Gn 23

Kikamk lix Sara ut kimuqe'k

1Wuqub' xwuqk'aal (127) chihab' kiyo'yook lix Sara sa' ruuchich'och', 2ut kikamk aran Kiryat-Arbá, Hebrón ajwi' nayeemank re, sa' xteepal Kanahán. Laj Abrahán kiraho'k xch'ool ut kiyaab'ak xb'aan xkamik li rixaqil.

3Chirix a'an kixkanab' junpaat li kamenaq ut koxraatinaheb' laj Hit chi jo'ka'in: 4“Laa'in chalenaqin chaq sa' jalan tenamit ut yal aj numelin sa' eeyanq.#23,4 Heb 11,9.13. K'ayimaq we junaq muqleb'aal sa' eeyanq re naq toxinxok linkamenaq ut tinmuq aran”,#23,4 Hch 7,16. chan. 5Ke'chaq'ok eb' laj Hit ut ke'xye re laj Abrahán: 6“Wa', choohaawab'ihaq. Laa'at xnimal ru winq chalenaqat sa' qayanq sa' xk'ab'a' li Qaawa'. Chamuq laakamenaq sa' li muqleb'aal q'axal chaab'il li wank sa' qayanq. Maajun qe laa'o ink'a' ta tixk'e aawe li xmuqleb'aal re taamuq laakamenaq”, chankeb'.

7Toja' naq laj Abrahán kixq'et rib' chiruheb' li poyanam, a'eb' laj Hit, 8ut kiraatinaheb' chi jo'ka'in: “Wi naxk'ul eech'ool naq laa'in tinxok ut tinmuq linkamenaq, chineerab'ihaq ut chex'aatinaq chiwix rik'in laj Efrón, ralal laj Sójar, 9re naq tixk'e we li ochoch pek wank Makpelá, sa' xnub'ajlil li xch'och', xb'aan naq re li na'ajej a'an. Chixk'ayihaq we jo'nimal xtz'aq taaraj, ut chi jo'kan taawanq sa' eeyanq jun na'ajej tinmuqeb' wi' linkamenaq”, chan.

10K'ojk'o laj Efrón sa' xyanqeb' laj Hit. Jo'kan naq kichaq'ok ut kixye re laj Abrahán chiruheb' laj Hit ut chiru chixjunileb' li yookatqeb' chi ok sa' li tenamit: 11“Wa', chinaawab'ihaq. Tink'e aawe li ch'och' jo' ajwi' li muqleb'aal li wank chisa'. Tink'e aawe chiruheb' chixjunil li wech tenamitul. Muq chaq laakamenaq aran”, chan.

12Ab'an laj Abrahán kixq'et rib' chiruheb' li tenamit 13ut kiraatina laj Efrón chiruheb' chixjunil: “Chinaawb'ihaq wi naxk'ul laach'ool. Tink'e aawe li xtz'aq li ch'och'; k'ul chiwu ut toxinmuq aran linkamenaq”, chan. 14Kixye laj Efrón re laj Abrahán: 15“Wa', chinaawab'ihaq. Jun o'q'ob' (400) chi tumin plaat, a'an xtz'aq li na'ajej a'an. Ma nim ta a'an cho'q aawe ut cho'q we? Chamuqaq aran laakamenaq”, chan.

16Laj Abrahán kixk'ul xch'ool ut kixb'is li tumin kixxaqab' laj Efrón, chiruheb' laj Hit: jun o'q'ob' chi tumin plaat, jo' neke'b'isok wi' eb' laj k'ay. 17Chi jo'kan li xch'och' laj Efrón li wank Makpelá sa' xjayal releb'l saq'e re Mambré, li ochoch pek ut chixjunil li k'iche' li wank chisa' ut sa' li xnub'ajl, chixjunil a'an 18ki'eechaniik xb'aan laj Abrahán chiruheb' laj Hit ut chiru chixjunileb' li yookatqeb' chi ok sa' li tenamit.

19Chirix chik a'an laj Abrahán kixmuq lix Sara li rixaqil sa' li ochoch pek li wank Makpelá, sa' xjayal Mambré (Hebrón ajwi' xk'ab'a'), sa' xteepal Kanahán. 20Jo'kan naq li ch'och' a'an ut li ochoch pek li wank chisa' ki'eechaniik xb'aan laj Abrahán ut kik'ehe'k re xb'aaneb' laj Hit, re naq aran te'muqe'q eb' li kamenaq.

Currently Selected:

Gn 23: QQC

Highlight

Copy