Neh 13
13
Õhw'enhat Israel lhayis tä lhayej wichi tä w'enha lhamej
1Wet ifwalatso õyahyen Moisés lesaynhay tä ihi tä wichi tatache. Wet õhw'en n'olesaynek tä yäme häp Amón lhayis lhäy'e Moab lhayis tä isit'ak lhayej Dios laka wichi. 2Tsi lhamel tek iwatp'antehlä Israel lhayis wet hiw'enhihot'a p'ante lhäk wok inät. Mat iwo lakahaya profeta Balaam yämthilek takäpfwayeje lewit'äyhyajay. Mat lhaka Dios tach'anlhahiyet'a Balaam, wet häp tä lakäpfwayaj tä ni'isa tä fwetaj iwoyeje Israel häpe m'ak tä is.#Deut 23.3-5,#Núm 22—24
3Tä wichi iläte n'olesaynek tä õyahyen, lhamel hiw'enhat nilhokej Israel lhayis tä lhayej wichi tä w'enha lhamej.
Nehemías yokwesphä Tobías tä ihi Dios Lew'et
4-5Wet m'ak tä ichun tä ni'isa, sacerdote Eliasib, hin'o tä lechumet tä itetshan hupch'o tä õt'amajeji m'ayhay tä lewuk lhaka Dios Lew'et, lham hiw'enho Amón lhayis elh tä lhey Tobías häp hupch'o elh tä tsajo yämthilek yen lew'eta, tsi elh t'at. Wet lech'otso häp tä lew'et tä õt'amajej m'ayhay tä õyen Dios t'awayhata, lhäy'e incienso, lhäy'e n'olhäthis, lhäy'e diezmos tä häpe yachuyaj lhip, hat'es, aceite, tä õne'tek õhw'enho Leví lhayis, lhäy'e hin'ol tä ichoywethä, lhäy'e iyhäj tä t'uye Dios Lew'et, lhäy'e m'ak tä õhw'enho sacerdotes.
6Mat häp ifwalastso olham oihihit'a Jerusalén, wet häp tä Eliasib iwoye täjtso. Tsi tä treinta y dos nekchämis tä rey Artajerjes ihi leniyatyaj, olham oyäple Babilonia. Mat tä paj oyachajo tä ot'alhe rey yämthilek tach'anlha n'oye chik otpile Jerusalén. 7Wet tä onäm, ow'en m'ak tä ni'isa tä Eliasib iwoye tä lham hiw'enho Tobías hupch'o elh tä ihi Dios Lew'et yämthilek yen lewukweya. 8Wet wuj tä n'am humin tä ow'en, wet otonphä nilhokej Tobías lakäywet tä ichufwi.#Mat 21.12-13 9Wet one'tek õ'lejchufwi yämthilek nemhit lakokhayaj ihi. Wet oyachajchufwi nilhokej m'ayhay tä pajche lew'et häp Dios Lew'et: n'olhäthis, m'ayhay tä wichi yen Dios t'awayhata, lhäy'e incienso.
Nehemías ne'tek õyachajo tä õhw'enho lhäk häp Leví lhayis
10Häte õ'fwel n'oho tä nemhit õhw'enho lhäk häp Leví lhayis.#Deut 12.19 Wet häp tä lhamel lhäy'e iyhäj tä tachumwethä, häp lhamel tä tach'ote Dios lechumet, lhamel yikhen, yäpnhomche lew'etes yämthilek iche m'ak chik isej. 11Wet otahuyej wichi kaniyatey wet oyok:
–¿Atsi m'ak tä tamenej tä nem iche lewos tä t'uye Dios Lew'et?
Wet ot'äne Leví lhayis lhäy'e iyhäj tä ichoywethä, wet oyachajomche lhamel häp lechumtes. 12Wet nilhok wichi tä ihi Judá lhamel ihäne laka diezmo tä häpe lhip yachuyaj lhay, hat'es, lhäy'e aceite. 13Wet nech'e oy'uhyene sacerdote Selemías, lhäy'e elh tä lhayen lewoyayej Dios lhämtes tä häpe Sadoc, lhäy'e Leví lhayis elh tä lhey Pedaías. Wet oyen lech'otfwaya hin'o tä lhey Hanán, Zacur lhäs tä lechäti Matanías. Tsi häpe lhamel tä lehusey ihi, yämthilek hiw'enhomche lhäk häp iyhäj tä tach'ote Dios Lew'et lechumet.
14¡Ika Dios, tichunej n'okwe täjtso, wet yej p'ethatlä nilhokej m'ak tä is tä owoyeje am tä oka Dios Lew'et lhäy'e achumet!
Nehemías ne'tek õyen t'amajcheta ifwala tä n'ot'elakw'et
15Wet häp ifwalastso ow'en wichi tä ihi Judá, tej tä ifwala tä n'ot'elakw'et, mat lhamel t'äsi t'at uvas tä yen hat'esa. Iyhäj ilhuhyenejen asnolis trigo tä yäythomche, lhäy'e hat'es, uvas, higos, wok m'ak at chik häpe tä ilhuhyenejen asnolis, wet ihäne t'at Jerusalén häp ifwala tä n'ot'elakw'et. Wet ofwoneje lhamel tä iwom m'ayhay häp ifwala tä n'ot'elakw'et.#Éx 20.8-10; Jer 17.21-22 16Häte iche iyhäj tä ihi Jerusalén tä Tiro lheley tä lhamel ihänho hupuy w'ahat lhäy'e m'ayhay iyhäj yämthilek wichi ichäj, tej tä häpe ifwala tä n'ot'elakw'et. 17Wet ofwoneje Judío lhayis kaniyatey wet oyok:
–Matche tä ni'isa m'ak tä lewoyaye. Lhenay w'et m'ayeka ifwala tä n'ot'elakw'et. 18Lewoyaye t'at m'ak tä achätilis p'ante iwoye, wet häp tä tamenej tä wuj lewit'äyhyaj tä lhaka Dios ichätyenpe lhamel lhäy'e hupuyna. ¿Hä let'ayhtejen Dios lewäk tä itiyej Israel, wet tamenej tä lhenay w'et m'ayeka ifwala tä n'ot'elakw'et?
19Wet tä honaj tä iwo tesa tä honatsi t'at, one'tek õhp'ohiche Jerusalén lepelis tä kamaj kahäpeya ifwala tä n'ot'elakw'et, pajtha tajyäme n'ot'elakw'et. Häte oy'uhyene okawos häp n'olafwek lepelis, yämthilek newache elh chik häpek iwom m'ayhay wet tiyäjo hupuy häp ifwala tä n'ot'elakw'et. 20Wet häp iyhäj tä iwom m'ayhay lhamel i'alhoye häp ifwala tä n'ot'elakw'et. 21Wet oyämhoplhi lhamel, ofwenho tä isit'a tä lhamel i'alhoye, wet oyok:
–Chik lhachajo tä lenämhen häp ifwala tä n'ot'elakw'et, oaitsoklawethä wet op'ohla amhiche.
Wet tälhe ifwalatso nemhit nämhenpej häp ifwala tä n'ot'elakw'et. 22Wet one'tek Leví lhayis inay tä letetnek lhamejen tä lhayen Lhawuk t'amajchetesa yämthilek t'uyehen lepelis, häpkhilek tek õyen w'et m'ayeka häp ifwala tä n'ot'elakw'et.
¡Ika Dios, häte tichunej n'okwe täjtso wet p'altsenn'o, häp tä isej ahumnhayaj tä nittäya!
Nehemías nichuwete Israel lhayis tä yen lech'efwasa atsinhay tä w'enha lhamej
23Wet ifwalastso häte ow'en tä iche Judío lhayis tä yen ch'efwasa atsinhay tä tälhe Asdod, Amón, lhäy'e Moab. 24Wet iyhäj leles iwoye t'at Asdod lheley lhayhi, lhäy'e wichi iyhäj tä w'enha lhamej lhayhi, wet lhamel ihanhiyejt'a Judío lhayhi. 25Wet ottayhlä lhamel wet oyok:
–¡Awit'äy i'amejen!
Iche iyhäj tä onhäpäjwethä wet otonhiche lew'oley, wet one'tek hit'untejche lhämet Dios tä yäm matche tä nemla iwahnej leles chik yen ch'efwasa wichi tä w'enha lhamej leles tsinhay, wok lhamel leles tsinhay chik yen ch'efwasa wichi tä w'enha lhamej leles, wok lhamel isit'ak yen ch'efwasa.#Éx 34.11-16; Deut 7.1-5 26Häte ofwenho tä oyok:
–¡Häpe p'ante täjtso Salomón lech'isukyaj tä iwoye tä lham häpe Israel lhayis laka rey! Häpe rey tä niwohit elh rey tä ihonhate chik w'awulhi chik häte iwoye lham. Wet äp Dios ihumin wet yen häpeya Israel lhayis laka rey. Mat ikäne atsinhay tä w'enha lhamej wet iwoye t'at m'ak tä ni'isa.#1~Rey 11.1-8 27Tä mälhyejtso, olhamel matche tä oy'ulhan m'ak tä ni'isa tä amel lewoyaye tä letatayhlä Lhawuk Dios tä lhenay hach'efwasa atsinhay tä w'enha lhamej.
28Wet iche elh tä häpe Joyada lhäs tä lechäti Sacerdote tä Lhamya Eliasib. Wet lham pajche yen ch'efwaya atsinha tä lajcha Sambalat, häp niyat tä tälhe Horón.#Neh 4.1 Häp tä tamenej tä ochen.
29¡Ika Dios, yej p'ethatlä lhamel tä ikänchi len'ohyajay tä häpehen akawos sacerdotes lhäy'e Leví lhayis, wet lhamel inäk'äs lhämet tä pajche iwoyej ame!
30Tä mälhyej'attso, osoyej wichi nilhokej m'ak tä iti lhamejen tä tälhe wichi tä w'enha lhamej. Wet okalelhätchä sacerdotes lhäy'e Leví lhayis lechumtes, yämthilek elhpej ihanej lechumet tä iwoye, 31lhäy'e häp lhamel tä ihän alhoho hal'äy tä itäj huk chik nichätepej ifwala tä lewhäy, lhäy'e lhamel tä ichäj alhoho lakäs lhay tä ichun.
¡Ika Dios, tichun n'okwe wet käpfwayej n'oye m'ak tä is!
Currently Selected:
Neh 13: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
