Ez 2
2
Laj Esekiel ki'ok cho'q propeet
1Kixye we chi jo'ka'in: “Esekiel, at kaamel winq, xaqlin xb'aan naq ok we chawaatinankil”. 2Naq yo chi xyeeb'al a'in, li xwankil li Qaawa' ki'ok wik'in ut kinxwaklesi; ut kiwab'i 3naq kixye we:
“At kaamel winq, laa'in tatintaqla rik'ineb' li ralal xk'ajol laj Israel, a'aneb' jun tenamit ink'a' neke'ab'ink ut xe'xq'etq'eti rib' chiwu. Eb' a'an ut eb' li xxe'toonil yuwa'eb' xe'jipo'k chiwu chalen toj anaqwan. 4Kaw ajwi' li xjolomeb' li ralal xk'ajol ut xjipo'k li xch'ooleb'. Sa' xyanqeb' a'an tatintaqla chi xyeeb'al reheb': «Jo'ka'in xye li Qaawa'», cha'qat. 5Ut a' yaal reheb' ma tate'xpaab' malaj ink'a', xb'aan naq jwal q'etq'eteb', te'xnaw naq wank jun propeet sa' xyanqeb'.
6“Ut laa'at, kaamel winq, maaxiwa ruheb' chi moko tatxiwaq xb'aan li k'aru te'xye aawe, us ta chanchan naq sutsuuqat sa' li k'ix malaj wanqat ta sa' xyanqeb' laj xook'. Matxiwak rik'in li k'aru te'xye chi moko naq te'josq'o'q chawu, xb'aan naq q'axal kaw li xjolomeb'. 7Taaye reheb' li waatin, a' yaal chik reheb' ma te'xpaab' malaj ink'a', xb'aan naq numtajenaq q'etq'eteb'.
8“At kaamel winq, ab'i chi us li k'aru ok we chi xyeeb'al aawe, ut maaq'etq'eti aawib' jo' li q'etq'etil tenamit a'an. Te laawe ut tzeka li tink'e aawe”, chan li Qaawa'.
9-10Toja' naq kiwil jun li uq'ej ye'yo chiwu, yo chi xk'eeb'al we jun li b'otb'ookil hu tz'iib'anb'il chi xka'pak'alil ru.#2,9-10 Zak 5,1-4; Ap 5,1. Ut kixte li hu chiwu: aran tz'iib'anb'il junes rahilal, yaab'ak ut rahil ch'oolej.
Currently Selected:
Ez 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.