2 Kr 34
34
Laj Josías, awab'ej re Judá
(2 R 22,1-2)
1Waqxaqib' chihab' wank re laj Josías#34,1 Jr 3,6. naq ki'ok cho'q awab'ej ut junlaju xka'k'aal chihab' kitaqlank aran Jerusalén. 2Kixb'aanu li nawulak chiru li Qaawa', ut tz'aqal kixtaaqe li xb'e laj David li xyuwa': kixpaab' li Yos chi tz'aqal re ru.
Laj Josías kixxaqab' wi' chik xwankil li tz'aqal paab'aal
3Ak waqxaqib' chihab' rokik cho'q awab'ej chi toj saaj ajwi', laj Josías kixtikib' xsik'b'al li xYos laj David li xyuwa'; ut naq yo chik xkab'laju chihab', kixtikib' risinkileb' li tijob'aal wankatqeb' chi tzuul sa' xteepal Judá ut Jerusalén, jo' ajwi' eb' li xjalam u lix Aserá ut eb' li jalanil yos yiib'anb'ileb' rik'in ha'lesinb'il ch'iich' ut pek. 4Chiru ajwi' laj Josías ke'juk'mank li x'artal laj Bahal;#34,4 2 R 21,3; 2 Kr 33,3. ke'xputz'i eb' li artal namayejamank wi' li sununkil b'an, ut ke'xtoqi eb' li xjalam u lix Aserá ut eb' li jalanil yos yiib'anb'ileb' rik'in ha'lesinb'il ch'iich' ut pek, toj reetal ke'kok'puk'iik, ut li pojtz' kipajimank sa' xb'een xmuqleb'aaleb' li poyanam li ke'mayejak chiruheb'. 5Laj Osías kixk'at ajwi' li xb'aqeleb' laj tij sa' xb'eeneb' li artal,#34,5 1 R 13,2. ut chi jo'kan kixch'ajob'resi Judá ut Jerusalén. 6Sa'eb' li tenamit xteepalil Manasés, Efraín ut Simehón, toj Neftalí ut sa'atqeb' li na'ajej wankeb' chi xsutam, 7kixjuk'iheb' ajwi' li artal, kixputz'iheb' li xjalam u lix Aserá ut eb' li jalanil yos, ut pojtz' kixkanab'eb'. Kixjuk'i eb' li artal neke'mayejak wi' li sununkil b'an sa' chixjunil xteepal Israel. Chirix chik a'an kisutq'iik Jerusalén.
Kitawmank wi' chik li xhuhil li Chaq'rab'
(2 R 22,3—23,3)
8Ak waqxaqlaju chihab' rokik chi awab'ejink laj Josías, naq kixtaqla laj Safán, ralal laj Asalías, laj Mahasías, xjolomil li tenamit, ut laj Johaj, ralal laj Johakás laj tz'iib', re te'xyiib' li rochoch li Qaawa' li xYos, ut te'xch'ajob'resi li tenamit jo'wi' li loq'laj ochoch. 9Eb' a'in koheb' rik'in laj Jilkías, xb'eenil aj tij, ut ke'xk'e re li tumin li kiq'axtesimank sa' rochoch li Yos, a' li ke'xxok eb' laj Leví aj ilol okeb'aal rik'ineb' laj Manasés, eb' laj Efraín ut rik'in chixjunileb' laj Israel, jo' ajwi' rik'ineb' laj Judá, eb' laj Benjamín ut rik'ineb' laj Jerusalén. 10Chirix chik a'an ke'xq'axtesi li tumin reheb' laj jolominel k'anjel, a'eb' laj ilol re li rochoch li Yos, re xtojb'aleb' li yookeb' chi xyiib'ankil ut xchaab'ilob'resinkil li loq'laj ochoch. 11Ut kik'eemank reheb' laj peech', reheb' laj kab'lanel ut reheb' laj tz'ak, re xloq'b'aleb' li pek, li che', li tz'amb'a, jo'wi' re xyiib'ankil li xb'een li kab'l ke'xkanab' chi juk'e'k eb' li awab'ej re Judá.
12Eb' laj k'anjel a'in jwal tiikeb' xch'ool chi k'anjelak. Jolominb'ileb' xb'aan laj Yájat ut laj Abdías, xkomoneb' laj Leví aj Merarí, jo' ajwi' xb'aan laj Sakarías ut laj Mesulán, xkomoneb' laj Kehat, ut xb'aaneb' chixjunileb' laj Leví li q'axal neke'xnaw wajb'ak. 13A'aneb' ajwi' ke'jolomink reheb' laj iiqanel ut chixjunileb' laj k'anjel, a' yaal chanru xk'anjel li junjunq. Sa' xyanqeb' laj Leví wankeb' ajwi' aj tz'iib', aj nawoleb' chaq'rab' ut wankeb' ajwi' li neke'k'aak'alenk re li okeb'aal.
14Naq yookeb' chi risinkil li tumin kiq'axtesimank sa' rochoch li Yos, laj Jilkías, xb'eenil aj tij, kixtaw xHuhil li xChaq'rab' li Qaawa', xk'ehom re laj Moisés. 15Tikto laj Jilkías kixye re laj Safán laj tz'iib': “Xintaw xHuhil li Chaq'rab' sa' rochoch li Qaawa'”, chan. Ut kixq'axtesi li hu re laj Safán. 16Toja' naq laj Safán kixk'am li hu rik'in li awab'ej, ut kixye re li k'aru kik'ulmank: “Eb' laj k'anjel chawu yookeb' xb'aanunkil chixjunil li xe'chaq'rab'iik wi'. 17Xe'xch'utub' li tumin li xk'amamank chaq sa' rochoch li Yos, ut xe'xq'axtesi reheb' laj jolominel jo'wi' reheb' chixjunileb' li yookeb' chi k'anjelak aran”, chan.
18Laj Safán laj tz'iib' kixye ajwi' re li awab'ej: “Laj Jilkías, xb'eenil aj tij, xk'e we li hu a'in”, chan. Ut laj Safán kixyaab'asi xsa' li hu chiru li awab'ej. 19Naq li awab'ej kirab'i li naxye sa' li hu, kixq'ich li raq' 20ut kixye re laj Jilkías, jo'wi' re laj Ajikán, ralal laj Safán, re laj Abdón, ralal laj Mikeas, re laj Safán aj tz'iib' ut re laj Asaías, aj k'anjel chiru li awab'ej: 21“Ayuqex chi patz'ok rik'in li Qaawa' chiwix laa'in, chirixeb' laj Israel ut eb' laj Judá, k'aru naraj xyeeb'al eb' li aatin tz'iib'anb'ileb' sa' li hu xtawmank. Nim li xjosq'il li Qaawa' sa' qab'een, xb'aan naq eb' li qaxe' qatoon ink'a' ke'xpaab' li raatin li Qaawa' chi moko ke'xk'anjela ru li tz'iib'anb'il sa' li hu a'in”.
22Laj Jilkías ut eb' li xtaql li awab'ej koheb' rik'in lix Juldá, ixqipropeet, rixaqil laj Salún, ralal laj Tokat ut ri laj Jasrá, aj k'uulahom re li raq'eb' laj tij. Lix Juldá wank rochoch Jerusalén sa' li Ak' Na'ajej. Ut eb' a'an ke'xseeraq'i re jo' chanru kik'uub'amank. 23Kichaq'ok li ixq ut kixye:
“Jo'ka'in xye li Qaawa', xYos laj Israel: «Yehomaq re li winq li xtaqlank chaq eere 24naq li Qaawa' xye chi jo'ka'in: Tintaqla chaq nimla rahilal sa' xb'een li na'ajej a'in ut sa' xb'eeneb' li wankeb' arin. Tintaqla chaq chixjunileb' li majewal tz'iib'anb'ileb' sa' li hu xyaab'asimank xsa' chiru li awab'ej re Judá, 25xb'aan naq kine'xtz'eqtaana ut ke'ok chi k'atok pom chiruheb' jalan chik yos. Ke'xchiq' injosq'il rik'in chixjunil li k'aru ke'xyiib'. Jo'kan naq k'ajo' linjosq'il sa' xb'een li na'ajej a'in ut maajoq'e taach'anaaq. 26Yehomaq re li awab'ej re Judá, li xtaqlank chaq eere chi patz'ok rik'in li Qaawa': Jo'ka'in xye li Qaawa', xYos laj Israel: Laa'at xapaab' li waatin xawab'i. 27Xyot'e'k laach'ool ut xakub'si laawankil chiru li Qaawa' naq xawab'i li waatin chirix li na'ajej a'in ut eb' li xpoyanamil. Xaq'ich laawaq' ut xatyaab'ak chiwu. Jo'kan naq laa'in xwab'i li k'aru xaye, chan li Qaawa'. 28Tatq'ajq tatsutq'iiq rik'ineb' laaxe'toonil yuwa' ut tatmuqe'q sa' tuqtuukilal sa' laamuqleb'aal. Ink'a' taawil chixjunil li nimla rahilal tintaqla chaq sa' xb'een li na'ajej a'in ut sa' xb'eeneb' li xpoyanamil»”.
Eb' li xtaql li awab'ej ke'xk'am li aatin a'in ut ke'xnumsi re. 29Toja' naq li awab'ej kixtaqla xb'oqb'al chixjunileb' li xcheekelaleb' laj Judá ut laj Jerusalén, ut ke'xch'utub' rib' chi k'uub'ank. 30Rochb'een chixjunileb' laj Judá ut eb' laj Jerusalén, eb' laj tij, eb' laj Leví ut chixjunileb' li poyanam, jo' saajeb' ut cheekeb', kitaqe'k li awab'ej sa' rochoch li Yos, ut chiruheb' li tenamit kixte li hu kitawmank sa' li loq'laj ochoch ut kixyaab'asi xsa' chixjunil li xHuhil li Sumwank. 31Chirix chik a'an li awab'ej kixxaqab' rib' chi xk'atq roqechal li loq'laj ochoch ut kixk'ojob' li sumwank rik'in li Qaawa': kixye li raatin naq eb' laj Judá te'xpaab' li Qaawa' ut te'xyu'ami li xchaq'rab', li raatin ut chixjunil li xtaqlahom chi anchaleb' xch'ool chi anchaleb' raanm, ut te'xk'anjela ru li Sumwank jo' tz'iib'anb'il sa' li Hu. 32Chirix chik a'an kixye reheb' laj Jerusalén ut reheb' laj Benjamín naq chixjunileb' te'xk'ulub'an xpaab'ankil li sumwank. Ut eb' li wankeb' Jerusalén ke'xb'aanu jo' chanru naxye li sumwank rik'in li Qaawa', xYos eb' li xxe'toonil yuwa'eb'. 33Laj Josías kirisi chixjunil li tz'i'b'eetalil b'aanuhom wankatqeb' sa' xteepal Israel; ut kixmin ruheb' chixjunileb' li wankeb' aran naq te'xloq'oni ru li Qaawa' li xYoseb'. Jo' najtil kiyo'yook laj Josías, maajun kixkanab' xloq'oninkil li Qaawa', xYos eb' li xxe'toonil yuwa'eb'.
Currently Selected:
2 Kr 34: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.