2 S 15
15
Laj Absalón kixq'etq'eti rib' chiru laj David
1Moqon chik laj Absalón kiwank jun xb'eleb'aal ch'iich' kelonb'il xb'aaneb' xkawaay ut k'aak'alenb'il xb'aaneb' lajeeb' roxk'aal (50) chi winq. 2Rajlal kutan nawakliik toj eq'la ut naxaqliik chire li b'e sa' li rokeb'aal li tenamit, ut jo'k'ihaleb' li wankeb' sa' junaq raaxiik' ut neke'chalk re naq li awab'ej taaraqoq aatin chirixeb', neke'b'oqe'k xb'aan laj Absalón ut napatz'mank reheb' b'ar chalenaqeb' chaq. Wi eb' a'an neke'xye naq xkomoneb' laj Israel, 3laj Absalón naxye reheb': “K'e reetal, li k'aru xatchalk wi' a'an us ut maak'a' reek', ab'anan maajun tatrab'i sa' rochoch li awab'ej”. 4Ut naxye wi' chik: “Us raj naq laa'in aj raqol aatin sa' xb'een li tenamit a'in! Chi jo'kan jo'k'ihaleb' li wanqeb' sa' raaxiik' malaj sa' junaq ch'a'ajkilal, truuq raj te'chalq wik'in ut laa'in tinraqoq raj aatin chirixeb' sa' tiikilal”, chan. 5Ut naq najilok chaq junaq ut naxxulub' rib' re xk'eeb'al xsahil xch'ool, laj Absalón naxye' li ruq', naxq'alu ut naxtz'ub' ru. 6Jo'ka'in naxb'aanu rik'in chixjunileb' laj Israel li neke'xik sa' raqb'a aatin rik'in li awab'ej. Ut chi jo'kan eb' laj Israel naxik xch'ooleb' chirix laj Absalón.
7Kaahib' chihab'aq chik a'an, laj Absalón kixye re li awab'ej: “Chakuy inmaak, kanab'in chi xik Hebrón re naq tinpaab' chaq li b'arwan inyeechi'om re li Qaawa'. 8Naq toj wankin chaq Jesur re Aram, kinyeechi'i re li Qaawa': «Wi li Qaawa' tixk'e we sutq'iik Jerusalén, tinloq'oni ru li Qaawa' aran Hebrón»”. 9Kichaq'ok li awab'ej ut kixye: “Ayu sa' tuqtuukil usilal”. Ut laj Absalón kixchap xb'e ut koho.
10Toja' naq laj Absalón kixtaqlaheb' aj esil rik'in chixjunileb' li xteepal aj Israel re xyeeb'al reheb': “Naq teerab'i chi eek'ank li xukub', yehomaq naq laj Absalón xxaqab'aak cho'q awab'ej aran Hebrón”. 11Kixb'oqeb' ajwi' lajeek'aal (200) chi winq aj Jerusalén, ut eb' a'in ke'wulak rik'in chi ink'a' neke'xnaw xyaalal a'an, k'aru ok re chi xb'aanunkil laj Absalón. 12Naq laj Absalón yo chi mayejak, kixtaqla ajwi' xb'oqb'al laj Ajitófel aj Kilón, laj k'ehol xna'leb' laj David, sa' li tenamit wan wi' a'an. Chi jo'kan yookeb' chi tamk li neke'okenk chirix laj Absalón ut neke'raj xjuk'b'al xwankil laj David.
Laj David ki'elelik
13Jun aj esil kiwulak rik'in li awab'ej chi xyeeb'al naq li xch'ooleb' laj Israel yo chi xik chirix laj Absalón. 14Jo'kan naq laj David kixye reheb' chixjunil laj k'anjel li wankeb' rochb'een aran Jerusalén: “Xaqlinqex ut eleliqo xb'aan naq ink'a' tooruhanq chi kole'k chiru laj Absalón. Seeb'ahomaq eerib' chi xik. Mare anchal taachalq chi junpaat ut tolooxtaw, tixk'am chaq rahilal sa' qab'een ut tixkamsiheb' chi ch'iich' li tenamit”, chan. 15Eb' laj k'anjel ke'xsume laj David: “At awab'ej, chixjunil li taaye laa'at, laa'o tqab'aanu”, chankeb'.
16Toja' naq li awab'ej ki'elk chi oqej rochb'een chixjunil li xjunkab'al. Ka'ajwi' lajeeb' li ixq ke'kanaak chi rilb'al li rochoch. 17Koho li awab'ej jo'wi' chixjunileb' li wankeb' rochb'een ut ke'xaqliik sa' xmaril li tenamit. 18Rochb'een a'an wankeb' li xjolomileb' laj puub'. Ut eb' laj Keret, eb' laj Pélet, eb' laj Itay ut chixjunileb' laj Kit (lajeek'aal xkab' o'q'ob' chi winq li ke'taaqenk re laj David chalen chaq Gat) ke'nume'k chiru li awab'ej. 19Toja' naq a'in kixye re laj Itay aj Gat: “K'a'ut naq xatchalk chiqix? Us raj naq tatsutq'iiq ut tatkanaaq rik'in li ak' awab'ej, xb'aan naq aj ab'l tenamitat ut isinb'ilat sa' laatenamit. 20Ewer xatchalk. Ma tinmin tab'i' aawu chi xik chiqix laa'o li ink'a' ajwi' naqanaw b'ar xik qe? Ayu ut k'ameb' chawix laawech tenamitul. A' taxaq li Qaawa' chi'osob'tesinq ut chi'ochb'eeninq aawe”. 21Kichaq'ok laj Itay: “At awab'ej, aj eechal we, sa' xk'ab'a' li yo'yookil Yos ut sa' xk'ab'a' laayu'am ninye aawe naq yalaq b'ar wanqat laa'at, aran ajwi' wanqin laa'in aj k'anjel chawu, a' yaal ma yo'yooqat malaj tatkamq aawochb'eenaqin laa'in”, chan. 22Toja' naq laj David kixye re laj Itay: “Us, tatxik chiqix”, chan.
Ut laj Itay aj Gat rochb'een chixjunileb' li winq ut eb' li poyanam koheb' chirix laj David. 23Japjookeb' re chi yaab'ak chixjunileb'. Li awab'ej kixaqliik chire li nima' Sedrón naq eb' li tenamit yookeb' chi nume'k chiru sa' xb'ehil li chaqich'och'. 24Yookeb' ajwi' chi xik rochb'een a'an, laj Sadok ut chixjunileb' laj Leví, yookeb' chi xk'amb'al li xLoq'laj Kaaxil li xSumwank li Yos. Koxe'xk'e li Loq'laj Kaax chi xk'atq laj Abiatar toj reetal ke'elk sa' li tenamit chixjunileb' li poyanam. 25Ab'an li awab'ej kixye re laj Sadok: “K'am wi' chik li xLoq'laj Kaax li Yos sa' li tenamit. Wi usilal xintaw chiru li Qaawa', A'an tinxk'e chi sutq'iik re naq twil wi' chik li Loq'laj Kaax ut li xmuheb'aal. 26Ab'an wi ink'a' sa sa' xch'ool wik'in, chixb'aanuuq we jo' naraj A'an”, chan.
27Kixye ajwi' re laj Sadok laj tij: “K'e reetal, laa'at ut laj Abiatar sutq'inqex sa' tuqtuukilal sa' li tenamit eerochb'eeneb' li wiib' leeralal: a' laj Ajimás laawalal ut laj Jonatán li ralal laj Abiatar. 28Laa'in tinkanaaq sa' xtaq'ahil li chaqich'och' toj reetal taawulaq eeresil laa'ex”, chan.
29Jo'kan naq laj Sadok ut laj Abiatar ke'xk'am wi' chik li xLoq'laj Kaax li Yos Jerusalén ut aran ke'kanaak. 30Laj David kitaqe'k sa' xb'een li tzuul Oliiw, ut tz'aptz'o li xjolom ut maak'a' xxaab' chi roq naq yo chi xik. Jo'kan ajwi' chixjunileb' li poyanam li rochb'een ke'xtz'ap xjolomeb' ut k'ajo' xyaab'eb' naq yookeb' chi taqe'k.
Laj Jusay ki'okenk chirix laj David
31Kiyehe'k resil re laj David naq laj Ajitófel wank sa' xyanqeb' li neke'okenk chirix laj Absalón. Toja' naq laj David kixye: “At Qaawa', taapo' taxaq ru li xk'a'uxl laj Ajitófel!”.
32Naq laj David kiwulak sa' xb'een li tzuul neke'xloq'oni wi' li Yos, kichalk laj Jusay aj Arkí chi xk'ulb'al, pejel li raq' ut wank pojtz' sa' xjolom. 33Laj David kixye re: “Ch'a'aj cho'q we wi tatxik chiwix. 34Ab'anan wi tatsutq'iiq sa' li tenamit ut taaye re laj Absalón naq a'anaq aj eechal aawe ut laa'ataq aj k'anjel chiru jo' naq xatk'anjelak junxil chiru li xyuwa', tatruhanq chintenq'ankil re xpo'b'al ru li yo chi xk'uub'ankil ru laj Ajitófel. 35Aran wankeb' laj Sadok ut laj Abiatar aj tijeb'. Jo'kan naq jo'ch'inal jo'nimal taawab'i sa' rochoch li awab'ej, taaye reheb' chi junelik. 36Wankeb' ajwi' aran xkab'ichaleb' li ralal, a' laj Ajimás li ralal laj Sadok ut laj Jonatán li ralal laj Abiatar; ut rik'ineb' a'an truuq tinnaw chixjunil li teerab'i laa'ex”.
37Laj Jusay, li ramiiw laj David, kox'okaq Jerusalén sa' li honal naq laj Absalón ajwi' yo chi ok sa' li tenamit.
Currently Selected:
2 S 15: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
