Ex 19
19
III. LI SUMWANK SA' LI TZUUL SINAÍ (19-24)
Eb' laj Israel ke'wulak Sinaí
1Oxib' po relikeb' chaq Ejiipt, sa' li xb'een kutan re li po, ke'wulak eb' li ralal xk'ajol laj Israel sa' li chaqich'och' re Sinaí. 2Ke'elk chaq Refidín ut, naq ke'wulak sa' li chaqich'och' re Sinaí, aran ke'hilank. Eb' laj Israel ke'hilank sa' li chaqich'och', chiru li tzuul. 3Chirix chik a'an kitaqe'k laj Moisés wan wi' li Yos, ut kib'oqe'k chaq xb'aan li Qaawa' toj sa' li tzuul.
Aran kiyehe'k re: “Jo'ka'in taaye reheb' li ralal xk'ajol laj Jakob ut a'in taak'ut chiruheb' laj Israel: 4«Ak eerilom chaq k'aru xinb'aanu reheb' laj Ejiipt ut chanru naq xexink'am chaq wik'in jo' sa' xb'een xxik' li nimla t'iw. 5Jo'kan b'i', wi relik chi yaal teerab'i xyaab' inkux ut teepaab' linSumwank, laa'exaq weechanihom sa' xyanq chixjunileb' li tenamit,#19,5 Dt 4,20; 7,6; 14,2; 26,18; Tit 2,14. xb'aan naq we chixjunil li ruuchich'och'. 6Laa'exaq jun santil tenamit, ut tex'awab'ejinq jo' aj tij».#19,6 1 P 2,5.9; Ap 1,6; 5,10. A'aneb' a'in li aatin taaye reheb' li ralal xk'ajol laj Israel”.#19,5-6 1 P 2,9.
7Koho laj Moisés, koxch'utub'eb' li xcheekel winqilaleb' li tenamit ut kixye reheb' li k'aru kitaqlaak wi' xb'aan li Qaawa'. 8Ut chixjunil li tenamit wotz ke'xsume: “Taaqab'aanu jo'nimal li xye li Qaawa'”,#19,8 Ex 24,3; Dt 5,27. chankeb'. Toja' naq laj Moisés kixnumsi li xyehom li tenamit chiru li Qaawa'.
9Kixye li Qaawa' re laj Moisés: “K'e reetal, tinchalq aawik'in sa' jun li choql moymoy ru, re naq li tenamit tine'rab'i naq yooqin chawaatinankil, ut chi jo'kan junelik tate'xpaab'”.
Naq laj Moisés kixnumsi re li Qaawa' li xyehom li tenamit, 10kiyehe'k re: “Ayu rik'ineb' li tenamit ut chataqlaheb' chi xsantob'resinkil rib' chiru li kutan a'in jo' ajwi' wulaj; xpuch'aqeb' li raq' 11ut kawresinb'ilaqeb' re li rox kutan, xb'aan naq sa' li rox kutan tinkub'e'q chaq laa'in li Qaawa', sa' xb'een li tzuul Sinaí, chiru chixjunileb' li poyanam. 12K'e xnub'ajlil li tzuul chi xsutam ut ye reheb': «K'ehomaq reetal, mextaqe'k sa' xb'een li tzuul chi moko texwulaq chi xtoon». Chixjunil li taanach'oq rik'in li tzuul, taakamq. 13Moko rik'in uq'ej ta taakamsiiq, rik'in b'an pek malaj simaj; us ta winq malaj xul, ink'a' taakanaaq chi yo'yo. Toj te'rab'i xyaab' li pur, toja' naq truuq te'taqe'q sa' xb'een li tzuul”.#19,12-13 Heb 12,18-20.
14Laj Moisés kikub'eek chaq sa' li tzuul, jun k'oot wan wi' li tenamit, ut kixsantob'resiheb' li tenamit. Naq eb' a'an ke'xpuch' li raq'eb', 15laj Moisés kixye reheb': “Kawresihomaq eerib' re li rox kutan ut mexwank rik'in ixq”, chan.
16Hik'ho sa' li rox kutan kilaje'wank li kaaq, li raq'kaaq#19,16 Ap 4,5. ut jun li choql moymoy ru sa' xb'een li tzuul; ki'eek'ank ajwi' jun tronpeet chi numtajenaq kaw, ut chixjunileb' li poyanam li wankeb' sa'eb' li muheb'aal ke'ok chi xsiksikinkil rib'. 17Toja' naq laj Moisés kirisiheb' li tenamit sa' li xmuheb'aaleb' re naq toxe'xk'ul chaq li Yos; ut ke'xaqliik chi xtoon li tzuul. 18Nab'uquqnak xsib'el li tzuul xb'aan naq li Qaawa' xkub'eek sa' xb'een a'an sa' xam.#19,16-18 Dt 4,11-12; 5,4; Eklo 45,5. Nataqe'k xsib'el jo' xsib'el junaq oorn, ut chixjunil li tzuul nahich'lok chi q'axal kaw. 19Li tronpeet yo chi kawuuk xyaab': laj Moisés na'aatinak ut li Qaawa' naxsume rik'in kaaq.
20Kikub'eek li Qaawa' sa' li tzuul Sinaí, sa' xb'een li tzuul, ut kixb'oq chaq laj Moisés. Naq laj Moisés kitaqe'k aran, 21kiyehe'k re xb'aan li Qaawa': “Kub'en ut q'useb' li tenamit: me'xq'ax chaq li nub'ajl re rilb'al wu, xb'aan naq, wi ta jo'kan, naab'al te'kamq sa' xyanqeb'. 22Jo'kanaqeb' ajwi' laj tij: wi te'nach'oq wik'in, tento xb'enwa te'xsantob'resi rib'. Mare anchal taachalq linjosq'il sa' xb'eeneb'”. 23Kichaq'ok laj Moisés ut kixye: “Li tenamit ink'a' te'ruuq chi taqe'k chiru li tzuul Sinaí, xb'aan naq laa'at xaram chiqu: «K'e xnub'ajlil li tzuul chi xsutam ut kanaaq cho'q loq'», chankat”. 24Ut li Qaawa' kixye re: “Ayu, kub'en ut moqon taqen chaq wi' chik aawochb'een laj Aharón. Ab'an eb' laj tij ut eb' li tenamit me'xq'ax li nub'ajl ut me'taqe'k chaq wankin wi', re naq ink'a' taachalq linjosq'il sa' xb'eeneb'”.
25Toja' naq laj Moisés kikub'eek wankeb' wi' laj Israel ut kixye resil reheb'.
Currently Selected:
Ex 19: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
