Mat 5
5
Jesús iwo lhämeta tä i'pe chenaj
1Tä Jesús hiw'en wichi tä wuj, iho'pe chenaj wet tatayphä. Wet lechufwenkay ihoye, 2wet lham iwo tesa tä iwo lechufwenyaja wet yok:
Wichi tä Dios lakäpfwayaj tä is iyejen
(Luc 6.20-23)
3–Dios lakäpfwayaj tä is iyejen lhamel tä ihanej ihi tä ts'ilak Dios lep'altsenyaj tä isej, wet yok, “Matche tä owatlä.” Lhamel häpehen t'at Leniyatyaj lewuhuy.
4“Dios lakäpfwayaj tä is iyejen lhamel tä lefwitajayaj ihi. Dios ikäsyenlawethä lhamel.
5“Dios lakäpfwayaj tä is iyejen lhamel tä lhayene iyhäj tä w'et m'ayhay t'at. Lhamel ikathiyeja honhat tä Dios ifwenho.#Sal 37.11
6“Dios lakäpfwayaj tä is iyejen lhamel tä hätet iwoyek ichimejen wet ichuyuhlä tä iwatlä m'ak tä Dios ihuminche. Dios yipsaynhiyejena m'ak tä iwatlätso.
7“Dios lakäpfwayaj tä is iyejen lhamel tä hip'altsenhen iyhäj. Dios hip'altsenhenla lhamel.
8“Dios lakäpfwayaj tä is iyejen lhamel tä lehusey ts'ilak. Lhamel hiw'enla Dios.#Sal 24.3-4
9“Dios lakäpfwayaj tä is iyejen lhamel tä yenlhi iyhäj letamsek. Lham yohlak, Oles lhameltsi.
10“Dios lakäpfwayaj tä is iyejen lhamel tä wichi itiyej laka'tshayaj tä lhamel iwoye m'ak tä lham ihuminche.#1~Ped 3.14 Lhamel häpehen t'at Leniyatyaj lewuhuy.
11“Dios lakäpfwayaj tä is i'amejen chik wichi ailäkwethä tä lehänn'o, wet iti amejen laka'tshayaj lhäy'e lesufwkanyajay tä w'enhahiche.#1~Ped 4.14 12Wo akäjyaja, akäsyenwethä, tsi wujla awayhat tä ipuleye. Tsi mälhyej'attso profetas p'ante pajche, wichi itiyej p'ante laka'tshayaj.#2~Crón 36.15-16; Ap.Lh 7.52
Nisoy lhäy'e isi
(Mar 4.21; 9.50; Luc 8.16; 11.33; 14.34-35)
13“Amel ahäpehen nisoy yämthilek nilhokej wichi tä i'pe honhat isej. Mat chik nisoy nem nosoy,#5.13 Ifwalas p'antetso iche nisoy tä lhamya, wet häte iche nisoy elh tä paj wet nemhit nosoy. ihanhiyejt'a lhaiwoyneje yämthilek yachajo tä nosoy. Oyok, nemhit is, õ'wom wet wichi t'äsche.
14“Amel ahäpehen wichi tä i'pe honhat laka isi.#Juan 8.12; 9.5 Hupuy tä i'pe chenaj tä atojphä, ihanhiyejt'a chik lhaiskat. 15Wok hin'o chik iwun lechäkw, wet tek hip'o'pe, mat itonitphä yämthilek ihutunpe nilhokej wichi tä ihi lew'et. 16Wet amel is chik amälhyet iwoye täjtso, aka isi ihutunpe tä ihi tä wichi itayche, häpkhilek lhamel hiw'en m'ak tä is tä lewoyaye wet iwunit Ajchayay tä ihi pule.#1~Ped 2.12
Jesús yäme Ley p'ante tälhe Moisés
17“Yej lhenayek onek yämthilek otäyhat häp Ley p'ante tälhe Moisés wok n'ochufwenyajay tä tälhe profetas. Tek otäyhat, mat otäfwnhatej wichi m'ak tä lhamya tä häpe tähestso. 18Matche tä ofwen amhohen, Chik kamaj iche pule lhäy'e honhat, nofwit'ala Ley p'ante tälhe Moisés, wok letrafwaj wok puntofwaj chik häpe, yämthilek lhayäm matche nilhokej m'ayhay. 19Häp tä tamenej, chik elh chik häpe inäk'äs weihalha n'olhämtes p'antetso, tej chik niwuja, wet ichufwenej wichi m'ak tä lham iwoye, oyok, õyenla häpeya hin'o tä niwuja tä ihi Dios Niyatyaj. Mat häp elh chik iwoye wet ichufwenejen wichi, õyenla häpeya hin'o tä wuj tä ihi Dios Niyatyaj. 20Wet häp tä ofwen amhohen, Chik ha'isyaj tä lewoyaye ninuya'pe Fariseo lhayis le'isyaj, lhäy'e hin'ol tä lhayen lewosayej Ley p'ante tälhe Moisés, tek lechäthihola Dios Niyatyaj.
Jesús yäme n'owäk
(Luc 12.57-59)
21“Amel lelätache n'olhämet p'ante õ'fwenho lhachätilis tä õyok, Yej lelän aelh,#Éx 20.13 tsi elh chik ilän elh õ'hänhiyela n'okalelhthayajwos yämthilek itiyej letes. 22Mat olham ofwen amhohen tä oyok, Elh chik häpe chik tawäkwäye lepuhfwa, letes ihi. Wet elh chik yen w'et m'ayeka lepuhfwa, õ'hänhiyela Concilio tä Lhamya tä ihi Jerusalén. Wet elh chik yen isuka lepuhfwa, õ'chätyenhihola n'oteläythayaj tä t'un lew'et tä häpe itäj.
23“Tä mälhyejtso, chik lewo t'awayhata Dios, wet ahusekch'oye tä iche m'ak tä tamenej tä apuhfwa ayen tayhfwaya, 24n'äy ayejwhäye Dios t'awayhat häp altar tä ihi Dios Lew'et, wet chunkat hoye ayej apuhfwa wet a'isyene. Wet chik leleyej, äple Dios Lew'et wet nech'e lhachaje Dios m'ak tä lhen t'awayhata.
25“Chik iche elh tä iti amej ates wet ihän ame n'okalelhthayajw'et, is chik yofwajkwet ale'isyene tä kamaj lheyayhi n'äyij. Tsi chik nimälhyayejtso, ayachajiyela n'okalelhthayajwo, wet n'okalelhthayajwo ayachajiyela n'op'onthiwo, wet ithat amho n'op'onthi. 26Matche tä ofwen amho, Tek lenuhiphäla pajla'tha noj aka chinaj t'äj tä letiskanej atape.
Jesús yäme n'okain'oyaj
27“Amel lelätache n'olhämet p'ante pajche tä yok, Yej wo akain'oyaja.#Éx 20.14 28Mat olham ofwen amhohen tä elh chik häpe chik iyahin atsinha wet ikäne, oyok, hin'otso lehusek iwoyeje lakain'oyaj.
29“Tä mälhyejtso, chik atelho tä afwomkat tamen amej tä lechätho asukyaj, lanhi wet wom, häpkhilek nitmenayej mälhewek asan chik õ'thatho n'oteläythayaj tä t'un lew'et. 30Wet chik akwey tä afwomkat tamen amej tä lechätho asukyaj, iset wet wom, häpkhilek nitmenayej mälhewek asan chik õ'thatho n'oteläythayaj tä t'un lew'et.
Jesús yäme n'okey tä hin'o iwom lech'efwa
(Mat 19.9; Mar 10.11-12; Luc 16.18)
31“Häte õyop'antekwe, Hin'o chik häpe chik iwom lech'efwa, is tä hiw'enho papel tä yäme tä iwom atsinha.#Deut 24.1-2 32Mat olham ofwen amhohen tä oyok, Tajlhame chik lech'efwa häpe atsinha tä matche tä elh t'at tä neya katsik häpe, häp tä is tä ileyej.#1~Cor 7.10-11 Mat chik kahäpeya täjtso chik tamenej tä iwom, lham tä tamenej atsinha tä iwo lakain'oyaja. Wet hin'o chik yen lech'efwaya atsinha tä n'owomek, häte iwo lakain'oyaja.#Lev 18.6-18
Jesús yäme n'olhämet chik õht'unhatche
33“Häte lelätache n'olhämet p'ante õ'fwenho lhachätilis tä õyok, M'ak at chik häpe chik let'untejche ämet tä lhachaje häp Lhawuk, iwohiyet'ak ka'äma matche häp ämet.#Lev 19.12; Núm 30.2; Deut 23.21 34Mat olham ofwen amhohen tä oyok, Yej t'untejche ämet m'ak at chik häpe. Yej wo lheya pule tä let'unhatche ämet, tsi Dios Niyatyaj t'at, 35wok honhat, tsi Dios lepach'ol tä lew'et, wok häp Jerusalén, tsi Niyat tä Lhamya tä häpe Dios, häp tä laka hupuy. 36Wet yej katlä etek chik let'unhatche ämet, tsi lehanhiyejt'a lewoyneje yämthilek lepelnhat wok lechalnhat weihalhafwaj haw'ole. 37Mat ämet at chik häpe chik lhoyaykwe, Ey'a, is tä lhäm matche. Wok ämet chik lhoyaykwe, Kha, is chik häpe t'at tä lhok, Kha. Tsi m'ak chik lenuhatpe tähestso, tälhe ahättaj.#Sant 5.12
Jesús yok, Yej wo hayahlä aelh
(Luc 6.29-30)
38“Amel lelätache n'olhämet p'ante pajche tä yok, Wo haya, chik aelh ilanhi ate, wet lanhi aelh lete. Wok chik aelh ilanhi atsote, wet lanhi aelh letsote.#Éx 21.24; Lev 24.20; Deut 19.21 39Mat olham ofwen amhohen tä oyok, Yej wo hayahlä aelh chik iwoyej ame m'ak tä ni'isa. Chik y'aj hach'alo tä afwomkat, tumtejlä elh tä hats'amkat yämthilek äp y'aj. 40Wok chik elh t'uhläk iso amej akay'uche wet ihän ame n'okalelhthayajwo, ch'anlhaye chik hip'ajtej haw'uy tä iso amej. 41Wok chik sip'ä ne'tek letilhäj lelhuk yäk lechäte kilómetro weihalha, oyok, p'ajtej elh kilómetro. 42Elh chik häpe chik t'alhej ame m'ayek, w'enho t'at. Wet elh chik t'uhläk lecheyjäntej m'ak tä alewuk, yej n'äyejo.
Jesús ne'tek y'ahumnhen lhatayhfwas
(Luc 6.27-28,32-36)
43“Häte lelätache n'olhämet p'ante pajche tä yok, Humin aelh#Lev 19.18 wet n'äyiho atayhfwa. 44Mat olham ofwen amhohen tä oyok, Humnhen atayhfwas wet alhyene Dios häp lhamel tä iti amejen laka'tshayaj. 45Chik lewoye täjtso, ahäpkhihena leles häp Ajchayay tä ipuleye. Tsi lham inuhatphä ifwala, wet ichen pelhay, yämthilek wichi tej tä ni'isahen isej t'at, lhäy'e iyhäj tä isen. 46Tsi chik lets'ilkat lhamel tä aihumnhen tä letiyej ahumnhayaj, ¿atsi m'ak tä awayhathila? Tsi lhek yahinya, häte lhamel tä lechumet impuestos tä Romano lhayis t'alhpe, iwoye t'at täjtso. 47Wok lets'ilkat apuhfwas tä len'okwiyej, ¿hä aw'enha lhamejlä wichi iyhäj? Tsi lhek yahinya, häte lhamel tä nitäfwelayej Dios tä matche iwoye t'at täjtso. 48Wet häp tä oyok, Amälhtejwek ha'isyaj, mälhyej Ajchayay tä ipuleye imälhewek le'isyaj.
Currently Selected:
Mat 5: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
