Zac 14
14
Lhawuk ifwayhthila Jerusalén
1Lhek tetshan, nämla Lhawuk laka ifwala häpkhilek Jerusalén lheley hiw'enej letayhfwas tä hiw'en lhamhomche lakäywet. 2Ifwalatso Lhawuk ihutlawek nilhokej wichi tä ihiche honhatil häpkhilek tatayhlä Jerusalén. Lhamel ikalhihila hupuy wet isohiyeja m'ayhay tä ichechufwi. Hip'ajthichelahchä atsinhay, wet äp itihihila lechowejo wichi tä ichäj, wet imälhehilahchä iyhäj, w'awulhi iyhäj. 3Wet nech'e Lhawuk yikhila tä tatayhlä Jerusalén letayhfwastso, tehlat iwoye ifwalas tä pajche tä iwo laka'tshayaja. 4Ifwalatso Lhawuk t'äsila'pe tachenaj tä Oliwachat lepes tä tumejlä Jerusalén lhip tä ifwala tälhche. Wet nech'e n'änhila lech'o tä tälhe tä ifwala tälhche pajla'tha nichäte tä ifwala y'uyhi. W'enhahila lhamej tachenaj tä Oliwachat, lhip tatay tafwojyhiye, lhip tatay tapinhiye. 5Wet amel lenuhikwela alhoho tä letiyäjichela tachenhas kawayhi pajla'tha lechäte Asal. Atehlat iwoye achätilis p'ante inukwe alhoho tä honhat w'ahu inuye ifwalas tä rey Uzías niyatej Judá.#Amós 1.1 Wet nämla Lhawuk Dios tä lhäy'e lech'otfwas tä pule lheley.
6Ifwalatso nemla techäjche, nemla fwiy'et ilän honhat, 7wet nemla iche honatsi tsi lajit lepesa ifwala tä isi. Lhawuk t'at tä ihanej lewhäy tä ihichela. 8Ifwalatso inätes tä iwo n'ow'atshancheyaja#Juan 7.37-39; Apoc 22.1 tälhihola Jerusalén tä iläfwelchehen tä yachup lhäy'e tä fwiy'etil. Lhip tiyäjiyela lewomekitaj tä tumej tä ifwala tälhche, lhip tiyäjiyela lewomekitaj elh tä tumej tä ifwala y'uyhi.
Lhawuk niyathiyeja nilhokej honhat
9Ifwalatso Lhawuk niyathiyeja nilhokej honhat, wet tefwaji Lhawuk wet tefwaji lhey. 10Nilhokej honhat w'awulhilahchä, tälhiyela Geba pajla'tha nichäte Rimón tä tumej Jerusalén lhip tä tapinhiye. Wet Jerusalén atofwiphäla, n'ow'etla t'at, tälhiyela lepe tä tatayhlä Benjamín lhayis kahonhat, pajla'tha nichäte lepe tä pajche tä ihi letselhä, wet äp tälhiyela Hananel laka hup tä atojphä, pajla'tha nichäte lew'etes tä lewuk rey tä õt'äsiche uvas tä õyen hat'esa. 11Wet che õyenla w'eta Jerusalén, tek yachajiholak wasi, wichi letamsekhila t'at tsi kalelhäj.#Apoc 22.3
12Matla nilhokej wichimhaj tatayhlä Jerusalén, Lhawuk itihiyeja letasnhayaj tä äytajche. Lhamel t'isanis y'itajihichela tä kamaj iläyhiche, tatelhoy tiyäjichelahchä, wet lak'ajlhich'ul äp tehlat iwoye. 13Ifwalatso Lhawuk istunla wet elh tefwajpeji itihiyejpeja elh takwey tä tatayhlä. 14Judá lheley iwohla ka'tshayaja'pe Jerusalén. Wet isohiyeja wichi tä ihiche honhatil tä atott'ahomche lakäywet tä laha ihi, oro, plata, lhäy'e lew'uyis. 15N'otasnhayajtso nichätla'pe wichi, lhäy'ehila yel'atas, mola lhayis, camellos, asnolis, wet nilhokej itshätäy tä letayhfwas itihi lhip tä yen lew'eta.
Nilhokhiyeja wichi tä n'okwiyej Lhawuk
16Wichimhaj tatayhlä Jerusalén, häp iyhäj tä kamaj iläyhiche ihohiyepeja Jerusalén nekchämpej, n'okwihiyeja Niyat tä häpe Lhawuk tä laj letumfwaya wet yenla lakäjyaja N'ohupelis.#Lev 23.39-43 17Wet wichihlak nihoyaye Jerusalén tä nin'okwiyayej Niyat tä häpe Lhawuk tä laj letumfwaya, pelhay tek nichätla'pe laka honhat. 18Che Egipto lheley nihoyaye n'okäjyaj tä N'ohupelis, Lhawuk itasnhila, tehlat iwoye tä itasin wichi iyhäj tä nihoyaye n'okäjyaj. 19N'otasnhayaj tä iyej Egipto tehlat iwoye n'otasnhayaj tä iyej wichi iyhäj tä nihoyaye n'okäjyajtso.
20Ifwalatso yel'atas kakhäläj n'olesaynhay ihihila tä yok, Lhawuk t'amajchet. Wet n'olhatajhis tä ihi Lhawuk Lewukwe n'ot'amajchetesila, tehlat iwoye n'olhäthis tä iwhäye Lhawuk laka altar. 21Nilhokhiyeja n'olhatajhis tä ihi Jerusalén lhäy'e Judá, Lhawuk tä laj letumfwaya yenla t'amajchetesa. Elh at che häpe che ihoye Lhawuk Lewukwe tä yen n'okhayajayej itshäwet tä ilän, häp tä ichumyenlawethä n'olhatajhistso häpkhilek ipen t'isan. Wet ifwalatso nemla iche hin'o che ifwelwethä wok ichäj m'ayhay tä ihi Lhawuk Lewukwe.#Mat 21.12-13
Currently Selected:
Zac 14: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
