Ex 17

Ki'elk li ha' sa' li raxpek

(Nm 20,1-13)

1Chixjunil li xkomonileb' laj Israel ke'elk sa' li chaqich'och' re Sin re xtiqb'al li xb'eenikeb', jo' chanru ke'taqlaak wi' xb'aan li Qaawa', ut koxe'hilanq Refidín, b'arwi' li tenamit ink'a' ke'xtaw xha'eb' re te'ruk'. 2Toja' naq ke'ok chi xwech'inkil laj Moisés: “K'e quk'a'”, chankeb'. Kichaq'ok laj Moisés ut kixye reheb': “K'a'ut naq yookex chinwech'inkil? K'a'ut naq nekeyal rix li Qaawa'?”.

3Ab'an k'ajo' naq te'chaqiq reheb' li tenamit. Jo'kan naq ke'ok wi' chik chi xwech'inkil laj Moisés: “K'a'ut naq xoohaawisi chaq Ejiipt? Ma re qakamsinkil xb'aan chaqi'eel, laa'o, eb' li qalal qak'ajol ut eb' li qaketomq?”, chankeb'.

4Toja' naq laj Moisés kixyaab'a li Qaawa' ut kixye: “K'aru tinb'aanu rik'in li tenamit a'in? Kach'in chik maa nikine'xkuti chi pek”. 5Kichaq'ok li Qaawa' ut kixye re laj Moisés: “Numen chiru li tenamit ut k'am chawix wiib' oxib' li xb'eenileb' laj Israel. K'am ajwi' sa' aawuq' li xuq' xasak' wi' li nima', ut ayu. 6Laa'in wanqin chawu aran Horeb, sa' xb'een li nimla pek. Taasak' li raxpek ut taa'elq chaq ha' re naq te'uk'aq li tenamit”.

Jo'kan kixb'aanu laj Moisés chiruheb' li xb'eenil laj Israel.#17,6 Sab 11,4. 7Masá ut Meribá kixk'e cho'q xk'ab'a' li na'ajej a'an, xb'aan naq eb' laj Israel ke'xwech'i ut ke'xyal rix li Qaawa': “Ma wank li Qaawa' sa' qayanq malaj ink'a'?”, chankeb'.

Eb' laj Israel ke'yalok rik'ineb' laj Amalek

8Ke'chalk eb' laj Amalek chi yalok rik'ineb' laj Israel aran Refidín. 9Toja' naq laj Moisés kixye re laj Josué: “Taasik'eb' ru winq li te'xik chawix wulaj re yalok rik'ineb' laj Amalek. Laa'in xaqxooqin sa' xb'een li tzuul, chi wanq xxuq' li Yos sa' wuq'”.

10Laj Josué kixb'aanu jo' kiyehe'k re xb'aan laj Moisés; ki'elk chi yalok rik'ineb' laj Amalek, ut laj Moisés, laj Aharón ut laj Jur ke'taqe'k sa' xb'een li tzuul. 11Ut kik'ulmank a'in: naq ye'yookeb' li ruq' laj Moisés, q'axal kaweb' rib' laj Israel; ut naq kub'sinb'ileb', a'eb' chik laj Amalek kaweb' rib'. 12Ke'lub'k li ruq' laj Moisés; jo'kan naq ke'xchap jun li pek ut ke'xk'e cho'q xk'ojarib'aal, ut laj Moisés kihilank sa' xb'een. Laj Aharón ut laj Jur wankeb' chi xka'pak'alil, yookeb' chi xtaqsinkil li ruq' laj Moisés. Jo'kan naq eb' li ruq' ke'xkuy wank chi ye'yo toj reetal ki'ok li saq'e. 13Ut laj Josué kixsach xwankileb' laj Amalek chi junwaakaj.

14Toja' naq li Qaawa' kixye re laj Moisés: “Tz'iib'a a'in sa' li hu re naq junelik wanq sa' eech'ool, ut yaab'asi sa' xxik laj Josué: «Laa'in tinsach chi junajwa li xk'ab'a'eb' laj Amalek junsut junrub'el choxa»”.#17,14 Dt 25,17-19; 1 S 15,2-9.

15Moqon laj Moisés kixyiib' jun li artal, ut “Qaawa' Nisí” kixk'e cho'q xk'ab'a'; 16ut kixye: “Li reetalil li Qaawa' sa' uq'ej. Li Qaawa' taayaloq rik'in laj Amalek junq'e junq'e kutan”.

Currently Selected:

Ex 17: QQC

Highlight

Copy