Hch 14

Aran Ikonio

1Jo'kan ajwi', sa' li tenamit Ikonio, laj Pablo ut laj Pedro ke'ok sa' li xch'utleb'aal kab'l eb' laj Judiiy ut ke'aatinak chi chaab'il; ut rik'in li aatin ke'rab'i k'ajo' xk'ihaleb' laj Judiiy ut eb' laj Griego ke'ok chi paab'ank. 2Ab'anan eb' laj Judiiy junch'ol, eb' li ink'a' ke'paab'ank, ke'xyoob' xjosq'ileb' li maawa'eb' aj Judiiy ut ke'xpo' xch'ooleb' chirixeb' laj paab'anel. 3Laj Pablo ut laj Bernabé toj najt chik ke'wank aran, kaweb' xch'ool chi aatinak chirix li Qaawa'; ut A'in naxxaqab' xwankil li k'aru neke'xye chirix li xrahom li Yos rik'in li xninqal ru eetalil ut sachb'ach'oolej naxk'e reheb' chi xb'aanunkil.

4Toja' naq eb' li wankeb' sa' li tenamit a'an ke'xjach rib': wan ke'okenk chirixeb' laj Judiiy, wankeb' chik ke'okenk chirixeb' li apóstol. 5Ut eb' li maawa'eb' aj Judiiy ke'xk'am rib' sa' aatin rik'ineb' laj Judiiy rochb'eeneb' laj k'amol xb'eheb', ut ke'xk'uub' ru xmajewankil eb' li apóstol ut xteninkileb' chi pek. 6Naq ke'xnaw a'an, laj Pablo ut laj Bernabé ke'elelik, koheb' toj Listra ut Derbe, xtenamiteb' laj Likaonia, jo'wi' sa'eb' li na'ajej wankeb' chi xsutam. 7Ut aran ajwi' ke'ok chi xpuktesinkil li Chaab'il Esilal.

Kik'iraak jun li sik

(Hch 3,1-10)

8K'ojk'o aran jun li winq sik li roq ut yeq chalen chaq sa' xyo'lajik, maajun wa b'eejenaq, 9yo chi rab'inkil laj Pablo chi aatinak. Laj Pablo kixka'ya a'an, kixk'e reetal naq wank xpaab'aal re k'irtasiik, 10ut kixye re chi kaw xyaab' xkux:

—Xaqab' aawib' chi tiik sa' xb'eeneb' laawoq.

Ut a'an ak taapisk'oq, ut ki'ok chi b'eek. 11Naq eb' li poyanam ke'ril li kixb'aanu laj Pablo, ke'xjap re chi xyeeb'al sa' raatinob'aal eb' laj Likaonia:

—Xe'kub'e chaq li Yos sa' qayanq jo'eb' li winq.

12Ut laj Bernabé ke'xk'e Zews cho'q xk'ab'a' ut laj Pablo, Hermes, xb'aan naq a'an na'oksink re li aatin.#14,12 Laj Zews a'an li xb'eenil li xyoseb' laj Griego. Laj Hermes a'an li xtaql chixjunileb' li xyoseb'. 13Laj tij re li rochoch laj Zews li wank chire li tenamit kixk'ameb' chaq wakax ut kotkookil uutz'u'uj sa' rokeb'aal li rochoch li xyos, kiraj raj mayejak rochb'eeneb' li tenamit. 14Naq ke'rab'i a'in, eb' li apóstol laj Bernabé ut laj Pablo ke'xq'ich li raq'eb' ut koheb' sa' aanil wankeb' wi' li poyanam, japjookeb' re chi xyeeb'al:

15—Ex qamiiw, k'a'ut naq nekeb'aanu a'in? Laa'o yal winqo ajwi', juntaq'eeto eerik'in laa'ex. Wanko arin chi xyeeb'al eere li chaab'il esilal a'in: naq chekanab'aq a k'a'aq re ru a'in li maak'a' xyaalal ut cheq'axtesi eerib' re li yo'yookil Yos li kib'aanunk re li choxach'och', li palaw ut chixjunil li wankeb' chisa'. 16Sa'eb' li kutan ke'numje'k chaq kixkanab'eb' chixjunil li tenamit chi xk'amb'al xb'eheb' li ke'raj, 17us ta maajun sut kixkanab' xk'utb'al rib' rik'in xhoyb'al chaq li rusilal sa' xb'eeneb' chixjunileb'; toj sa' choxa naxtaqla chaq li hab' ut li ru leerawimq sa' xq'ehil, ut naxk'ojob' eech'ool rik'in tzekemq ut sahil ch'oolej.

18Rik'ineb' li aatin a'in, raasa naq ke'ruhank chi xk'ojob'ankileb' xch'ool li poyanam re naq ink'a' che'mayejaq chiruheb'.

Ke'sutq'iik Antiokía re Siria

19Toja' naq wankeb' aj Judiiy ke'chalk chaq Antiokía ut Ikonio, ke'xtakchi'i eb' li poyanam. Ke'xkuti chi pek laj Pablo, ut chi jukukinb'il ke'risi sa' li tenamit, sa' xch'ooleb' a'an naq ak xkamk. 20A'ut a'an kiwakliik, ut sutsu xb'aaneb' laj paab'anel naq ki'ok sa' li tenamit. Ut sa' li kutan jun chik koho Derbe rochb'een laj Bernabé.

21Ke'xpuktesi li Chaab'il Esilal sa' li tenamit a'an ut ke'reechani naab'al cho'q aj paab'anel; toja' naq ke'sutq'iik Listra, Ikonio ut Antiokía, 22yookeb' chi xk'eeb'al xkawub' xch'ooleb' laj paab'anel ut chi xjultikankil chiruheb' naq che'wanq junelik sa' li paab'ank: “Tento tqanumsi naab'al rahilal re naq tooruuq too'ok sa' li xnimajwal awab'ejihom li Yos”, chankeb'. 23Sa' li junjunq chi Iklees ke'xxaqab' xcheekel winqilaleb'#14,23 Eb' laj k'amol xb'e li junjunq chi Iklees neke'xaqab'aak xb'aaneb' li apóstol, maawa' xb'aaneb' li komonil (cf. Tit 1,5). ut, naq ak ke'tijok ut ke'ayuunik, ke'xq'axtesiheb' sa' ruq' li Qaawa', a' li xaqxo wi' li xpaab'ahomeb'.

24Ke'nume'k sa' xteepal Pisidia ut ke'wulak Panfilia; 25ke'xpuktesi li Aatin Perge, ut ke'kub'eek Atalía. 26Aran ke'ok sa' jun li jukub' re xik Antiokía, b'ar wi' elenaqeb' chaq ut q'axtesinb'ileb' sa' ruq' li Yos re xb'aanunkil li k'anjel li toja' ke'raqe'k wi'. 27Ut naq ke'wulak, ke'xch'utub' li Iklees ut ke'xseeraq'i reheb' chixjunil li kilajxb'aanu li Yos rochb'eeneb' ut chanru naq kixte li rokeb'aal li paab'aal chiruheb' li maawa'eb' aj Judiiy. 28Aran laj Pablo ut laj Bernabé ke'kanaak rik'ineb' laj paab'anel chiru k'iila kutan.

Currently Selected:

Hch 14: QQC

Highlight

Copy