'aneb' li walal li xk'e we li Yos arin”. Moymoy aj chik xsa'eb' li ru laj Jakob xb'aan li xtiixilal ut ink'a' chik saqenk na'ilok. Jo'kan naq kixye re laj José: “K'ameb' chaq arin re naq twosob'tesiheb'”. Laj José kixjilosiheb' chi xk'atq li xyuwa'eb', ut a'an kixq'aluheb' ut kixtz'ub'eb' ru. 11Toja' naq kixye re laj José: “Laa'in xink'oxla naq ink'a' chik twil aawu, ut anaqwan li Yos xk'e ajwi' chiwil eb' laawalal”.

12Laj José kirisiheb' li kok'al chiru ra' li xyuwa' ut kixhupub' rib' chiru. 13Kixchapeb' chi xkab'ichaleb': laj Efraín rik'in xnim uq', sa' xtz'e laj Israel, ut laj Manasés rik'in li xtz'e, sa' xnim uq' laj Israel, ut kixjilosiheb' chi xk'atq li xyuwa'eb'. 14Laj Israel kixye' li xnim uq' ut kixk'e sa' xb'een xjolom laj Efraín, us ta a'an li iitz'inb'ej, ut kixtaqsi li xtz'e sa' xb'een xjolom laj Manasés: naraj naxye naq kixjalpaq'i li ruq' xb'aan naq laj Manasés a'an li xb'een alalb'ej. 15Toja' naq kirosob'tesi laj José chi jo'ka'in:

“Li Yos li xe'wank wi' chi sum'aatin

eb' linyuwa' laj Abrahán ut laj Isahak,

li Yos li xb'eresink we chalen chaq sa' linyo'lajik toj anaqwan,

16li ánjel li kikolok we chiru chixjunil li ink'a' us,

chi'osob'tesinq taxaq reheb' li kok'al a'in.

Che'xk'ab'a'in ta link'ab'a'

ut li xk'ak'a'eb' linyuwa'ilq laj Abrahán ut laj Isahak:

che'alanq ut che'k'ihanq sa' ruuchich'och'”.

17Ab'an naq laj José kiril li xnim uq' li xyuwa' wank sa' xb'een xjolom laj Efraín, ink'a' kiwulak chiru ut kixchap li ruq' li xyuwa' re risinkil sa' xb'een xjolom laj Efraín, re chik xk'eeb'al sa' xb'een xjolom laj Manasés. 18Ut kixye re li xyuwa': “Moko jo'kan ta, at inyuwa', xb'aan naq a'an a'in li xb'een alalb'ej. K'e laanim uq' sa' xb'een li xjolom”. 19A'ut li xyuwa' ink'a' kixk'ul xch'ool ut kixye: “Ninnaw, at walal, ninnaw: a'an ajwi' nimaq xwankil. Ab'anan li riitz'in q'axal chik nimaq xwankil chiru, ut eb' li ralal xk'ajol a'anaqeb' xnimal ru tenamit”.

20Ut kirosob'tesiheb'#48,20 Heb 11,21. chiru li kutan a'an chi jo'ka'in: “Naq eb' laj Israel te'rosob'tesi junaq poyanam, te'xye sa' eek'ab'a': «Chatrosob'tesi taxaq li Yos kama' naq xrosob'tesi laj Efraín ut laj Manasés»”. Ut kixk'e laj Efraín chi nimaq xwankil chiru laj Manasés.

21Toja' naq laj Israel kixye re laj José: “Kamk we laa'in; ab'anan li Qaawa' wanq eerik'in ut texxsutq'isi sa' li xna'ajeb' leexe'toonil yuwa'. 22Laa'in q'axal chik xk'ihal li ch'och' tink'e aawe chiruheb' laawas: anaqwan tinq'axtesi aawe Sikem, li na'ajej xweechani sa' ruq'eb' laj Amor rik'in linch'iich' ut linsimaj”.

Currently Selected:

Gn 48: QQC

Highlight

Copy