Zac 8
8
Lhawuk lhämtes tä isen tä ifwenho laka wichi
1Lhawuk tä laj letumfwaya iwoye lhämtesna wet yok:
2–Tä wuj tä ohumin Jerusalén, ohumnhayaj tet iwoye itäj tä y'uho tä in'ohi. 3Oyäpnhiyeja Jerusalén häpkhilek oyen ow'eta. Wet Jerusalén häpkhila honhat tä nemla ile n'oyej, wet tachenaj Sión häpkhila ot'amajchet. 4Hin'ol wumhay lhäy'e atsinhay äp yachajiholak tatayhiphä Jerusalén ka'alhotas, ichäjlawethä letsutes tsi thänhäy t'at. 5Wet n'atfwas tapohiyeja hupuy laka alhotas, ikochehen hupuy kawayhil. 6Oka wichi tä imälhehiche tek imatthichela, mat athahit'a n'oho. Olham tä ohäpe Lewuk Dios tä laj letumfwaya olhämet täja. 7Ofwayhthiyeja oka wichi honhatil tä ifwala tälhche lhäy'e tä ifwala y'uyhi, 8wet ohänhihola Jerusalén häpkhilek yen lew'eta. Häpkhila oka wichi wet olham ohäpkhila lhamel laka Dios tä is alhoho wet äp matche.
9Lhawuk tä laj letumfwaya yok:
–Akhajyenhen, amel tä lelätaye n'olhämtes tä profetas yäme täjte õyenlhi lefwetes häp Owukwe tä õ'nech'aynhi. 10Tsi tä kamaj ninäma ifwalatso, lajit lakahaya hin'o#Hag 1.6 lhäy'e itshäwet tä n'olhuhyenek. Wet tä letayhfwas iche, letamsek ihichet'a wichi wet otayyenwek lhamel. 11Mat athana owohiyejela m'ak tä is wichi tä imälhehi, nemla te iwoye ifwalas tä pajche. Olham tä ohäpe Lewuk Dios tä laj letumfwaya olhämet täjtso. 12Letamsek ihihila che tutcheyhen tä nem letayhfwas ichehen. Lelafwey hiw'enhihola lhay, honhat hiw'enhihola m'ak tä is tä tälho, tsi isej inät tä tälh kaphä. Ow'enhihola tähestso wichi tä imälhehi. 13Amel tä Judá lheley lhäy'e Israel lhayis, ch'ahuyaye olhämet. Ifwalas tä pajche wichi tä honhatil iyhäj lheley iwit'äynej iyhäj häp lhämtes tä yok, “Is che atet iwoye Judá lheley lhäy'e Israel lhayis tä matche tä lewit'äyhyaj ihi.” Mat olham oaifwayhthihena wet ahäpkhila iyhäj tä wichi tä w'enha lhamejen isej. Nech'ehilak lhamel yämwethä lhamhohen tä yok, “Is che n'okäpfwayaj tä is in'amejen, tet iwoye tä iyej wichi tä Judá lheley lhäy'e Israel lhayis.” Wet häp tä olham tä ohäpe Awuk Dios tä laj letumfwaya ofwel amhohen, oyok, ¡Akhajyenhen, yej nowayay!
14“Otshupyenehte otasnhayaj amel achätilis tsi iwäkwyhayenn'o, wet otasin t'at lhamel. 15Mat athana o'isyen amel tä haw'et Jerusalén lhäy'e Judá. Yej nowayhen. 16Häp täja m'ak tä is che lewoye amel. Äm matche m'ak tä lefwenho aelhpej,#Ef 4.25 wet äm is akalelhthayaj tä n'otamsek tälhe. 17Yej waklhatej aelh lewit'äyhyaj, yej wo asufwkanyaja, tsi olham oy'ulhan tähestso. Olham tä Awukn'o olhämet täja.”
18Lhawuk tä laj letumfwaya äp ifwel n'oho tä yok:
19–Iwel'a tä cuatro, cinco, siete wet diez tä õlhaichuyhat, nech'e n'okäjyajla tä ihi Judá wet wichi akäslawethä. Wet häp tä oyok, Huminay m'ak tä matche lhäy'e n'otamsek.
20Lhawuk tä laj letumfwaya äp yok:
–Nämhihena wujpey wichi tä tälhehen honhates iyhäj. 21Wet elhpej yohlak, “Mäh n'at'ukwe Dios tä laj letumfwaya, n'at'alhela che takäpfway n'amehen.” Wet iyhäj yohlak, “Te olhamel oyikhila amchehen.” 22Matche, wujla'pe wichi tä tälhomche honhatil nämhihola Jerusalén wet t'alhla n'oye che olham tä ohäpe Dios tä laj letumfwaya otkäpfwayehen. 23Lewhäytso diezpej hin'ol tä tälhe honhatil iyhäj tachumhiyela tefwajpejni Judío lew'uy wet yohlak, “Olhamel oyik amche, tsi oläte tä Dios i'amejen.”
Currently Selected:
Zac 8: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
