Gn 46
46
Laj Jakob kiwulak Ejiipt
1Laj Israel ki'elk aran ut kixk'am chirix chixjunil li k'aru wank re. Naq kiwulak Berseba, kimayejak chiru li xYos laj Isahak li xyuwa'. 2Sa' ajwi' li q'oqyink a'an li Yos kixk'ut rib' chiru laj Israel sa' moy u ut kixye re: “Jakob, Jakob”, chan re. Kichaq'ok a'an: “We'kin”, chan.
3Toja' naq li Yos kixye re: “Laa'in li Yos, xYos laayuwa'. Matxiwak chi xik Ejiipt, xb'aan naq aran twisi aawik'in jun xnimal ru tenamit. 4Laa'in tinxik aawochb'een aran Ejiipt, ut laa'in ajwi' tinsutq'isinq chaq aawe arin. Laj José taatz'apoq re xsa' laawu”.
5Toja' naq laj Jakob ki'elk Berseba ut eb' li ralal ke'xtaqsi li xyuwa'eb' rochb'eeneb' li xkok'al ut eb' li rixaqil sa'eb' li b'eleb'aal ch'iich' taqlanb'ileb' chaq xb'aan laj Parahón. 6Ke'xk'am ajwi' eb' li xketomq ut jo'ch'inal jo'nimal li ke'reechani chaq Kanahán, ut koheb' aran Ejiipt.#46,6 Hch 7,15. Laj Jakob kixk'am chirix chixjunil li xjunkab'al: 7eb' li ralal ut eb' li xrab'in, jo' ajwi' eb' li ri xmam. Chixjunileb' koheb' chirix aran Ejiipt.
8A'aneb' a'in li xk'ab'a'eb' li ralal xk'ajol laj Israel li koxe'okaq Ejiipt: laj Jakob ut eb' li ralal xk'ajol. Laj Rubén a'an li xb'een alalb'ej, 9ut eb' li ralal laj Rubén: laj Enok, laj Palú, laj Jesrón ut laj Karmí. 10Eb' li ralal laj Simehón: laj Yemuel, laj Yamín, laj Ohad, laj Yakín, laj Sójar ut laj Saúl li kiyo'laak rik'in li ixq aj Kanahán. 11Eb' li ralal laj Leví: laj Kersón, laj Kehat, laj Merarí. 12Eb' li ralal laj Judá: laj Er, laj Onán, laj Selá, laj Perés ut laj Séraj (ab'anan laj Er ut laj Onán ak ke'kamk chaq Kanahán), ut eb' li ralal laj Parés: laj Jesrón ut laj Jamul. 13Eb' li ralal laj Isakar: laj Tolá, laj Puhá, laj Yasub ut laj Simrón. 14Eb' li ralal laj Sabulón: laj Séred, laj Elón ut laj Yajlel.
15A'aneb' a'in li ralal laj Jakob rik'in lix Liiy li ke'yo'laak Padán-Aram; kiwank ajwi' jun xrab'in, xDina xk'ab'a'. Oxlaju xka'k'aaleb' chixjunileb' li ralal ut eb' li xrab'in.
16Li ralaleb' laj Gad a'aneb' a'in: laj Sepón, laj Jakí, laj Suní, laj Esbón, laj Erí, laj Arodí ut laj Arelí. 17Eb' li ralal laj Aser a'aneb' a'in: laj Imná, laj Isbá, laj Isbí, laj Beriá ut lix Séraj, ranab' eb' a'in. Eb' li ralal laj Beriá a'aneb' a'in: laj Jéber ut laj Malkiel. 18A'aneb' a'in li ralal laj Jakob rik'in lix Silpá, li kik'ehe'k re xb'aan laj Labán cho'q aj k'anjel chiru lix Liiy li xrab'in. Waqlajuheb' li ralal laj Jakob li ke'yo'laak rik'in li ixq a'an.
19Eb' li ralal laj Jakob rik'in lix Rakel, li rixaqil, a'aneb' a'in: laj José ut laj Benjamín. 20Laj José kiwank wiib' li ralal aran Ejiipt rik'in lix Asnat, xrab'in laj Poti Fera, aj tij aran On:#46,20 Gn 41,50-52. laj Manasés ut laj Efraín xk'ab'a'eb'. 21Eb' li ralal laj Benjamín a'aneb' a'in: laj Belá, laj Béker, laj Asbel, laj Kerá, laj Nahamán, laj Ejí, laj Ros, laj Mupín, laj Jupín ut laj Ard. 22A'aneb' a'in li ralal laj Jakob rik'in lix Rakel: chixjunileb' a'in kaalajuheb' chi alalb'ej.
23Li ralal laj Dan a'an laj Jusín. 24Eb' li ralal laj Neftalí a'aneb' a'in: laj Yajsel, laj Juní, laj Yéser ut laj Salún. 25A'aneb' a'in li ralal laj Jakob rik'in lix Bilhá li kik'ehe'k xb'aan laj Labán cho'q aj k'anjel chiru lix Rakel li xrab'in: a'aneb' a'in li ke'yo'laak rik'in. Chixjunileb' a'an wuqub'eb' chi alalb'ej.
26Chixjunileb' li koxe'okaq Ejiipt rochb'eeneb' laj Jakob, eb' li tz'aqal ralaleb' (chi ink'a' k'eeb'ileb' sa' ajl li rixaqileb' li ralaleb' laj Jakob), chixjunileb' a'an waqib' xkaak'aaleb' (66) chi alalb'ejeb'. 27Wiib'eb' li ralal laj José ke'yo'laak Ejiipt. Chixjunileb' li koxe'okaq Ejiipt, yo'lajenaqeb' sa' rochoch laj Jakob, lajeeb' xkaak'aaleb' (70) chixjunileb'.#46,27 Hch 7,14.
Laj Jakob ut laj José ke'xtaw rib'
28Laj Israel kixtaqla laj Judá chi uub'ej chi xpatz'b'al re laj José naq a'an xb'enwa taawulaq Gosen chi xk'ulb'al. Naq koxe'okaq eb' a'an sa' li na'ajej Gosen, 29laj José kixb'ak' li xb'eleb'aal ch'iich' chirixeb' li kawaay ut koho Gosen chi xk'ulb'al laj Israel, li xyuwa'. Naq kiril ru, kixq'alu chi xkux ut k'ajo' naq kiyaab'ak sa' xb'een xkux. 30Toja' naq kixye laj Israel re laj José: “Anaqwan truuq tinkamq xb'aan naq xwil aawu, ut yaal naq toj yo'yookat”, chan.
31Chirix chik a'an kixye laj José reheb' li ras ut reheb' chixjunil li wankeb' sa' rochoch li xyuwa': “Xik we chi xyeeb'al resil re laj Parahón: «Xe'k'ulunk wik'in eb' li was ut eb' li xe'wank sa' rochoch linyuwa' aran Kanahán, 32ut xe'xk'am chaq eb' li xkarneer, xwakax ut chixjunil li k'aru wank reheb', xb'aan naq a'aneb' aj k'aak'alenel karneer ut aj ilol ketomq». 33Naq laj Parahón texxb'oq ut tixpatz' eere: «K'aru li k'anjel nekeb'aanu?», cha'aq, 34teeye re: «Chalen chaq sa' qakach'inal laa'o aj k'aak'alenel ketomq; jo'kaneb' ajwi' chaq eb' li qaxe'toonil yuwa'», cha'qex. Chi jo'kan truuq texkanaaq sa' li na'ajej Gosen”, chan laj José.
Xb'aan naq eb' laj Ejiipt xik' neke'ril chixjunileb' laj k'aak'alenel ketomq.
Currently Selected:
Gn 46: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
