Gn 44

Li xsek' laj José sa' li xsaak laj Benjamín

1Toja' naq laj José kixye re laj tenq' re: “Nujob'resi li xsaakeb' li winq a'in, jo'ch'inal jo'nimal truuq te'xk'am, ut taak'e xtumin li junjunq sa' li xsaak. 2Ut linsek' yiib'anb'il rik'in plaat taak'e sa' xsaak li iitz'inb'ej rochb'een xtuminal li xloq'om”. Ut a'an kixb'aanu jo' kiyehe'k re xb'aan laj José.

3Naq kisaqewk, ke'chaq'rab'iik li winq rochb'eeneb' li b'uur. 4Ab'anan, ka'ajwi' ke'elk sa' li tenamit ut ink'a' ajwi' najt te'wulaq, naq laj José kixye re laj tenq' re: “Xaqlin ut ayu chirixeb' li winq a'an. Naq toxaataweb', taaye reheb': «K'a'ut naq xereeqaju li usilal rik'in maa'usilal? 5Ma maawa' tab'i' a'in li x'uk'leb' sek' laj eechal we, li nak'anjelak chiru re q'ehink? K'ajo' xyib'al ru li xeb'aanu»”.

6Naq a'an koxtaweb', kiraatinaheb' jo' chanru yeeb'il re xb'aan laj José, 7ut eb' a'an ke'xsume: “K'a'ut naq nakat-aatinak chi jo'kan? Maajun wa laa'o tqab'aanu a'in! 8K'e reetal, xqak'am chaq chiqix toj Kanahán li tumin li xqataw sa' li qasaak. Chan put ru naq tqelq'a raj plaat malaj oor sa' rochoch laj eechal qe? 9Wi junaq qe laa'o taatawmanq li sek' sa' li xsaak, chikamsiiq ut laa'o ajwi' tookanaaq cho'q aj mun sa' rochoch laj eechal qe”, chankeb'. 10Kixye laj tenq' re laj José: “Us. Chi'uxmanq jo' xeye: li taatawe'q wi' li sek', taakanaaq cho'q aj mun sa' li wochoch, ut laa'ex naru texxik”, chan.

11Eb' a'an chi junpaat ke'xkub'si li xsaakeb' chiru ch'och' ut li junjunq kixhit li xsaak. 12Laj tenq' re laj José kixtikib' sik'ok sa' xsaak li asb'ej toj kiraqe'k rik'in li iitz'inb'ej, ut kitawmank li sek' sa' xsaak laj Benjamín! 13Toja' naq eb' a'an ke'xq'ich li raq'eb', ke'xb'ak' wi' chik chixjunqaleb' li riiqeb' chirixeb' li b'uur ut ke'sutq'iik sa' li tenamit. 14Laj Judá ut eb' li riitz'in ke'ok sa' rochoch laj José li toj wank aran, ut koxe'xhupub' rib' chiru. 15Ab'an laj José kixye reheb': “K'aru xeb'aanu? Ma ink'a' nekenaw naq junaq winq kama' laa'in ch'olch'o naq naq'ehink?”. 16Kixye laj Judá: “K'a' ta wi' ru tqaye aawe, chanru too'aatinaq, k'aru tqaye re xkolb'al qib'? Kutan saqenk chiru li Yos k'aru xoomaakob'k wi'. Ut we'ko arin cho'q aj mun chiru laj eechal qe, jo' laa'o jo' ajwi' li xtawmank wi' li sek'”. 17Ab'an laj José kixye: “Maajun wa tinb'aanu a'in! Li xtawmank wi' li sek', a'an taakanaaq cho'q aj mun sa' li wochoch; ut laa'ex texq'ajq wan wi' leeyuwa' chi maak'a'aq eech'a'ajkilal”.

Laj Judá ki'aatinak chirix laj Benjamín

18Toja' naq laj Judá kijilok chi xk'atq laj José ut kixye re:

“Chinaakuy, at qaawa'. Tinye jun t'orolaq li raatin sa' xxik linqaawa'. Matjosq'o'k sa' inb'een xb'aan naq laa'at jo'kat laj Parahón. 19Laa'at xapatz' qe: «Ma wank leeyuwa' malaj junaq leeriitz'in?». 20Ut laa'o xqaye: «Hehe', wank qayuwa', tiix aj chik, ut wank ajwi' jun ralal toj saaj li kiyo'laak sa' xtiixilal. Jun chik ralal, asb'ej chiru a'an, kikamk; ka'aj chik a'an xkanaak sa' xyanqeb' li ralal li xna', ut q'axal raaro xb'aan li xyuwa'». 21Toja' naq laa'at xaye qe: «K'amomaq chaq re naq twil ru». 22Ut laa'o xqasume: «Maamin taaruuq naq li al tixkanab' chaq li xyuwa': wi tixkanab', ch'olch'o naq taakamq li yuwa'b'ej». 23Ab'anan laa'at xaye qe: «Wi ink'a' taachalq leeriitz'in cherix, ink'a' chik teeril wu».

24“Jo'kan b'i', naq xoosutq'iik rik'in li qayuwa', xoxqaye re chixjunil laayehom. 25Ut li qayuwa' xye qe: «Ayuqex wi' chik chi xloq'b'al b'ayaq qatzekemq». 26Toja' naq laa'o xqaye re: «Ink'a' naru tooxik wi ink'a' taaxik chiqix li qiitz'in. Ka'ajwi' wi toorochb'eeni a'an, truuq tooxik». 27Toja' naq li qayuwa' xye qe: «Laa'ex nekenaw naq li wixaqil wiib' ajwi' li walal xk'e we. 28Li jun xkoho ut laa'in xink'oxla: Ch'olch'o naq jun josq' aj xul xt'upink re. Ut chalen toj anaqwan ink'a' chik wilom ru. 29Ut wi anaqwan teemaq' ajwi' a'in chiwu ut tixk'ul junaq rahilal, eemaak laa'ex naq tinkub'eeq sa' xna'ajeb' li kamenaq chi ra sa' inch'ool sa' lintiixilal».

30-31“Wi anaqwan tinwulaq wan wi' linyuwa' chi ink'a' qochb'eenaq li al, ch'olch'o naq ka'ajwi' taaril naq maa'ani li al qochb'een, taakamq. Q'axal naxik xch'ool linyuwa' chirix li al, ut laa'o wank qe wi li qayuwa' taakamq sa' xtiixilal xb'aan xrahil xch'ool. 32Laa'in xinxokok chaq re li al chi xk'atq li xyuwa', rik'in li aatin a'in: «Wi ink'a' tulinq'ajsi aawe, twanq inmaak chawu chi junajwa». 33Jo'kan b'i', kanaaqin laa'in chi k'anjelak chawu cho'q reeqaj li wiitz'in ut xikaq li al chirixeb' li ras. 34Xb'aan naq chan ta ru tinxik laa'in wan wi' linyuwa' wi ink'a' wochb'eenaq li al? Ink'a' nawaj rilb'al li rahilal taachalq sa' xb'een linyuwa'”.

Currently Selected:

Gn 44: QQC

Highlight

Copy