Zac 1

Lhawuk ne'tek wichi iwo lehusey iyhäja

1Iwel'a ocho tä ihi nekchäm dos p'ante rey Darío ihi leniyatyaj, Lhawuk ifwenho lhämet profeta Zacarías,#Esdras 4.24—5.2; 6.14 Berequías lhäs tä Ido lecheyäs, ne'tek iwo siläta wichi wet yok:

2-3–Lhawuk tä laj letumfwaya yäm wuj lewäk tä itiyej p'ante amel achätilis. Athana lhämet yokwe, “Tapilay n'oye, häpkhilek oyäpil amejen.#Isa 55.7; Sant 4.8 4Yej woye m'ak tä achätilis iwoyepej, tej tä profetas ifwenhopej olhämet tä oyok, Leyache akeyis tä ni'isachehen. Mat lhamel tek tach'ahuye olhämet. 5¿Wet chi tä ihitso achätilis? ¿Hä iläyhiche t'at, lhäy'e profetaste tahuyejen? Kha, ihichehent'a. 6Matlhat olhämtes tä one'tek okawos profetas iwoyeje achätilis, häp tä lhayäm matche wet lewit'äyhyaj nichät'atpe lhamel. Tä paj wet lhamel tapil n'oye wet yok, Iwuk Dios tä laj atumfwaya, lhäm matche tä letasin n'o'pehen okeyis tä ni'isachehen tä olhamel owoye.”

Zacarías lew'enek tä häpe hin'ol tä iche'pe lew'utey

7Häp nekchäm dos tä rey Darío ihi leniyatyaj, wet iwel'a once tä lhey Sebat, wet ifwala tä veinticuatro, iche m'ak tä Lhawuk ipäyen n'oye tä ohäpe Zacarías, Berequías lhäs tä Ido cheyäsn'o. 8Honatsitso iche ow'enek, ow'en hin'o tä i'pe yel'ataj tä ichätche, ilech'oye hal'äy tä w'atshan lechowejo. Wet tä ilew'echehi iche iyhäj yel'atas tä ichätchehen, wet ika'tukwehen iyhäj, wet ipelas iyhäj.#Apoc 6.2-8 9Iche ángel tä i'owhäye, wet oty'ätshene, oyok:

–Iwuk, ¿atsi wichi tä häpe tä iche'pe yel'atas?

Wet ángel nichulh n'oho wet yok:

–Opäynhila ame m'ak tä häpe lhamel.

10Tä mälhyejtso, elh tä ilechowejo hal'äy tä w'atshan yok:

–Tähestso häpe lhamel tä Lhawuk ichenpe nilhokej honhat häpkhilek itetshan m'ak tä iche.

11Wet lhamel tä iche'pe yel'atas tahuyej Lhawuk laka ángel tä ihi hal'äy tä w'atshan, yok:

–Olhamel olunej nilhokej honhat, wet ow'en tä letamsek ihi t'at.

12Lhawuk laka ángel yok:

–Iwuk Dios tä laj atumfwaya, ihi setenta nekchämis tä lechuwete Jerusalén wet lhäy'e hupuy tä ihi Judá. ¿Chihlate che lhachajo tä lep'altsenhen lhamel?

13Wet Lhawuk nech'e yäm ischehen lhämtes tä nichulhejo ángel tä tahuy n'oyej. 14Wet ángel isukun n'oyej Lhawuk tä laj letumfwaya lesilätyaj tä yok:

–Wuj tä ohumin Jerusalén, ow'et tä ot'amajchet. 15Häp tä tamenej tä wuj tä otwäkwäye wichi tä ihiche honhatil tä letamsekis ihi wet nena lhakliya m'ak at che häpe. Tsi tä niwuja owäk tä otiyejte oka wichi Israel, mat lhamel hich'atche m'ak tä iwoye. 16Wet häp tä oyachajo tä op'altsen Jerusalén, õ'nech'aynhihichela Owukwe lhäy'e iyhäj hupuy.

17Wet ángel äp isukun n'oyej Lhawuk tä laj letumfwaya lesilätyaj tä yok:

–Oka hupuy yachajiholak yiklhatshi. Yachajiholak ottshupiye Jerusalén wet ow'enhihola lakhajyhayaj laka wichi.

Elh Zacarías lew'enek tä häpe m'ak ch'ul lhäy'e chinhaswos

18Tä oyahinphä, wet iche elh ow'enek tä häpe m'ak ch'ul tä ihi cuatro. 19Oty'ätshene ángel tä tahuy n'oyej, oyok:

–¿Atsi m'ak tä häpe m'ak ch'ulna?

Wet yok:

–M'ak ch'ul häpe wichi tä lakhajyhayaj ihi tä ifwtsatkatte'pe honhat häp Judá lheley wet Israel lhayis wet Jerusalén lheley.

20Tä tajyäme täjtso, Lhawuk ipäyen n'oye chinhaswos tä ihi cuatro. 21Wet oyok:

–¿Chipte tä nämhen chinhaswostso?

Yok:

–Lhamel nämhen häpkhilek istun wichi tä ifwtsatkatpehen honhat Judá lheley. Lhamel yisthihena m'ak ch'ul tä inhäpäjejwethä oka wichi, wet äp ikalhihila lhamel tä t'äsche'pe.

Currently Selected:

Zac 1: WCHB

Highlight

Copy