Ex 4
4
Li Qaawa' kixk'e xwankil laj Moisés chi b'aanunk sachb'ach'oolej
1Kichaq'ok laj Moisés ut kixye: “Chakuy inmaak, ink'a' tine'xpaab', chi moko te'rab'i xyaab' inkux; te'xye b'an: «Ink'a' xk'utb'esi rib' li Qaawa' chawu»”.
2Toja' naq li Qaawa' kixpatz' re: “K'aru wank sa' laawuq'?”. “Jun xuq'”, chan laj Moisés. 3Kiyehe'k ut re xb'aan li Qaawa': “Kut sa' ch'och'”. Laj Moisés kixkut sa' ch'och' ut kijalaak ru chi k'anti'il.
Naq laj Moisés ki'elelik chiru, 4kiyehe'k re xb'aan li Qaawa': “Ye' laawuq' ut chap chi xye”. Laj Moisés kixye' li ruq', kixchap chi kaw ut kikanaak wi' chik chi xuq'il sa' ruq'. 5“B'aanu chi jo'kan chiruheb' laj Israel re naq te'xpaab' naq li Qaawa' xk'utb'esi rib' chawu, a' li xYos li xxe'toonil yuwa'eb', li xYos laj Abrahán, laj Isahak ut laj Jakob”, chan li Qaawa'. 6Ut kixye ajwi': “Ch'ik laawuq' chire laach'ool”.
Laj Moisés kixch'ik li ruq' chire xch'ool ut naq kirisi wi' chik, nujenaq chik chi saqlep, saq saq kama' li ratz'amke. 7“Ch'ik wi' chik laawuq' chire laach'ool”, chu'uxk re xb'aan li Yos. Kixch'ik wi' chik ut, naq kirisi, kikanaak wi' chik kama' li xjunxaqalil. 8“Wi ink'a' tate'xpaab' ut ink'a' te'rab'i xyaab' laakux rik'in li xb'een sachb'ach'oolej, rik'in li xkab' tate'xpaab'. 9Ut wi ink'a' ajwi' tate'xpaab' rik'in li wiib' sachb'ach'oolej a'in, wi ink'a' te'rab'i li xyaab' aakux, taaxok kach'inaq laaha' sa' nima' ut taahoy sa' ch'och', ut li ha' li taaxok sa' nima' taajalaaq ru chi kik'ul chiru ch'och'”, chan li Qaawa' re laj Moisés.
Laj Aharón taa'aatinaq sa' xk'ab'a' laj Moisés
10Kixye laj Moisés re li Qaawa': “Chakuy inmaak, at Qaawa', ch'a'aj li aatinak chiwu. Ut chalen naq xatikib' raatinankil laj k'anjel chawu, jo'kan ajwi' nink'ul. Tat we ut nat'il li ru'uj waq'”, chan.
11Ab'an li Qaawa' kixsume: “Ani xk'ehok li ehej re li winq? Ani aj b'an wank li mem ut li tz'ap xik, li na'ilok ut li mutz'? Ma ink'a' tab'i' inb'aan laa'in li Qaawa'? 12Jo'kan b'i', ayu: laa'in wanqin sa' laawe ut tink'ut chawu li k'aru toxaaye”.
13Kixye ut laj Moisés: “Chakuy inmaak, at Qaawa', taqla ani taawaj”. 14Toja' naq kichalk xjosq'il li Qaawa' sa' xb'een laj Moisés: “Ma ink'a' tab'i' wank laawiitz'in laj Aharón, aj Leví?#4,14 Aj Leví naraj naxye naq laj Aharón a'an aj tij. Ninnaw naq na'aatinak chi us. K'e reetal: we' chaq, x'elk chak'ulb'al; ut naq tulatril, taasaho'q sa' xch'ool. 15Taawaatina ut taak'e li aatin sa' re. Laa'in wanqin sa' laawe ut sa' li re, ut tink'ut cheru li tento teeb'aanu. 16A'an taa'aatinaq rik'in li tenamit sa' aak'ab'a': a'anaq laawe ut laa'ataq ruuchil li Yos cho'q re. 17Chap li xuq' a'an, xb'aan naq rik'in a'an xninqal sachb'ach'oolej taab'aanu”.
Laj Moisés kisutq'iik Ejiipt
18Toja' naq kisutq'iik laj Moisés, kiq'ajk sa' rochoch laj Jetró, xyuwa' li rixaqil, ut kixye re: “Chakuy inmaak, xik we chi rilb'aleb' wi' chik li was wiitz'in li wankeb' chaq Ejiipt re naq tinnaw ma toj yo'yookeb'”. Kichaq'ok laj Jetró ut kixye re: “Ayu sa' tuqtuukil usilal”.
19Xyehom ajwi' li Qaawa' re laj Moisés aran Madián: “Ayu, sutq'in Ejiipt, xb'aan naq kamenaqeb' chik chixjunileb' li ke'raj aakamsinkil”.
20Toja' naq laj Moisés kixk'am li rixaqil ut li ralal, kixk'eheb' chirix jun b'uur ut kiq'ajk sa' li tenamit Ejiipt. Laj Moisés kixchap ajwi' li xxuq' li Yos.
21Li Qaawa' kixye re laj Moisés: “Akaq xatwulak Ejiipt, b'aanu chiru laj Parahón chixjunileb' li sachb'ach'oolej xink'eheb' sa' aawuq'. A'ut laa'in tinkawub'resi xch'ool laj Parahón ut ink'a' tixkanab'eb' chi elk li tenamit. 22Toja' naq taaye re: «Jo'ka'in naxye li Qaawa': Laj Israel a'an li walal, a'an li xb'een walal. 23Jo'kan naq ninye aawe: Kanab' chi xik li walal re naq toxinxloq'oni; ab'an wi ink'a' taakanab' chi xik, laa'in tinkamsi laawalal, a' li xb'een aawalal»”.#4,23 Ex 12,29.
24Ut kik'ulmank naq sa' li b'e xaqaamil li Qaawa' chiru laj Moisés sa' li na'ajej yo wi' chi xnumsinkil li q'oqyink, ut kiraj raj xkamsinkil. 25Toja' naq lix Seforá kixchap jun q'esnal pek, kixset xtz'uumal xtz'ejwal li ralal ut rik'in a'an kixch'e' li roq laj Moisés, yo chi xyeeb'al: “Laa'at inb'eelomat re kik'”, chan. 26Ut ka'ajwi' kixye: “Inb'eelomat re kik'”, ki'ach'ab'aak laj Moisés sa' xk'ab'a' li sirkunsisyon.
27Kixye li Qaawa' re laj Aharón: “Ayu sa' li chaqich'och' chi xk'ulb'al laj Moisés”, chan. Koho ut koxtaw laj Moisés sa' li xtzuul li Yos, ut kixtz'ub' ru. 28Toja' naq laj Moisés kixseeraq'i re laj Aharón chixjunil li kichaq'rab'iik wi' xb'aan li Qaawa' jo'wi' chixjunileb' li xninqal eetalil kitaqlaak chi xb'aanunkil. 29Chirix chik a'an koheb' laj Moisés ut laj Aharón, ut ke'xch'utub' chixjunil li xcheekelaleb' laj Israel. 30Laj Aharón kixye resil jo'ch'inal jo'nimal li yeeb'il chaq xb'aan li Qaawa' re laj Moisés, ut a'in kixb'aanu li xninqal eetalil chiruheb' li tenamit.
31Eb' laj Israel ke'xpaab' ut, naq ke'rab'i naq li Qaawa' xulrula'ani li xtenamit ut xk'e reetal li xrahilaleb', ke'xhupub' rib' chi loq'onink.
Currently Selected:
Ex 4: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.